ಜೈನ ಸಂತರು ಹಾಗೂ ಸಾಧ್ವಿಯರ ಸುರಕ್ಷತೆಗೆ ಪ್ರಧಾನಮಂತ್ರಿಗೆ ಮನವಿ

ಹುಬ್ಬಳ್ಳಿ 07 : ದೇಶದಾದ್ಯಂತ ಪಾದಯಾತ್ರೆ ನಡೆಸುವ ಸಂದರ್ಭದಲ್ಲಿ ಜೈನ ಸಂತರು ಹಾಗೂ ಸಾಧ್ವಿಯರು ರಸ್ತೆ ಅಪಘಾತಗಳಿಗೆ ಒಳಗಾಗಿ ಪ್ರಾಣ ಕಳೆದುಕೊಳ್ಳುತ್ತಿರುವ ಘಟನೆಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ, ಹುಬ್ಬಳ್ಳಿಯ ಸಕಲ ಜೈನ ಸಮಾಜವು ಗಂಭೀರ ಕಳವಳ ವ್ಯಕ್ತಪಡಿಸಿದೆ. ಈ ಹಿನ್ನೆಲೆಯಲ್ಲಿ ಭಾರತದ ಮಾನ್ಯ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಗಮನಕ್ಕೆ ವಿಷಯವನ್ನು ತರಲು, ಪ್ರಧಾನಮಂತ್ರಿಗಳ 15 ಸೂತ್ರಗಳ ಅಲ್ಪಸಂಖ್ಯಾತರ ಕಲ್ಯಾಣ ಕಾರ್ಯಕ್ರಮ ಸಮಿತಿಯ ಸದಸ್ಯ ಮಹೇಂದ್ರ ಸಿಂಘಿ ಅವರ ನೇತೃತ್ವದಲ್ಲಿ ಧಾರವಾಡ ಜಿಲ್ಲಾಧಿಕಾರಿ ಹಾಗೂ ಹಿರಿಯ ಐಎಎಸ್ ಅಧಿಕಾರಿ ಸ್ನೇಹಲ್ ಆರ್‌. ಅವರಿಗೆ ವಿಸ್ತೃತ ಮನವಿ ಪತ್ರವನ್ನು ಸಲ್ಲಿಸಲಾಯಿತು.

ಮನವಿಪತ್ರದಲ್ಲಿ ದೇಶದಾದ್ಯಂತ ಪಾದಯಾತ್ರೆ ಮಾಡುವ ಜೈನ ಸಂತರು ಹಾಗೂ ಸಾಧ್ವಿಯರ ಸುರಕ್ಷತೆಗಾಗಿ ವಿಶೇಷ ಕ್ರಮಗಳನ್ನು ಕೈಗೊಳ್ಳುವುದು, ರಸ್ತೆ ಅಪಘಾತಗಳನ್ನು ತಡೆಯಲು ಅಗತ್ಯ ಭದ್ರತಾ ವ್ಯವಸ್ಥೆಗಳನ್ನು ಜಾರಿಗೊಳಿಸುವುದು ಹಾಗೂ ಅವರ ಸಂಚಾರಕ್ಕೆ ಸೂಕ್ತ ರಕ್ಷಣಾ ಕ್ರಮಗಳನ್ನು ಒದಗಿಸುವಂತೆ ಕೇಂದ್ರ ಸರ್ಕಾರಕ್ಕೆ ಮನವಿ ಮಾಡಲಾಗಿದೆ.ಈ ಸಂದರ್ಭದಲ್ಲಿ ಗೌತಮ್ ಭುರಟ್, ಶೈಲೇಶ್ ಜೈನ್, ವಿಮಲ್ ತಾಲಿಕೋಟಿ, ಸಂತೋಷ್ ಪಾಟೀಲ್, ಸಂತೋಷ್ ಡೂಮಾವತ್, ನೀಲೇಶ್ ಜೈನ್, ವಿಮಲ್ ಮಾಂಡೋತ್, ಮನೋಜ್ ಕೋಠಾರಿ, ಅಮಿತ್ ಜೈನ್, ತರುಣ್ ಜೈನ್, ವಿಮಲ್ ಜೈನ್, ಧರ್ಮೇಂದ್ರ ಜೈನ್, ಜಿತೇಂದ್ರ ಜೈನ್, ಸುಭಾಷ್ ಡಂಕ್ ಸೇರಿದಂತೆ ಸಮಾಜದ ಅನೇಕ ಮುಖಂಡರು ಹಾಗೂ ಸದಸ್ಯರು ಉಪಸ್ಥಿತರಿದ್ದರು.