ಸಡಗರ ಸಂಭ್ರಮದಿಂದ ವಾಸವಿ ದೇವಿ ಗಂಗೆಸ್ಥಳ ಮೆರವಣಿಗೆ

ಲೋಕದರ್ಶನ ವರದಿ

ಕಂಪ್ಲಿ 26:  ಸಮೀಪದ ಚಿಕ್ಕಜಂತಕಲ್ ಗ್ರಾಮದಲ್ಲಿ ಆರ್ಯ ವೈಶ್ಯ ಸಮಾಜ ಬಾಂಧವರು ಅರಾಧ್ಯ ದೇವತೆ ಶ್ರೀ ವಾಸವಿ ಜಯಂತ್ಯೋತ್ಸವ ಪ್ರಯುಕ್ತ ದೇವಿಯ ಗಂಗೆಸ್ಥಳ ಹಾಗೂ ಉತ್ಸವ ಮೆರವಣಿಗೆ ಶ್ರದ್ಧಾ-ಭಕ್ತಿ, ಸಂಭ್ರಮ ಹಾಗೂ ಸಡಗರದಿಂದ ಭಾನುವಾರ ಜರುಗಿತು. ಇಲ್ಲಿನ ತುಂಗಭದ್ರ ನದಿ ತಟದಲ್ಲಿ ಗಂಗೆಪೂಜೆ ಶ್ರದ್ದೆಯಿಂದ ನೆರವೇರಿಸಿದ ನಂತರ ಆರಂಭಗೊಂಡ ಗಂಗೆಸ್ಥಳ ಮೆರವಣಿಗೆ ಗ್ರಾಮದ ಪ್ರಮುಖ ರಸ್ತೆಗಳ ಮೂಲಕ ಗ್ರಾಮ ದೇವತೆ ಶ್ರೀ ದ್ಯಾವಮ್ಮ ದೇವಸ್ಥಾನ, ಬಸವೇಶ್ವರ ದೇವಸ್ಥಾನದ ಮೂಲಕ ಸಂಚರಿಸಿ, ಕನ್ನಿಕಾ ಪರಮೇಶ್ವರಿ ದೇವಸ್ಥಾನದ ಸಮುದಾಯ ಭವನ ಬಳಿ ಸಂಪನ್ನಗೊಂಡಿತು.

ಈ ಮೆರವಣಿಗೆಯಲ್ಲಿ ಮಹಿಳೆಯರ ಕುಂಭ, ಕಳಸ, ತಾಷಾರಾಂಡೋಲ್, ಮಂಗಳವಾದ್ಯ ಸೇರಿ ವಿವಿಧ ಕಲಾ ಪ್ರಕಾರಗಳು ಮೆರಗು ನೀಡಿದವು. ನಂತರ ವಿಶೇಷ ಪೂಜೆ, ಪಂಚಾಮೃತ ಅಭಿಷೇಕ ಸೇರಿದಂತೆ ಧಾರ್ಮಿಕ ಕಾರ್ಯಕ್ರಮಗಳು ನೆರವೇರಿದವು. ನಂತರ ಪ್ರಸಾದದ ವ್ಯವಸ್ಥೆ ಕಲ್ಪಿಸಲಾಗಿತ್ತು. ಆರ್ಯವೈಶ್ಯ ಸಮಾಜದ ಗ್ರಾಮ ಘಟಕ ಅಧ್ಯಕ್ಷ ಪಾನಗಂಟಿ ರಾಮಮೂರ್ತಿ ಚಾಲನೆ ನೀಡಿ ಮಾತನಾಡಿ, ವಾಸವಿ ದೇವಿಯ ಆರಾಧನೆಯಿಂದ ಮಾನಸಿಕ ನೆಮ್ಮದಿ ಜತೆಗೆ ಜೀವನೋಲ್ಲಾಸಕ್ಕೆ ನಾಂದಿಯಾಗಲಿದೆ ಎಂದರು.

ನಂತರ ಯುವ ಮುಖಂಡ ಪಾನಗಂಟಿ ರಾಘವೇಂದ್ರ ಮಾತನಾಡಿ, ದೇವಿಯ ಆರಾಧನೆಯೇ ನಮ್ಮ ಬದುಕಿಗೆ ದಾರಿ ದೀಪ, ದೇವಿಯ ಆಶೀರ್ವಾದಿಂದ ಜೀವನ ಪಾವನವಾಗಿದೆ ಎಂದರು.ಈ ಸಂದರ್ಭದಲ್ಲಿ ಆರ್ಯವೈಶ್ಯ ಸಮಾಜದ ಉಪಾಧ್ಯಕ್ಷ ಸೌದ್ರಿ ನಾಗರಾಜ, ಮುಖಂಡರಾದ ಬದ್ರಿನಾಥ, ಸೌದ್ರಿ ಶ್ರೀನಿವಾಸ, ಸೌದ್ರಿ ಶೇಖರ​‍್ಪ, ನವೀನ್‌ಚಂದ್ರ, ಅರುಣಾ ರಾಘವೇಂದ್ರ, ಅಶ್ವರ್ಯ ಸೌದ್ರಿ, ಸಂಗೀತ ಸೌದ್ರಿ, ಪದ್ಮಾ ಸೌದ್ರಿ, ಸುರೇಖಾ ಪಾನಗಂಟಿ, ಮಹಿಳೆಯರು, ಯುವಕರು, ಮಕ್ಕಳು ಪಾಲ್ಗೊಂಡಿದ್ದರು.