ಬೆಂಗಳೂರು,  ಜೂ.2,ಸ್ಯಾಂಡಲ್ ವುಡ್ ನ ರಾಕಿಂಗ್ ದಂಪತಿ ಯಶ್, ರಾಧಿಕಾ ಪಂಡಿತ್ ಅವರ  ಮುದ್ದಾದ ಮಗಳು ಐರಾ ತಮ್ಮ ತಂದೆ-ತಾಯಿಯಂತೆ ಈಗಾಗಲೇ ಸಾಮಾಜಿಕ ಜಾಲತಾಣದಲ್ಲಿ ಹವಾ  ಮಾಡಿದ್ದಾಳೆ‌.ಅವಾಗವಾಗ ರಾಧಿಕಾ ಪಂಡಿತ್‌ ಅವರು ತಮ್ಮ ಮುದ್ದಾದ ಮಕ್ಕಳ ಫೋಟೋ ಮತ್ತು ವಿಡಿಯೋಗಳನ್ನು ತಮ್ಮ ಅಭಿಮಾನಿಗಳೊಂದಿಗೆ ಹಂಚಿಕೊಳ್ಳುತ್ತಿರುತ್ತಾರೆ. ಇದೀಗ  ಐರಾ,  ತನ್ನ ಪುಟ್ಟ ಸಹೋದರನನ್ನು ತೊಡೆಯ ಮೇಲೆ ಮಲಗಿಸಿಕೊಂಡು  ಲಾಲಿ ಹಾಡುತ್ತಿರುವ  ವಿಡಿಯೋವೊಂದನ್ನು ರಾಧಿಕಾ ಅವರು ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಟ್ಟಿದ್ದಾರೆ.

ತಮ್ಮ‌  ಇನ್‍ಸ್ಟಾಗ್ರಾಂ, ಫೇಸ್‍ಬುಕ್‍ನಲ್ಲಿ ವಿಡಿಯೋವನ್ನು ಅಪ್ಲೋಡ್ ಮಾಡಿ,  " ನನ್ನ  ಸುಪುತ್ರಿ ಐರಾಗೆ ಇಂದಿಗೆ 18 ತಿಂಗಳು ತುಂಬಿದೆ. ಅಲ್ಲದೇ, ಅವಳು ತಮ್ಮ ತಂದೆಯನ್ನು  ಅನುಕರಿಸುತ್ತಾಳೆ ಎಂಬುದು ನನಗೆ ಖಚಿತವಾಗಿದೆ” ಎಂದು‌ ಶೀರ್ಷಿಕೆ ಬರೆದುಕೊಂಡಿದ್ದಾರೆ.ಐರಾ, ತನ್ನ ಸಹೋದರನನ್ನು ತೊಡೆಯ ಮೇಲೆ ಮಲಗಿಸಿಕೊಂಡು ಮುದ್ದಾಗಿ ಲಾಲಿ ಹಾಡಿ, ತಟ್ಟಿ ಮಲಗಿಸುವ ಪ್ರಯತ್ನ ಮಾಡುವುದು ಕಾಣಬಹುದು.ಅಕ್ಕ  - ತಮ್ಮನ ವಿಡಿಯೋಗೆ ಅಭಿಮಾನಿಗಳಿಂದ ಭಾರಿ ಮೆಚ್ಚುಗೆ ವ್ಯಕ್ತವಾಗಿದೆ. ಇನ್ನೂ, ನೋಡು  ನೋಡುತ್ತಿದ್ದಂತೆ 2.5‌ಲಕ್ಷಕ್ಕೂ ಹೆಚ್ಚು ಜನ ವಿಡಿಯೋವನ್ನು ವೀಕ್ಷಿಸಿದ್ದಾರೆ.ಇತ್ತೀಚೆಗಷ್ಟೆ  ನಟಿ ರಾಧಿಕಾ ಇನ್‍ಸ್ಟಾಗ್ರಾಂನಲ್ಲಿ ಪತಿ ಯಶ್ ಮತ್ತು ಮಗನ ಫೋಟೋವನ್ನು ಪೋಸ್ಟ್ ಮಾಡಿ,   ‘My Favourite Boys’ (ನನ್ನ ನೆಚ್ಚಿನ ಹುಡುಗರು) ಎಂದು ಶೀರ್ಷಿಕೆ  ‌ಬರೆದುಕೊಂಡಿದ್ದರು.