ಭಕ್ತಿಯ ಕಳೆ, ರಂಗೋಲಿ, ಪುಷ್ಪವೃಷ್ಟಿ, ಆರತಿಯೊಂದಿಗೆ ದುರ್ಗಾ ದೌಡ್ಗೆ ಭವ್ಯ ಸ್ವಾಗತ

ಲೋಕದರ್ಶನ ವರದಿ  

ಮುಂಡಗೋಡ 16 :  ನವರಾತ್ರಿ ಪಾವನ ಪರ್ವದ ಅಂಗವಾಗಿ ಧರ್ಮರಕ್ಷಣೆಯ ಸಂಕಲ್ಪದೊಂದಿಗೆ ದುರ್ಗಾ ದೌಡ್ ಸಂಘದ ವತಿಯಿಂದ ಆಯೋಜಿಸಲಾಗಿರುವ ’ದುರ್ಗಾ ದೌಡ್‌’ ಅಭಿಯಾನವು 6ನೇ ದಿನಕ್ಕೆ ಕಾಲಿರಿಸಿದ್ದು, ಪಟ್ಟಣದ ವಿವಿಧ ಪ್ರಮುಖ ಬೀದಿಗಳಲ್ಲಿ ಅತ್ಯಂತ ಶ್ರದ್ಧೆ ಹಾಗೂ ವೈಭವದಿಂದ ಮುಂದುವರಿದಿದೆ. ರಂಗೋಲಿ ಸಿಂಗಾರ ಹಾಗೂ ತಾಯಂದಿರ ಆರತಿ: ದುರ್ಗಾ ದೌಡ್ ಸಾಗುವ ಮಾರ್ಗದುದ್ದಕ್ಕೂ ರಸ್ತೆಗಳನ್ನು ಬಣ್ಣಬಣ್ಣದ ರಂಗೋಲಿ ಹಾಗೂ ಹೂವುಗಳಿಂದ ಸಿಂಗರಿಸಲಾಗಿತ್ತು. ಮೆರವಣಿಗೆ ಮನೆಗಳ ಮುಂದೆ ಬರುತ್ತಿದ್ದಂತೆ ತಾಯಂದಿರು ಆರತಿ ಬೆಳಗಿ ಭಕ್ತರನ್ನು ಆತ್ಮೀಯವಾಗಿ ಸ್ವಾಗತಿಸಿದರು. ಮೆರವಣಿಗೆಯಲ್ಲಿ ಚಿಕ್ಕ ಮಕ್ಕಳು ದೇವಾನುದೇವತೆಗಳ ಧಾರ್ಮಿಕ ವೇಷಭೂಷಣಗಳನ್ನು ಧರಿಸಿ ಕಂಗೊಳಿಸಿದ್ದು, ಸಾರ್ವಜನಿಕರ ವಿಶೇಷ ಗಮನ ಸೆಳೆಯಿತು. 6ನೇ ದಿನದ ಸಂಚಾರ ಮಾರ್ಗ: ಶುಕ್ರವಾರ ಬೆಳಿಗ್ಗೆ ಪಟ್ಟಣದ ಆನಂದನಗರದ ಈಶ್ವರ ದೇವಸ್ಥಾನದಿಂದ ಆರಂಭಗೊಂಡ 6ನೇ ದಿನದ ಮೆರವಣಿಗೆಯು ಟಿ.ಡಿ.ಬಿ. ರೋಡ್ ಭಾಗದ ಗಣಪತಿ ದೇವಸ್ಥಾನದ ರಸ್ತೆ, ಕಲಾಲ ಓಣಿಯ ಶ್ರೀ ಯಲ್ಲಮ್ಮದೇವಿ ದೇವಸ್ಥಾನ ಹಾಗೂ ಬಸವನ ಬೀದಿ ಮಾರ್ಗವಾಗಿ ಸಾಗಿ ಬಸವೇಶ್ವರ ದೇವಸ್ಥಾನದಲ್ಲಿ ಸಮಾಪನಗೊಂಡಿತು. ಶ್ವೇತವಸ್ತ್ರಧಾರಿ ಭಕ್ತಾದಿಗಳು ’ದುರ್ಗಾ ಮಾತಾ ಕೀ ಜೈ’ ಎಂಬ ಘೋಷಣೆಯೊಂದಿಗೆ ಪಾದಯಾತ್ರೆ ನಡೆಸಿದರು. ಪುಟ್ಟ ಮಕ್ಕಳ ವೇಷಭೂಷಣ ಹಾಗೂ ಜನಸ್ಪಂದನೆ: ಮೆರವಣಿಗೆಯಲ್ಲಿ ದೇವಾನುದೇವತೆಗಳ ಧಾರ್ಮಿಕ ವೇಷಭೂಷಣಗಳನ್ನು ಧರಿಸಿ ಕಂಗೊಳಿಸಿದ ಪುಟಾಣಿಗಳು ಎಲ್ಲರ ವಿಶೇಷ ಗಮನ ಸೆಳೆದರು.ಕಳೆದ ಆರು ದಿನಗಳಿಂದ ನಿರಂತರವಾಗಿ ನಡೆಯುತ್ತಿರುವ ಈ ದುರ್ಗಾ ದೌಡ್ಗೆ ಸಾರ್ವಜನಿಕರಿಂದ ಹಾಗೂ ತಾಯಂದಿರಿಂದ ಅದ್ಭುತ ಸ್ಪಂದನೆ ವ್ಯಕ್ತವಾಗುತ್ತಿದೆ. ನೂರಾರು ಸಂಖ್ಯೆಯಲ್ಲಿ ಭಕ್ತರು ಭಾಗವಹಿಸಿ ಜಯಘೋಷ ಮೊಳಗಿಸುವ ಮೂಲಕ ಪಟ್ಟಣದಲ್ಲಿ ನೈಜ ನವರಾತ್ರಿ ಹಾಗೂ ಧಾರ್ಮಿಕ ಸಂಭ್ರಮ ಮನೆಮಾಡುವಂತೆ ಮಾಡಿದ್ದಾರೆ.