ಸ್ಕೌಟ್ಸ್‌ ಮತ್ತು ಗೈಡ್ಸ್‌ ವಿದ್ಯಾರ್ಥಿಗಳಿಗೆ ರಾಜ್ಯ ಪುರಸ್ಕಾರ
ಲೋಕದರ್ಶನ ವರದಿ
ಹಾರೂಗೇರಿ 18 : ಸ್ಕೌಟ್ಸ್‌ ಮತ್ತು ಗೈಡ್ಸ್‌ಗಳು ಶಿಸ್ತು, ಸೇವಾಭಾವ, ನಾಯಕತ್ವ, ಸ್ವಾವಲಂಬನೆ ಹಾಗೂ ದೇಶ ಪ್ರೇಮದಂತಹ ಮೌಲ್ಯಗಳನ್ನು ಬೆಳೆಸುವ ಮೂಲಕ ಸದೃಢ ರಾಷ್ಟ್ರ ನಿರ್ಮಾಣದಲ್ಲಿ ಪ್ರಮುಖ ಪಾತ್ರ ವಹಿಸಿದೆ ಎಂದು ಜನತಾ ಶಿಕ್ಷಣ ಸಂಸ್ಥೆ ಅಧ್ಯಕ್ಷ ಬಿ.ಬಿ.ಕರ್ಣವಾಡಿ ಹೇಳಿದರು. ಸ್ಕೌಟ್ಸ್‌ ಮತ್ತು ಗೈಡ್ಸ್‌ನ 1-2-3 ಸೋಪಾನ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿ ರಾಜ್ಯಪಾಲರಿಂದ ರಾಜ್ಯ ಪುರಸ್ಕಾರ ಪ್ರಶಸ್ತಿ ಪಡೆದ ಸ್ಥಳೀಯ ಜನತಾ ಶಿಕ್ಷಣ ಸಂಸ್ಥೆಯ ಪ್ರಗತಿ ಪ್ರೌಢಶಾಲೆಯ ಮಮ್ಮದ ಭಾಗವಾನ, ವಿಕಾಸ ನಲವಡೆ, ಶ್ರೇಯಸ್ ಕಾಂಬಳೆ ಹಾಗೂ ಸಮರ್ಥ ದಡ್ಡಿ ವಿದ್ಯಾರ್ಥಿಗಳನ್ನು ಸನ್ಮಾನಿಸಿ ಮಾತನಾಡಿದ ಅವರು ವಿದ್ಯಾರ್ಥಿಗಳಲ್ಲಿ ಸಾಮಾಜಿಕ ಹೊಣೆಗಾರಿಕೆ ಮತ್ತು ಸೇವಾ ಮನೋಭಾವ ಬೆಳೆಸುವಲ್ಲಿ ಸ್ಕೌಟ್ಸ್‌ ಮತ್ತು ಗೈಡ್ಸ್‌ಗಳ ಕೊಡುಗೆ ಮಹತ್ವದ್ದಾಗಿದೆ ಎಂದರು.
ಸ್ಕೌಟ್ಸ್‌ ಮಾಸ್ಟರ್ ಎಸ್‌.ಜೆ.ನಲವಡೆ ಮಾತನಾಡಿ ವಿದ್ಯಾರ್ಥಿಗಳು ಸ್ಕೌಟ್ಸ್‌ ಮತ್ತು ಗೈಡ್ಸ್‌ನಲ್ಲಿ ಸಕ್ರೀಯವಾಗಿ ಪಾಲೊಂಡು, ಉತ್ತಮ ಗುಣಗಳನ್ನು ಬೆಳೆಸಿಕೊಳ್ಳುವುದರ ಮೂಲಕ, ಜವಾಬ್ದಾರಿಯುತ ಹಾಗೂ ಆದರ್ಶ ನಾಗರಿಕಾರಿ ಹೊರಹೊಮ್ಮಬೇಕೆಂದು ಹೇಳಿದ ಅವರು ಸ್ಕೌಟ್ಸ್‌ ಮತ್ತು ಗೈಡ್ಸ್‌ ವಿದ್ಯಾರ್ಥಿಗಳಿಗೆ ಸರಕಾರಿ ನೌಕರಿ ಹಾಗೂ ವೃತ್ತಿಪರ ಕೋರ್ಸುಗಳಲ್ಲಿ ಕೃಪಾಂಕ ನೀಡಲಾಗುತ್ತದೆ ಎಂದರು. ಜಾಗೃತಿ ಬ್ಯಾಂಕ್ ನಿವೃತ್ತ ವ್ಯವಸ್ಥಾಪಕ ಬಿ.ಎನ್‌.ಆಲಗೂರ, ಮುಖ್ಯಾಧ್ಯಾಪಕ ಟಿ.ಬಿ.ಸಾಜನೆ, ಕೆ.ಎಸ್‌.ಚೌಗಲಾ, ಸುಭಾಸ ಭರಮರಾವತ, ದೈಹಿಕ ಶಿಕ್ಷಕರಾದ ರವಿ ಹಲಕಿ, ಜೀವನ ಬಾಬಣ್ಣವರ ಉಪಸ್ಥಿತರಿದ್ದರು.
