9ನೇ ವಯಸ್ಸಿನಲ್ಲೇ ವಿಶ್ವದಾಖಲೆಗಳ ಸರದಾರನಾದ ಪುಟ್ಟ ಅನುಜ್ಗೆ ಲಕ್ಷ್ಮೀ ಹೆಬ್ಬಾಳಕರ್ ಸನ್ಮಾನ

        ಬೆಳಗಾವಿ 13 : ಸಾಧನೆಗೆ ವಯಸ್ಸಿನ ಮಿತಿಯಿಲ್ಲ ಎಂಬುದನ್ನು ಕೇವಲ 9ನೇ ವಯಸ್ಸಿನಲ್ಲೇ ಸಾಬೀತುಪಡಿಸಿರುವ ಪುಟ್ಟ ಸ್ಕೇಟಿಂಗ್ ಪ್ರತಿಭೆ ಅನುಜ್ ಶ್ರೀಕಾಂತ್ ಬೆಳಗಾಂವ್ಕರ್ ಅವರನ್ನು ಮಾಜಿ ಸಚಿವೆ ಹಾಗೂ ಬೆಳಗಾವಿ ಗ್ರಾಮೀಣ ಕ್ಷೇತ್ರದ ಶಾಸಕಿ ಲಕ್ಷ್ಮೀ ಹೆಬ್ಬಾಳಕರ್ ಅವರು ಆತ್ಮೀಯವಾಗಿ ಸನ್ಮಾನಿಸಿ ಅಭಿನಂದಿಸಿದರು.

         ಪುಣೆಯ ಅಭಿನವ್ ಇಂಗ್ಲಿಷ್ ಮೀಡಿಯಂ ಶಾಲೆಯಲ್ಲಿ 3ನೇ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿರುವ ಅನುಜ್, ಮೂಲತಃ ಬೆಳಗಾವಿ ಗ್ರಾಮೀಣ ಕ್ಷೇತ್ರದ ಅತಿವಾಡ ಗ್ರಾಮದ ಬೆಳಗಾಂವ್ಕರ್ ಕುಟುಂಬದ ಕುಡಿ. ಮಾರುತಿ ಸಾತೇರಿ ಬೆಳಗಾಂವ್ಕರ್ ಅವರ ಮೊಮ್ಮಗನಾಗಿರುವ ಈ ಬಾಲಕ, ಸ್ಕೇಟಿಂಗ್ ಕ್ಷೇತ್ರದಲ್ಲಿ ಅಸಾಧಾರಣ ಸಾಧನೆ ಮಾಡುವ ಮೂಲಕ ಬೆಳಗಾವಿ ಮಾತ್ರವಲ್ಲದೆ ಇಡೀ ನಾಡಿನ ಹೆಮ್ಮೆಯಾಗಿ ಹೊರಹೊಮ್ಮಿದ್ದಾನೆ. 

             ಗಿನ್ನೆಸ್ ವಿಶ್ವದಾಖಲೆಯ ಗರಿಮೆ ಬೆಳಗಾವಿಯ ಶಿವಗಂಗಾ ರೋಲರ್ ಸ್ಕೇಟ್ ಮೈದಾನದಲ್ಲಿ ಇನ್ಲೈನ್ ಸ್ಕೇಟ್ಸ್‌ ಧರಿಸಿ 100 ಮೀಟರ್ ದೂರವನ್ನು ಹಿಮ್ಮುಖವಾಗಿ  ಕೇವಲ 17.93 ಸೆಕೆಂಡುಗಳಲ್ಲಿ ಕ್ರಮಿಸುವ ಮೂಲಕ ಅನುಜ್ ಗಿನ್ನೆಸ್ ವಿಶ್ವದಾಖಲೆ ನಿರ್ಮಿಸಿದ್ದಾನೆ. ಅತ್ಯಂತ ಕಿರಿಯ ವಯಸ್ಸಿನಲ್ಲಿ ಇಂತಹ ಅಪರೂಪದ ಸಾಧನೆ ಮಾಡಿರುವುದು ವಿಶೇಷ ಗಮನ ಸೆಳೆದಿದೆ.ಇದಲ್ಲದೆ, ಎಂಟು ಚಕ್ರಗಳ ಮೇಲೆ 80 ಕ್ಲಾಕ್ವೈಸ್ ಹಾಗೂ 80 ಆಂಟಿ-ಕ್ಲಾಕ್ವೈಸ್ ಸುತ್ತುಗಳನ್ನು ಕೇವಲ 8 ನಿಮಿಷಗಳಲ್ಲಿ ಪೂರ್ಣಗೊಳಿಸಿ ರಾಷ್ಟ್ರೀಯ ಮಟ್ಟದ ದಾಖಲೆಯನ್ನೂ ತನ್ನದಾಗಿಸಿಕೊಂಡಿದ್ದಾನೆ.

               ನಿರಂತರ 79 ನಿಮಿಷಗಳ ಕಾಲ ನಾನ್ಸ್ಟಾಪ್ ಸ್ಕೇಟಿಂಗ್ ಮಾಡಿದ ಸಾಧನೆಗಾಗಿ ಹಾಗೂ ಜೀನಿಯಸ್ ಬುಕ್ ಆಫ್ ವರ್ಲ್ಡ ರೆಕಾಡ್ರ್ಸ್ಗಳಲ್ಲಿ ತನ್ನ ಹೆಸರನ್ನು ದಾಖಲಿಸಿಕೊಂಡಿದ್ದಾನೆ.ಪುಟ್ಟ ವಯಸ್ಸಿನಲ್ಲೇ ಅಸಾಧಾರಣ ಪ್ರತಿಭೆ, ಪರಿಶ್ರಮ ಮತ್ತು ಏಕಾಗ್ರತೆಯಿಂದ ವಿಶ್ವದ ಗಮನ ಸೆಳೆದಿರುವ ಅನುಜ್ನ ಸಾಧನೆಗೆ ಲಕ್ಷ್ಮೀ ಹೆಬ್ಬಾಳಕರ್ ಮೆಚ್ಚುಗೆ ವ್ಯಕ್ತಪಡಿಸಿದರು. ಇಂತಹ ಪ್ರತಿಭೆಗಳಿಗೆ ಪ್ರೋತ್ಸಾಹ ನೀಡುವುದು ಸಮಾಜದ ಜವಾಬ್ದಾರಿಯಾಗಿದ್ದು, ಅನುಜ್ನ ಸಾಧನೆ ಇತರ ಮಕ್ಕಳಿಗೂ ಸ್ಫೂರ್ತಿಯಾಗಲಿದೆ ಎಂದು ಹಾರೈಸಿದರು.

               ತರಬೇತುದಾರ ಶೇಖರ್ ಥೋರಾಟ್ ಅವರ ಸಮರ್ಥ ಮಾರ್ಗದರ್ಶನ ಹಾಗೂ ಕುಟುಂಬದವರ ನಿರಂತರ ಪ್ರೋತ್ಸಾಹದಿಂದ ಅನುಜ್ ಇನ್ನಷ್ಟು ಎತ್ತರಕ್ಕೆ ಬೆಳೆಯಲಿ, ಅಂತರರಾಷ್ಟ್ರೀಯ ಮಟ್ಟದಲ್ಲಿ ಮತ್ತಷ್ಟು ದಾಖಲೆಗಳನ್ನು ನಿರ್ಮಿಸಿ ಅತಿವಾಡ ಗ್ರಾಮ, ಬೆಳಗಾವಿ ಹಾಗೂ ಕನ್ನಡ ನಾಡಿನ ಕೀರ್ತಿಯನ್ನು ವಿಶ್ವದಾದ್ಯಂತ ಪಸರಿಸಲಿ ಎಂದು ಶುಭ ಹಾರೈಸಿದರು.