ಸಹಕಾರ ಕ್ಷೇತ್ರದ ಪಾತ್ರ ಮಹತ್ತರ: ಹರನಾಳ

ತಾಳಿಕೋಟಿ 19: ಗ್ರಾಮೀಣ ಭಾಗದ ರೈತರನ್ನು ಆರ್ಥಿಕವಾಗಿ ಸಬಲೀಕರಿಸುವಲ್ಲಿ ಸಹಕಾರಿ ಸಂಘಗಳ ಪಾತ್ರ ಮಹತ್ವದ್ದಾಗಿದೆ. ರೈತರೇ ಸಹಕಾರಿ ಸಂಘಗಳ ನಿಜವಾದ ಮಾಲೀಕರಾಗಿದ್ದು, ಸಂಘಗಳ ಬೆಳವಣಿಗೆಯಲ್ಲಿ ಅವರ ಸಹಕಾರ ಅಗತ್ಯ ಎಂದು ವೃತ್ತಿಪರ ನಿರ್ದೇಶಕ ಬಿ.ಎಸ್‌. ಹರನಾಳ ಹೇಳಿದರು. ತಾಲೂಕಿನ ತುಂಬಗಿ ಗ್ರಾಮದ ವಿವಿಧೋದ್ದೇಶ ಪ್ರಾಥಮಿಕ ಗ್ರಾಮೀಣ ಕೃಷಿ ಸಹಕಾರ ಸಂಘದ ವಾರ್ಷಿಕ ಮಹಾಸಭೆಯಲ್ಲಿ ಮುಖ್ಯ ಅತಿಥಿಯಾಗಿ ಭಾಗವಹಿಸಿ ಅವರು ಮಾತನಾಡಿದರು.

ಸಹಕಾರಿ ಸಂಘಗಳ ಮೂಲಕ ಸರ್ಕಾರಗಳು ರೈತರಿಗಾಗಿ ಹಲವು ಯೋಜನೆಗಳನ್ನು ಜಾರಿಗೊಳಿಸುತ್ತಿವೆ. ರೈತರು ಯೋಜನೆಗಳ ಮಾಹಿತಿ ಪಡೆದುಕೊಂಡು ಅವುಗಳ ಸದುಪಯೋಗ ಪಡೆಯಬೇಕು ಎಂದು ಸಲಹೆ ನೀಡಿದರು. ಸಭೆಯ ಅಧ್ಯಕ್ಷತೆ ವಹಿಸಿದ್ದ ಸಂಘದ ಅಧ್ಯಕ್ಷ ಎಂ.ಎಸ್‌. ಬಿರಾದಾರ ಮಾತನಾಡಿ, ಸಂಘದಿಂದ ಸಾಲ ಪಡೆದ ರೈತರು ಸಕಾಲದಲ್ಲಿ ಸಾಲ ಮರುಪಾವತಿ ಮಾಡುವ ಮೂಲಕ ಸಂಘದ ಅಭಿವೃದ್ಧಿಗೆ ಸಹಕರಿಸಬೇಕು ಎಂದರು. ಸಂಘದ ಮುಖ್ಯ ಕಾರ್ಯನಿರ್ವಾಹಕ ಡಿ.ಎ. ತುಂಬಗಿ ವಾರ್ಷಿಕ ವರದಿ ಮಂಡಿಸಿದರು.  

ಸಭೆಯಲ್ಲಿ ಉಪಾಧ್ಯಕ್ಷ ಬಸನಗೌಡ ಸಿಂಗ್ನಳ್ಳಿ, ಸದಸ್ಯರಾದ ಭೀಮನಗೌಡ ಮಂಗ್ಯಾಳ, ಹಣಮಂತ್ರಾಯ ರೆಬಿನಾಳ, ಶಾಂತಗೌಡ ಬಿರಾದಾರ, ಗೌರಮ್ಮ ಬಿ. ಬಿರಾದಾರ, ಲಲಿತಾ ಗು. ಚೌಧರಿ, ಲಾಳೆಮಶಾಕ್ ಕರ್ಜಗಿ, ಶಾಂತಯ್ಯ ಮಠ, ದೇವೇಂದ್ರ ಚಲವಾದಿ, ಪರಶುರಾಮ ನಾಯ್ಕೋಡಿ, ಬಸಪ್ಪ ಸಾಲವಾಡಗಿ, ವಿಡಿಸಿಸಿ ಬ್ಯಾಂಕ್ ಕ್ಷೇತ್ರಾಧಿಕಾರಿ ಆರ್‌.ಎಂ. ಗುರಿಕಾರ ಸೇರಿದಂತೆ ಶೇರುದಾರರು, ಗಣ್ಯರು ಹಾಗೂ ಸಿಬ್ಬಂದಿ ಉಪಸ್ಥಿತರಿದ್ದರು.