ಪ್ರಧಾನ ಮಂತ್ರಿ ಕಚೇರಿ ಹೊಸ ಸೇವಾ ತೀರ್ಥಕ್ಕೆ ಸ್ಥಳಾಂತರ

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರು ಶುಕ್ರವಾರ ರೈಸಿನಾ ಬೆಟ್ಟದ ರಾಷ್ಟ್ರಪತಿ ಭವನದ ಬಳಿಯ ವಸಾಹತುಶಾಹಿ ಯುಗದ ಸೌತ್ ಬ್ಲಾಕ್ ಕಟ್ಟಡದಿಂದ ತಮ್ಮ ಹೊಸ ಕಚೇರಿ ಸೇವಾ ತೀರ್ಥಕ್ಕೆ ಸ್ಥಳಾಂತರಗೊಂಡರು. 1931 ರಲ್ಲಿ ಭಾರತದ ಆಧುನಿಕ ರಾಜಧಾನಿಯಾಗಿ ನವದೆಹಲಿಯನ್ನು ಓಪಚಾರಿಕವಾಗಿ ಉದ್ಘಾಟಿಸಿದ 95 ವರ್ಷಗಳನ್ನು ಗುರುತಿಸುವ ದಿನದಂದು - ಫೆಬ್ರವರಿ 13 ರಂದು - ಈ ಬದಲಾವಣೆ ಸಂಭವಿಸಿದೆ. 

ಶುಕ್ರವಾರ, ಪ್ರಧಾನ ಮಂತ್ರಿಗಳು ಕೇಂದ್ರ ಸಚಿವರಾದ ಮನೋಹರ್ ಲಾಲ್ ಮತ್ತು ಜಿತೇಂದ್ರ ಸಿಂಗ್ ಮತ್ತು ಪಿಎಂಒದ ಉನ್ನತ ಅಧಿಕಾರಿಗಳೊಂದಿಗೆ ವಾಹನ ಮೆರವಣಿಗೆಯಲ್ಲಿ ಸೇವಾ ತೀರ್ಥ ಸಂಕೀರ್ಣವನ್ನು ತಲುಪಿದರು ಮತ್ತು ಪ್ರಧಾನ ಮಂತ್ರಿ ಕಚೇರಿ (ಪಿಎಂಒ), ರಾಷ್ಟ್ರೀಯ ಭದ್ರತಾ ಮಂಡಳಿ ಸಚಿವಾಲಯ ಮತ್ತು ಕ್ಯಾಬಿನೆಟ್ ಸಚಿವಾಲಯವನ್ನು ಹೊಂದಿರುವ ಸಂಕೀರ್ಣವನ್ನುಉದ್ಘಾಟಿಸಿದರು. 

ಪ್ರಧಾನಿ ಕಚೇರಿಯಲ್ಲಿ ಗಣೇಶನ ಪ್ರತಿಮೆಗೆ ಮೋದಿ ಮಾಲಾರೆ​‍್ಣ ಮಾಡಿದರು ಮತ್ತು ಮಹಿಳೆಯರು, ರೈತರು, ಯುವಕರು ಮತ್ತು ದುರ್ಬಲ ನಾಗರಿಕರ ಕಲ್ಯಾಣವನ್ನು ಗುರಿಯಾಗಿಟ್ಟುಕೊಂಡು ಪ್ರಮುಖ ನಿರ್ಧಾರಗಳನ್ನು ತೆಗೆದುಕೊಂಡರು. ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್ ದೋವಲ್, ಪ್ರಧಾನಿ ಕಾರ್ಯಾಲಯದ ರಾಜ್ಯ ಸಚಿವ ಜಿತೇಂದ್ರ ಸಿಂಗ್ ಮತ್ತು ಪ್ರಧಾನ ಕಾರ್ಯದರ್ಶಿಗಳಾದ ಪಿ ಕೆ ಮಿಶ್ರಾ ಮತ್ತು ಶಕ್ತಿಕಾಂತ ದಾಸ್ ಸೇರಿದಂತೆ ಉನ್ನತ ಅಧಿಕಾರಿಗಳ ಸಮ್ಮುಖದಲ್ಲಿ, ಪ್ರಧಾನ ಮಂತ್ರಿಗಳು ಪ್ರತಿ ನಾಗರಿಕರಿಗೂ ಜೀವ ಉಳಿಸುವ ರಕ್ಷಣೆಯನ್ನು ವಿಸ್ತರಿಸಲು ಮತ್ತು ಲಕ್ಷಪತಿ ದೀದಿಗಳ ಸಂಖ್ಯೆಯನ್ನು ಆರು ಕೋಟಿಗೆ ದ್ವಿಗುಣಗೊಳಿಸಲು ಪಿಎಂ ರಹತ್ ಯೋಜನೆಯನ್ನು ಪ್ರಾರಂಭಿಸಲು ಅನುಮೋದನೆ ನೀಡುವ ಫೈಲ್ಗಳಿಗೆ ಸಹಿ ಹಾಕಿದರು. 

ಪಿಎಂ ರಹತ್ ಉಪಕ್ರಮದ ಅಡಿಯಲ್ಲಿ, ಅಪಘಾತಕ್ಕೊಳಗಾದವರಿಗೆ 1.5 ಲಕ್ಷ ರೂ.ಗಳವರೆಗೆ ನಗದು ರಹಿತ ಚಿಕಿತ್ಸೆ ದೊರೆಯಲಿದ್ದು, ತಕ್ಷಣದ ವೈದ್ಯಕೀಯ ಸಹಾಯದ ಕೊರತೆಯಿಂದಾಗಿ ಯಾವುದೇ ಜೀವ ನಷ್ಟವಾಗದಂತೆ ನೋಡಿಕೊಳ್ಳಲಾಗುತ್ತದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಸರ್ಕಾರವು ಮಾರ್ಚ್‌ 2027 ರ ಮೂಲ ಗಡುವಿಗಿಂತ ಒಂದು ವರ್ಷಕ್ಕೂ ಮುಂಚಿತವಾಗಿ ಮೂರು ಕೋಟಿ ಲಕ್ಷಪತಿ ದೀದಿಗಳ ಮೈಲಿಗಲ್ಲನ್ನು ದಾಟಿದೆ.