ಬಣ್ಣ ಬಣ್ಣದ ಅಲಂಕಾರ, ಮಂತ್ರೋಚ್ಚಾರಣೆ ನಡುವೆ ಲೋಸರ್ ಹಬ್ಬದ ಸಂಭ್ರಮ!

ಲೋಕದರ್ಶನ ವರದಿ  

ಮುಂಡಗೋಡ   18: ತಾಲೂಕಿನ ಟಿಬೆಟಿಯನ್ ಕ್ಯಾಂಪ್‌ಗಳಲ್ಲಿ ಟಿಬೆಟಿಯನ್ ಸಮುದಾಯದ ಪ್ರಮುಖ ಹಬ್ಬವಾದ ಲೋಸರ್ (ಹೊಸ ವರ್ಷ)ವನ್ನು ಭಕ್ತಿ, ಸಂಭ್ರಮ ಹಾಗೂ ಸಂಪ್ರದಾಯದ ಸೊಬಗಿನಲ್ಲಿ ಆಚರಿಸಲಾಯಿತು. ಟಿಬೆಟಿಯನ್ ಪಂಚಾಂಗದ 2153ನೇ ವರ್ಷದ ಆರಂಭದ ಅಂಗವಾಗಿ ‘ಬೆಂಕಿ’ ತತ್ತ್ವದ ವರ್ಷಕ್ಕೆ ಸಮುದಾಯವು ಆತ್ಮೀಯ ಸ್ವಾಗತ ಕೋರಿತು. ಹಬ್ಬದ ಅಂಗವಾಗಿ ಕ್ಯಾಂಪ್‌ನ ಬೌದ್ಧ ಮಂದಿರಗಳು ಬಣ್ಣ ಬಣ್ಣದ ಧ್ವಜಗಳು, ಪ್ರಾರ್ಥನಾ ಧ್ವಜಪತಾಕೆಗಳು ಹಾಗೂ ಧಾರ್ಮಿಕ ಚಿಹ್ನೆಗಳಿಂದ ಸಿಂಗಾರಗೊಂಡಿದ್ದವು. ಬೆಳಗ್ಗಿನಿಂದಲೇ ಭಕ್ತರು ಮಂದಿರಗಳಿಗೆ ಆಗಮಿಸಿ ವಿಶೇಷ ಪೂಜೆಗಳಲ್ಲಿ ಭಾಗವಹಿಸಿದರು. ಭಿಕ್ಷುಗಳು ಮಂತ್ರೋಚ್ಚಾರಣೆ ನಡೆಸಿ ವಿಶ್ವಶಾಂತಿ, ಸಮೃದ್ಧಿ ಹಾಗೂ ಸಮುದಾಯದ ಒಳಿತಿಗಾಗಿ ಪ್ರಾರ್ಥಿಸಿದರು. ಧರ್ಮೋಪದೇಶಗಳ ಮೂಲಕ ಲೋಸರ್ ಹಬ್ಬದ ಮಹತ್ವವನ್ನು ವಿವರಿಸಲಾಯಿತು. ಧಾರ್ಮಿಕ ವಿಧಿವಿಧಾನಗಳ ಬಳಿಕ ನಡೆದ ಸಾಂಸ್ಕೃತಿಕ ಕಾರ್ಯಕ್ರಮಗಳು ಹಬ್ಬದ ಸಂಭ್ರಮವನ್ನು ಮತ್ತಷ್ಟು ಹೆಚ್ಚಿಸಿತು. ಒಟ್ಟಾರೆ, ಮುಂಡಗೋಡು ತಾಲೂಕಿನ ಟಿಬೆಟಿಯನ್ ಕ್ಯಾಂಪ್‌ಗಳಲ್ಲಿ ಲೋಸರ್ ಹಬ್ಬವು ಧಾರ್ಮಿಕ ಭಾವನೆ, ಸಂಸ್ಕೃತಿ ಮತ್ತು ಏಕತೆಯ ಪ್ರತೀಕವಾಗಿ ಅರ್ಥಪೂರ್ಣವಾಗಿ ಆಚರಿಸಲಾಯಿತು.