ತುಂಬಿದ ಘಟಪ್ರಭಾ ನದಿಗೆ ನೀರು: ಢವಳೇಶ್ವರ ಸೇತುವೆ ಮುಳುಗಡೆ

ಮಹಾಲಿಂಗಪುರ 20: ಘಟಪ್ರಭಾ ನದಿಗೆ ಅಪಾರ ಪ್ರಮಾಣದ ನೀರು ಹರಿದು ಬರುತ್ತಿರುವುದರಿಂದ ನದಿಗೆ ಅಡ್ಡಲಾಗಿ ನಿರ್ಮಿಸಲಾದ ಸಮೀಪದ ಢವಳೇಶ್ವರ ಸೇತುವೆ ಮಂಗಳವಾರ ಸಂಜೆ ಜಲಾವೃತಗೊಂಡಿದೆ. 

ಮಹಾರಾಷ್ಟ್ರದ ಅಂಬೋಲಿ ಘಟ್ಟ ಪ್ರದೇಶದಲ್ಲಿ ವ್ಯಾಪಕ ಮಳೆಯಾಗುತ್ತಿದ್ದು, ಘಟಪ್ರಭಾ ನದಿ ಮೂಲಕ ಹಿಡಕಲ್ ಜಲಾಶಯಕ್ಕೆ ಅಪಾರ ಪ್ರಮಾಣದಲ್ಲಿ ನೀರು ಹರಿದು ಬರಲಾರಂಭಿಸಿದೆ. 

ನೀರಿನ ತೀವ್ರತೆ ಹಿರಣ್ಯಕೇಶಿ 56220 ಕ್ಯೂಸೆಕ್ಸ್‌ ಒಳ ಹರಿವು, ಮಾಕಂರ್ಡೆಯ 6900 ಕ್ಯೂಸೆಕ್ಸ್‌ ಎಲ್ಲಾ ಸೇರಿ ಘಟಪ್ರಭಾ ನದಿ ನೀರಿನ ಹರಿವು 63120 ಕ್ಯೂಸೆಕ್ಸ್‌ ಹರಿಯುತ್ತಿದ್ದು ಅಪಾಯಮಟ್ಟವನ್ನು ತೋರಿಸುತ್ತಿದೆ.ಢವಳೇಶ್ವರ ಸೇತುವೆ ಸೇರಿದಂತೆ ನಂದಗಾವ-ಅವರಾದಿ, ಸೇತುವೆಗಳು ಜಲಾವೃತಗೊಂಡಿವೆ. ಸೇತುವೆ ಸಂಪರ್ಕ ಹೊಂದಿದ ಹತ್ತಾರು ಗ್ರಾಮಗಳ ಗ್ರಾಮಸ್ಥರು ಪ್ರವಾಹ ಭೀತಿ ಎದುರಿಸುತ್ತಿದ್ದಾರೆ. 

ಪ್ರವಾಹಕ್ಕೆ ತುತ್ತಾಗಬಹುದಾದ ಗ್ರಾಮಸ್ಥರು ಸುರಕ್ಷಿತ ಸ್ಥಳಕ್ಕೆ ತೆರಳಬೇಕು ಎಂದು ಅಧಿಕಾರಿಗಳು ಈಗಾಗಲೇ ಸೂಚನೆ ನೀಡಿದ್ದಾರೆ.