ಅಯೋಧ್ಯೆಯಲ್ಲಿ 10ನೇ ದೀಪೋತ್ಸವ: ಮನೆ ಮನೆಗಳಲ್ಲಿ ದೀಪ ಬೆಳಗಿಸಲು ಸಿಎಂ ಯೋಗಿ ಆದಿತ್ಯನಾಥ ಕರೆ
"ಶ್ರೀರಾಮ ಜನ್ಮಭೂಮಿಯಲ್ಲಿ ದೀಪಗಳು ಬೆಳಗುವಾಗ, ನೀವೂ ನಿಮ್ಮ ಮನೆ ಮತ್ತು ಅಂಗಳಗಳಲ್ಲಿ ದೀಪಗಳನ್ನು ಬೆಳಗಿಸಿ" ಎಂದು ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ ಮನವಿ ಮಾಡಿದ್ದಾರೆ. ದೀಪಾವಳಿ ಹಬ್ಬವು ನಂಬಿಕೆ, ಸಾಂಸ್ಕೃತಿಕ ಹೆಮ್ಮೆ ಹಾಗೂ ಕತ್ತಲೆಯ ಮೇಲೆ ಬೆಳಕಿನ ವಿಜಯದ ಸಂಕೇತವಾಗಿದೆ ಎಂದು ಅವರು ಬಣ್ಣಿಸಿದ್ದಾರೆ.
ಪವಿತ್ರ ಸರಯೂ ನದಿಯ ದಡದಲ್ಲಿರುವ ಅಯೋಧ್ಯಾ ನಗರವು ಭವ್ಯ ದೀಪೋತ್ಸವಕ್ಕೆ ಸಜ್ಜಾಗಿದ್ದು, ಲಕ್ಷಾಂತರ ಮಣ್ಣಿನ ದೀಪಗಳಿಂದ ಇಡೀ ನಗರವನ್ನು ಬೆಳಗಿಸಲಾಗುತ್ತಿದೆ. ಈ ಆಚರಣೆಯು ಭಕ್ತಿ, ಧರ್ಮ ಮತ್ತು ಭಾರತದ ಶ್ರೀಮಂತ ಸಾಂಸ್ಕೃತಿಕ ಪರಂಪರೆಯನ್ನು ಪ್ರತಿಬಿಂಬಿಸುತ್ತದೆ ಎಂದು ತಿಳಿಸಿದ್ದಾರೆ.
ದೀಪೋತ್ಸವದಲ್ಲಿ ಭಾಗವಹಿಸಲು ಆಗಮಿಸುತ್ತಿರುವ ಉಪರಾಷ್ಟ್ರಪತಿ, ವಿವಿಧ ದೇಶಗಳ ರಾಯಭಾರಿಗಳು, ಗಣ್ಯರು, ಸಂತರು ಹಾಗೂ ಭಕ್ತರನ್ನು ಸ್ವಾಗತಿಸಿದ ಮುಖ್ಯಮಂತ್ರಿ, ಅವರ ಉಪಸ್ಥಿತಿಯು ಈ ಮಹೋತ್ಸವವನ್ನು ಐತಿಹಾಸಿಕ ಮತ್ತು ಸ್ಮರಣೀಯವಾಗಿಸಲಿದೆ ಎಂದು ಹೇಳಿದ್ದಾರೆ.
2017ರಲ್ಲಿ ಆರಂಭವಾದ ಅಯೋಧ್ಯೆಯ ದೀಪೋತ್ಸವವು ಇಂದು ಜಾಗತಿಕ ಮಟ್ಟದಲ್ಲಿ ಭಾರತದ ಸಾಂಸ್ಕೃತಿಕ ವೈಭವವನ್ನು ಸಾರುವ ಪ್ರಮುಖ ಉತ್ಸವವಾಗಿ ಬೆಳೆದಿದೆ. ಈ ಆಚರಣೆಯು ಕೇವಲ ದೀಪಗಳನ್ನು ಬೆಳಗಿಸುವುದಕ್ಕೆ ಸೀಮಿತವಾಗದೆ, ಸಾಂಸ್ಕೃತಿಕ ಪರಂಪರೆಯ ಪುನರುಜ್ಜೀವನ, ಸಾಮಾಜಿಕ ಸಾಮರಸ್ಯ ಹಾಗೂ ಸ್ಥಳೀಯ ಸ್ವಾವಲಂಬನೆಯ ಸಂಕೇತವಾಗಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.
ದೀಪವು ಕೇವಲ ಮಣ್ಣಿನ ಪಾತ್ರೆಯಲ್ಲ, ಅದು ಜಾಗೃತ ಪ್ರಜ್ಞೆಯ ಸಂಕೇತವಾಗಿದೆ. ಒಂದು ಸಣ್ಣ ದೀಪವೂ ಕತ್ತಲೆಯನ್ನು ದೂರ ಮಾಡಿ ಭರವಸೆಯ ಬೆಳಕನ್ನು ಹರಡಬಲ್ಲದು ಎಂದು ಯೋಗಿ ಆದಿತ್ಯನಾಥ ಹೇಳಿದ್ದಾರೆ.
ಭಗವಾನ್ ಶ್ರೀರಾಮನ ಆದರ್ಶಗಳನ್ನು ಪ್ರತಿಯೊಬ್ಬರೂ ತಮ್ಮ ಜೀವನದಲ್ಲಿ ಅಳವಡಿಸಿಕೊಂಡು, ಸಮಾನತೆ, ಸೇವೆ ಮತ್ತು ಸರ್ವರ ಅಭಿವೃದ್ಧಿಗೆ ಆದ್ಯತೆ ನೀಡುವ ಸಮಾಜ ನಿರ್ಮಾಣಕ್ಕೆ ಶ್ರಮಿಸಬೇಕು ಎಂದು ಕರೆ ನೀಡಿದ್ದಾರೆ.
ಅಯೋಧ್ಯೆಯ 10ನೇ ದೀಪೋತ್ಸವವು ದೇಶಾದ್ಯಂತ ಏಕತೆ, ಭಕ್ತಿ, ಸಾಮಾಜಿಕ ಸಾಮರಸ್ಯ ಹಾಗೂ ಸಾಂಸ್ಕೃತಿಕ ಹೆಮ್ಮೆಯನ್ನು ಮತ್ತಷ್ಟು ಬಲಪಡಿಸಲಿ ಎಂದು ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ ಆಶಿಸಿದ್ದಾರೆ.
