ನಂಬಿಕೆಯೇ ಶಕ್ತಿ: ಸಾಧನೆಯ ದಾರೀದೀಪ”

ನಂಬಿಕೆಯೇ ಶಕ್ತಿ: ಸಾಧನೆಯ ದಾರೀದೀಪ”

            ಮಾನವ ಜೀವನದಲ್ಲಿ ಅತಿದೊಡ್ಡ ಶಕ್ತಿ ಯಾವುದು? ದೇಹಬಲವೇ? ಹಣವೇ? ಅಧಿಕಾರವೇ? ಇಲ್ಲ. ಇವೆಲ್ಲವೂ ನಂತರದವು. ಮೊದಲಿಗೆ ಬೇಕಾಗಿರುವುದು ನಂಬಿಕೆ. “ನನಗೆ ಸಾಧ್ಯ” ಎಂಬ ಒಂದು ಚಿಕ್ಕ ಆಲೋಚನೆ, ಒಂದು ಕ್ಷಣದ ವಿಶ್ವಾಸ, ಇವೇ ದೊಡ್ಡ ಸಾಧನೆಗಳ ಬೀಜ. ಒಬ್ಬನು ಪ್ರತಿದಿನ ಒಂದು ಕೆಲಸವನ್ನು ಮಾಡುತ್ತಿದ್ದರೆ ಅದು ಅವನಿಗೆ ಸಹಜವಾಗುತ್ತದೆ. ವರ್ಷಗಳ ಅಭ್ಯಾಸ ಅವನ ಕೈಗಳನ್ನು ನಿಪುಣವಾಗಿಸುತ್ತದೆ. ಅವನಿಗೆ ಅದು ಸುಲಭ. ಆದರೆ ಅದೇ ಕೆಲಸವನ್ನು ಎಂದಿಗೂ ಮಾಡದವನಿಗೆ ಅದು ಅಸಾಧ್ಯವೆನಿಸುತ್ತದೆ. ಅಂತರ ಏನು? ಕೌಶಲ್ಯ ಮಾತ್ರವಲ್ಲ; ಆತ್ಮವಿಶ್ವಾಸವೂ ಹೌದು.ಜೀವನದಲ್ಲೂ ಇದೇ ನಿಯಮ ಅನ್ವಯಿಸುತ್ತದೆ. ಯಾವುದನ್ನಾದರೂ ಆರಂಭಿಸುವ ಮೊದಲು “ಇದು ನನ್ನಿಂದಾಗದು” ಎಂದುಕೊಂಡ ಕ್ಷಣದಲ್ಲೇ ಸೋಲು ಆರಂಭವಾಗುತ್ತದೆ. ಪ್ರಯತ್ನಕ್ಕೂ ಮುನ್ನವೇ ಮನಸ್ಸು ಕೈಬಿಟ್ಟರೆ, ಯಶಸ್ಸಿನ ಬಾಗಿಲು ಹೇಗೆ ತೆರೆದುಕೊಳ್ಳುತ್ತದೆ? ಮನಸ್ಸಿನ ಸೋಲು, ನಿಜವಾದ ಸೋಲುಬಹುತೇಕ ಜನರು ಹೊರಗಿನ ಅಡಚಣೆಗಳನ್ನು ಸೋಲಿನ ಕಾರಣವೆಂದು ಹೇಳುತ್ತಾರೆ. ಆದರೆ ಆಳವಾಗಿ ನೋಡಿದರೆ, ನಮ್ಮನ್ನು ಹಿಂದೆ ತಳ್ಳುವುದು ಹೊರಗಿನ ಪರಿಸ್ಥಿತಿಗಳಲ್ಲ; ನಮ್ಮದೇ ಮನಸ್ಸಿನ ಸಂಶಯ.“ನನಗೆ ಸಾಧ್ಯವಿಲ್ಲ”, “ನಾನು ಅಷ್ಟು ಪ್ರತಿಭಾವಂತನಲ್ಲ”, “ಇತರರು ಮಾಡಿದರೆ ಮಾತ್ರ ಸಾಧ್ಯ”,  ಇಂತಹ ಆಲೋಚನೆಗಳು ನಮ್ಮ ಹೆಜ್ಜೆಯನ್ನು ನಿಲ್ಲಿಸುತ್ತವೆ. ಇವು ಭಯಕ್ಕಿಂತಲೂ ದೊಡ್ಡ ಅಡ್ಡಿಗಳು.  

            ಭಯ ಕ್ಷಣಿಕ, ಆದರೆ ನಂಬಿಕೆಯ ಕೊರತೆ ದೀರ್ಘಕಾಲಿಕ. ಅದು ವ್ಯಕ್ತಿಯನ್ನು ಆರಂಭಿಸುವುದಕ್ಕೂ ಬಿಡುವುದಿಲ್ಲ.ನಮ್ಮ ಹವ್ಯಾಸಗಳು, ಸಂಸ್ಕಾರಗಳು, ಜೀವನಶೈಲಿ,  ಇವುಗಳನ್ನು ಬದಲಾಯಿಸುವುದು ಕಷ್ಟವೇ ಸರಿ. ಆದರೆ ಅಸಾಧ್ಯವಲ್ಲ. “ನನಗೆ ಸಾಧ್ಯ” ಎಂಬ ನಂಬಿಕೆ ಇದ್ದರೆ, ನಿಧಾನವಾಗಿ ಹೆಜ್ಜೆ ಹಾಕುತ್ತಾ ಮುಂದೆ ಸಾಗಬಹುದು. ನಂಬಿಕೆ  ಒಳಗಿನ ಬೆಳಕು, ನಂಬಿಕೆ ಎಂದರೆ ಅಹಂಕಾರವಲ್ಲ. ಅದು ಅತಿಶಯೋಕ್ತಿ ಅಲ್ಲ. ಅದು ಮೌನವಾದ ಒಳಗಿನ ಶಕ್ತಿ.ಮಣ್ಣಿನೊಳಗೆ ಬಿತ್ತಿದ ಬೀಜ ಮೊದಲು ಕಾಣುವುದಿಲ್ಲ. ಆದರೆ ಅದು ಮಣ್ಣಿನೊಳಗೆ ತನ್ನ ಕೆಲಸವನ್ನು ಮಾಡುತ್ತಿರುತ್ತದೆ. ಒಂದು ದಿನ ಅದು ಮೊಳಕೆಯಾಗಿ ಹೊರಗೆ ಬರುತ್ತದೆ. ಹಾಗೆಯೇ ನಂಬಿಕೆಯೂ. ಒಂದು ದಿನದಲ್ಲಿ ಸಾಧನೆ ಸಾಧ್ಯವಿಲ್ಲ. ಆದರೆ ಪ್ರತಿದಿನದ ಸಣ್ಣ ಪ್ರಯತ್ನಗಳು, ಸಣ್ಣ ಗೆಲುವುಗಳು, ಸಣ್ಣ ಸುಧಾರಣೆಗಳು,  ಇವೆಲ್ಲವೂ ಸೇರಿ ದೊಡ್ಡ ಬದಲಾವಣೆಗೆ ದಾರಿ ಮಾಡಿಕೊಡುತ್ತವೆ. 

             ಇತಿಹಾಸದಲ್ಲಿ ಮಹನೀಯರು ಸಾಧಿಸಿದದ್ದು ಒಂದೇ ದಿನದಲ್ಲಿ ಅಲ್ಲ. ಅವರಿಗೂ ಅಡಚಣೆಗಳಿದ್ದವು. ಅವರಿಗೂ ಸಂಕಷ್ಟಗಳಿದ್ದವು. ಆದರೆ ಅವರಲ್ಲಿ ಒಂದು ವಿಷಯ ಸಾಮಾನ್ಯವಾಗಿತ್ತು, ದೃಢ ನಂಬಿಕೆ. ಸೋಲಿನ ಅರ್ಥವೇನು? ಸೋಲು ಎಂದರೆ ಅಂತ್ಯವಲ್ಲ, ಅದು ಒಂದು ಪಾಠ. ಪ್ರಯತ್ನಿಸದಿರುವುದು ಮಾತ್ರ ನಿಜವಾದ ಸೋಲು. ಒಬ್ಬ ವಿದ್ಯಾರ್ಥಿ ಪರೀಕ್ಷೆಯಲ್ಲಿ ವಿಫಲವಾದರೆ, ಅದು ಅವನ ಸಾಮರ್ಥ್ಯದ ಅಂತಿಮ ತೀಪು ಅಲ್ಲ. ಅದು ಇನ್ನಷ್ಟು ಅಭ್ಯಾಸ ಬೇಕೆಂಬ ಸೂಚನೆ. ಒಬ್ಬ ಉದ್ಯೋಗಿ ಒಂದು ಅವಕಾಶ ಕಳೆದುಕೊಂಡರೆ, ಅದು ಅವನ ಜೀವನದ ಅಂತ್ಯವಲ್ಲ. ಅದು ಹೊಸ ಅವಕಾಶಗಳತ್ತ ಹೆಜ್ಜೆ ಇಡುವ ಅವಕಾಶ. ನಂಬಿಕೆ ಇದ್ದರೆ, ಸೋಲೂ ಸಹ ಪ್ರೇರಣೆಯಾಗುತ್ತದೆ. ನಂಬಿಕೆ ಇಲ್ಲದಿದ್ದರೆ, ಸಣ್ಣ ಅಡಚಣೆಯೂ ದೊಡ್ಡ ಗೋಡೆಯಾಗಿ ಕಾಣಿಸುತ್ತದೆ.ಸಮಾಜದಲ್ಲಿ ನಂಬಿಕೆಯ ಅಗತ್ಯತೆಇಂದಿನ ವೇಗದ ಜೀವನದಲ್ಲಿ ಮಾನಸಿಕ ಒತ್ತಡ ಹೆಚ್ಚುತ್ತಿದೆ. ಸ್ಪರ್ಧೆ ಹೆಚ್ಚಾಗಿದೆ. ಹೋಲಿಕೆಗಳು ಹೆಚ್ಚಾಗಿವೆ. ಸಾಮಾಜಿಕ ಜಾಲತಾಣಗಳಲ್ಲಿ ಇತರರ ಸಾಧನೆಗಳನ್ನು ನೋಡಿ, ಅನೇಕರು ತಮ್ಮನ್ನು ತಾವು ಕಡಿಮೆ ಎಂದುಕೊಳ್ಳುತ್ತಿದ್ದಾರೆ. ಇಲ್ಲಿ ಅತ್ಯಂತ ಮುಖ್ಯವಾದುದು ಸ್ವನಂಬಿಕೆ.ಇತರರೊಂದಿಗೆ ಹೋಲಿಸುವುದಕ್ಕಿಂತ, ನಿನ್ನೆಗಿನ ನಿಮ್ಮೊಂದಿಗೆ ಇಂದಿನ ನಿಮ್ಮನ್ನು ಹೋಲಿಸಿ. ಸಣ್ಣ ಮಟ್ಟಿನ ಬೆಳವಣಿಗೆಯಾದರೂ ಗಮನಿಸಿ.  

ಪ್ರತಿ ವ್ಯಕ್ತಿಗೂ ತನ್ನದೇ ಪ್ರಯಾಣ, ತನ್ನದೇ ವೇಗ. ತನ್ನದೇ ಗುರಿ. ಒಬ್ಬರ ಯಶಸ್ಸು ಮತ್ತೊಬ್ಬರ ವಿಫಲತೆಯ ಅರ್ಥವಲ್ಲ. ನಮ್ಮ ಸಮಾಜಕ್ಕೆ ಇಂದು ಬೇಕಾಗಿರುವುದು ಪರಸ್ಪರ ಪ್ರೋತ್ಸಾಹ ಮತ್ತು ಆತ್ಮವಿಶ್ವಾಸವನ್ನು ಬೆಳೆಸುವ ವಾತಾವರಣ.ನಂಬಿಕೆ ಇದ್ದು ಪರಿಶ್ರಮ ಇಲ್ಲದಿದ್ದರೆ ಫಲ ಸಿಗುವುದಿಲ್ಲ. ಪರಿಶ್ರಮ ಇದ್ದು ನಂಬಿಕೆ ಇಲ್ಲದಿದ್ದರೆ ಮಧ್ಯದಲ್ಲಿ ಕೈಬಿಡುವ ಸಾಧ್ಯತೆ ಹೆಚ್ಚು. ಈ ಎರಡು ಒಂದಾಗಿದಾಗಲೇ ಸಾಧನೆ ಸಾಧ್ಯ. “ನಾನು ಮಾಡುತ್ತೇನೆ” ಎಂಬ ಮನೋಭಾವದ ಜೊತೆಗೆ, “ನಾನು ಪ್ರತಿದಿನ ಸ್ವಲ್ಪಸ್ವಲ್ಪ ಮುಂದೆ ಹೋಗುತ್ತೇನೆ” ಎಂಬ ನಿಶ್ಚಯ ಅಗತ್ಯ. ಜೀವನವು ಓಟವಲ್ಲ; ಅದು ಒಂದು ಪ್ರಯಾಣ. ನಿಧಾನವಾಗಿ, ಆದರೆ ನಿಲ್ಲದೆ ಸಾಗುವುದು ಮುಖ್ಯ.ಕಷ್ಟಗಳು ಬರಬಹುದು, ವಿಘ್ನಗಳು ಎದುರಾಗಬಹುದು, ಕೆಲವೊಮ್ಮೆ ಫಲ ಕಾಣದೇ ನಿರಾಶೆಯಾಗಬಹುದು. ಆದರೆ ಅಲ್ಲಿ ನಂಬಿಕೆ ನಮ್ಮನ್ನು ಹಿಡಿದು ನಿಲ್ಲಿಸುತ್ತದೆ. ಕುಟುಂಬ ಮತ್ತು ಶಿಕ್ಷಣದಲ್ಲಿ ನಂಬಿಕೆಯ ಪಾಠ ಮಕ್ಕಳಲ್ಲಿ ಆತ್ಮವಿಶ್ವಾಸವನ್ನು ಬೆಳೆಸುವುದು ಅತ್ಯಂತ ಮುಖ್ಯ. “ನೀನು ಮಾಡಬಹುದು” ಎಂಬ ಒಂದು ಮಾತು, ಮಗುವಿನ ಜೀವನದ ದಿಕ್ಕನ್ನು ಬದಲಾಯಿಸಬಹುದು. ಅದೇ “ನನ್ನಿಂದಾಗದು” ಎಂಬ ಒಂದು ವಾಕ್ಯ, ಅವನ ಮನಸ್ಸಿನಲ್ಲಿ ಶಾಶ್ವತ ಗುರುತು ಮೂಡಿಸಬಹುದು.ಶಿಕ್ಷಕರು, ಪೋಷಕರು, ಹಿರಿಯರು, ಎಲ್ಲರೂ ಮಕ್ಕಳಲ್ಲಿ ಪ್ರಯತ್ನದ ಮೌಲ್ಯವನ್ನು ಕಲಿಸಬೇಕು.  

             ಸಾಧನೆಗಿಂತ ಪ್ರಯತ್ನಕ್ಕೆ ಶ್ಲಾಘನೆ ನೀಡಬೇಕು. ಮಗುವು ಬಿದ್ದು ಎದ್ದಾಗ, ಅದನ್ನು ಗದರಿಸುವುದಕ್ಕಿಂತ, “ಮತ್ತೊಮ್ಮೆ ಪ್ರಯತ್ನಿಸು” ಎಂದು ಪ್ರೋತ್ಸಾಹಿಸಬೇಕು.ಈ ರೀತಿಯ ಪ್ರೋತ್ಸಾಹವು ವ್ಯಕ್ತಿಯೊಳಗೆ ದೃಢ ನಂಬಿಕೆಯನ್ನು ಬೆಳೆಸುತ್ತದೆ. ಸ್ವಯಂ ಸಂಭಾಷಣೆ, ಒಳಗಿನ ಧ್ವನಿ, ನಾವು ದಿನಪೂರ್ತಿ ನಮ್ಮೊಂದಿಗೆ ಮಾತನಾಡುತ್ತಲೇ ಇರುತ್ತೇವೆ.ಆ ಒಳಗಿನ ಮಾತು ಹೇಗಿದೆ? “ನಾನು ವಿಫಲನಾಗಿದ್ದೇನೆ” ಎಂದುಕೊಳ್ಳುತ್ತೇವೆಯೇ?ಅಥವಾ “ಇನ್ನೂ ಕಲಿಯಬೇಕಿದೆ” ಎಂದುಕೊಳ್ಳುತ್ತೇವೆಯೇ? ಈ ಸಣ್ಣ ವ್ಯತ್ಯಾಸವೇ ಜೀವನದ ದೊಡ್ಡ ವ್ಯತ್ಯಾಸ.ಸಕಾರಾತ್ಮಕ ಸ್ವಯಂ ಸಂಭಾಷಣೆ ಆತ್ಮವಿಶ್ವಾಸವನ್ನು ಹೆಚ್ಚಿಸುತ್ತದೆ.ನಕಾರಾತ್ಮಕ ಆಲೋಚನೆಗಳು ನಮ್ಮ ಶಕ್ತಿಯನ್ನು ಕುಗ್ಗಿಸುತ್ತವೆ. ಸಾಧನೆಯ ಸಣ್ಣ ಹೆಜ್ಜೆಗಳು, ದೊಡ್ಡ ಗುರಿಗಳನ್ನು ಇಡುವುದು ಒಳ್ಳೆಯದು. ಆದರೆ ಅವುಗಳನ್ನು ಸಣ್ಣ ಹಂತಗಳಾಗಿ ವಿಭಜಿಸಬೇಕು. ಪ್ರತಿ ದಿನದ ಸಣ್ಣ ಸಾಧನೆಗಳು, ಒಂದು ಪುಟ ಓದುವುದು, ಒಂದು ಕೌಶಲ್ಯ ಅಭ್ಯಾಸ ಮಾಡುವುದು, ಒಂದು ಒಳ್ಳೆಯ ಅಭ್ಯಾಸ ಬೆಳೆಸುವುದು, ಇವೆಲ್ಲವೂ ಸೇರಿ ದೊಡ್ಡ ಬದಲಾವಣೆ ತರುತ್ತವೆ. ನಂಬಿಕೆ ಎಂದರೆ ಒಂದೇ ಬಾರಿ ದೊಡ್ಡ ಜಿಗಿತವಲ್ಲ. ಅದು ಪ್ರತಿದಿನದ ಸಣ್ಣ ಹೆಜ್ಜೆಗಳಲ್ಲಿ ವ್ಯಕ್ತವಾಗುವ ದೃಢತೆ. ನಂಬಿಕೆಯ ಫಲ, ದೃಢ ನಂಬಿಕೆ ಮತ್ತು ನಿರಂತರ ಪರಿಶ್ರಮ ಇದ್ದರೆ, ಅಸಾಧ್ಯವೆನಿಸಿದುದೂ ಸಾಧ್ಯವಾಗುತ್ತದೆ.ಇದು ಕೇವಲ ಪ್ರೇರಣೆಯ ಮಾತಲ್ಲ; ಜೀವನದ ಅನುಭವದಿಂದ ಬಂದ ಸತ್ಯ.ಮಾನವನನ್ನು ಹಿಂದೆ ತಳ್ಳುವುದು ಅಸಾಧ್ಯವಲ್ಲ; ತನ್ನಿಂದ ಆಗದು ಎಂಬ ನಂಬಿಕೆಯ ಕೊರತೆ.  

                 ಜೀವನದಲ್ಲಿ ಸಾಧಿಸಲು ಬಯಸಿದರೆ, ನಂಬಿಕೆ ಮತ್ತು ಪರಿಶ್ರಮ ಇರಲಿ. ಕಷ್ಟಗಳು ಬಂದರೂ ನಿಧಾನವಾಗಿ ಮುಂದೆ ಸಾಗು.ಯಶಸ್ಸು ತಕ್ಷಣ ಬರದೇ ಇರಬಹುದು; ಆದರೆ ಒಂದು ದಿನ ಅದು ನಿನ್ನ ಬಾಗಿಲು ತಟ್ಟುತ್ತದೆ. ಒಳಗಿನ ಶಕ್ತಿಯನ್ನು ಜಾಗೃತಗೊಳಿಸೋಣ, ನಂಬಿಕೆಯೇ ಶಕ್ತಿ. ಅದು ಕಾಣುವುದಿಲ್ಲ, ಆದರೆ ಅನುಭವಿಸಬಹುದು.ಅದು ಕೇಳುವುದಿಲ್ಲ, ಆದರೆ ನಮ್ಮನ್ನು ಮುಂದೆ ನೂಕುತ್ತದೆ.ನಾವು ನಮ್ಮನ್ನು ನಾವು ನಂಬಿದ ಕ್ಷಣದಿಂದಲೇ ಬದಲಾವಣೆ ಆರಂಭವಾಗುತ್ತದೆ. ಪ್ರತಿ ವ್ಯಕ್ತಿಯೊಳಗೂ ಅಪಾರ ಶಕ್ತಿ ಅಡಗಿದೆ. ಅದನ್ನು ಹೊರತೆಗೆದಿಡುವ ಕೀಲಿಕೈ, ಸ್ವನಂಬಿಕೆ.ಈ ದಿನದಿಂದಲೇ ಒಂದು ನಿರ್ಧಾರ ಮಾಡೋಣ; “ನನಗೆ ಸಾಧ್ಯ” ಎಂದುಕೊಂಡು, ಒಂದು ಸಣ್ಣ ಹೆಜ್ಜೆ ಮುಂದೆ ಹಾಕೋಣ. ನಂಬಿಕೆ ನಮ್ಮ ದಾರೀದೀಪವಾಗಲಿ. ಪರಿಶ್ರಮ ನಮ್ಮ ಸಂಗಾತಿಯಾಗಲಿ. ಆಗ ಸಾಧನೆಯ ಶಿಖರಗಳು ಏರುಲು ಸಾಧ್ಯವಾಗುತ್ತದೆ ಎಂದು ಹೇಳಬಹುದು. ನಂಬಿಕೆ ದೀಪವಾದರೆ, ಪರಿಶ್ರಮ ಅದರ ಇಂಧನ; ಯಶಸ್ಸು ಅದರ ಬೆಳಕು.                 

ರುದ್ರಗೌಡ ಚ ಪಾಟೀಲ               

ಸುತಗಟ್ಟಿ , ಬೈಲಹೊಂಗಲ.