ಏ.2ರಂದು ಅಮ್ಮಿನಬಾವಿ ಬಸವಣ್ಣ ದೇವರ ಜಾತ್ರೆ

ಲೋಕದರ್ಶನ ವರದಿ 

ಧಾರವಾಡ 31: ತಾಲೂಕಿನ ಅಮ್ಮಿನಬಾವಿ ಗ್ರಾಮದ ಗುಡಿ ಓಣಿಯಲ್ಲಿರುವ ಪ್ಯಾಟಿ ಬಸವಣ್ಣ(ನಂದೀಶ್ವರ) ದೇವರ ವಾರ್ಷಿಕ ಜಾತ್ರಾ ಮಹೋತ್ಸವ ಏ.2ರಂದು ಹೊಸ ವಸಂತದ ಮೊದಲ ಪೌರ್ಣಿಮೆ ‘ದವನದ ಹುಣ್ಣಿಮೆ’ಯ ದಿನ(ಗುರುವಾರ) ಜರುಗಲಿದೆ. ಇದಕ್ಕೆ ಪೂರಕವಾಗಿ ಮುನ್ನಾದಿನ(ಬುಧವಾರ) ರಾತ್ರಿ 8 ಗಂಟೆಗೆ ಉಚ್ಛಾಯ ಬಂಡಿ ಉತ್ಸವ ವಿವಿಧ ಜನಪದ ವಾದ್ಯಗಳ ಸಮೇತ ನಡೆಯಲಿದ್ದು, ಅಂದು ದೇವಾಲಯದಲ್ಲಿ ಅಹೋರಾತ್ರಿ ಭಜನಾ ಕಾರ್ಯಕ್ರಮ ನಡೆಯುವುದು. 

ಗುರುವಾರ(ಏ.2) ಪ್ರಾತಃಕಾಲದಲ್ಲಿ ಬಸವಣ್ಣ(ನಂದೀಶ್ವರ) ದೇವರ ವಿಗ್ರಹಕ್ಕೆ ಏಕಾದಶ ಮಹಾರುದ್ರಾಭಿಷೇಕ, ನೂರೊಂದು ಬಿಲ್ವಾರ್ಚನೆ, ಅಲಂಕಾರ ಪೂಜೆ ಹಾಗೂ ಮಹಾಮಂಗಳಾರತಿ ಜರುಗುವುದು. ನಂತರ ಅಪರಾಹ್ನ ಅನ್ನಸಂತರೆ​‍್ಣ ನಡೆಯುವುದು. 

ರಥೋತ್ಸವ : ಗುರುವಾರ ಸಂಜೆ 4 ಗಂಟೆಗೆ ಅಮ್ಮಿನಬಾವಿ ಸಂಸ್ಥಾನ ಪಂಚಗೃಹ ಹಿರೇಮಠದ ಓರ್ವ ಜಂಗಮ ಮೂರ್ತಿ ಸಮೇತ ಗ್ರಾಮದ ಹಕ್ಕು-ಬಾಬುಗಳ ಗಣ್ಯರೊಂದಿಗೆ ಅಲಂಕೃತ ರಥೋತ್ಸವ ನಂದಿಕೋಲು, ಪಲ್ಲಕ್ಕಿ, ಕರಡಿ ಮಜಲು, ಭಜನೆಗಳ ಸಮೇತ ಆರಂಭಗೊಳ್ಳುವುದು. ದೇವಾಲಯದ ಪ್ರಧಾನ ಅರ್ಚಕ ಬಸವರಾಜ ಪೂಜಾರ ರಥೋತ್ಸವದ ಕೊನೆಗೆ ವರ್ಷದ ಆಗು-ಹೋಗುಗಳ ಕುರಿತು ಹೇಳಿಕೆ ಹೇಳುವರೆಂದು ದೇವಾಲಯದ ಸೇವಾ ಟ್ರಸ್ಟ್‌ ಅಧ್ಯಕ್ಷ ಪ್ರಕಾಶ ಹುಲ್ಲೂರ, ಉಪಾಧ್ಯಕ್ಷ ಶಿವಾನಂದ ಕಡ್ಲೆಪ್ಪನವರ, ಕಾರ್ಯದರ್ಶಿ ಬಸವರಾಜ ಬೂದಿಹಾಳ ಜಂಟಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.