ಮಕ್ಕಳಿಗಾಗಿಯೂ ವಿಶೇಷ ಸಿನಿಮಾಗಳನ್ನು ನಿರ್ಮಿಸುವುದು ಮುಖ್ಯ: ರಸಿಕಾ ದುಗ್ಗಲ್
ಮುಂಬೈ, ಅ. 23 : ಮಕ್ಕಳಿಗಾಗಿ ವಿಶೇಷವಾಗಿ ರೂಪಿಸುವ ಸಿನಿಮಾಗಳ ಸಂಖ್ಯೆ ಹೆಚ್ಚಾಗಬೇಕು ಎಂದು ನಟಿ ರಸಿಕಾ ದುಗ್ಗಲ್ ಅಭಿಪ್ರಾಯಪಟ್ಟಿದ್ದಾರೆ. ಸಿನಿಮಾಗಳು ಮಕ್ಕಳನ್ನು ಮನರಂಜಿಸುವುದರ ಜೊತೆಗೆ ಅವರಲ್ಲಿ ಕುತೂಹಲವನ್ನು ಬೆಳೆಸಬೇಕು ಹಾಗೂ ಸುತ್ತಮುತ್ತಲಿನ ಜಗತ್ತನ್ನು ಅರ್ಥಮಾಡಿಕೊಳ್ಳಲು ಪ್ರೇರೇಪಿಸಬೇಕು ಎಂದು ಅವರು ಹೇಳಿದ್ದಾರೆ.
ತಮ್ಮ ಮುಂಬರುವ ಲಿಟಲ್ ಥಾಮಸ್ ಚಿತ್ರದ ಬಿಡುಗಡೆಗೆ ಮುನ್ನ ಮಾತನಾಡಿದ ರಸಿಕಾ ದುಗ್ಗಲ್, ಮಕ್ಕಳಿಗಾಗಿ ಇಂತಹ ಕಥೆಗಳನ್ನು ರೂಪಿಸುವ ಅಗತ್ಯವಿದೆ. ಇವು ಮಕ್ಕಳನ್ನು ಮನರಂಜಿಸುವುದರ ಜೊತೆಗೆ ಅವರ ಕುತೂಹಲವನ್ನು ಉತ್ತೇಜಿಸಿ, ಜಗತ್ತನ್ನು ಅರ್ಥಮಾಡಿಕೊಳ್ಳಲು ಅವಕಾಶ ಕಲ್ಪಿಸಬೇಕು ಎಂದು ಹೇಳಿದರು.
ಕೌಶಲ್ ಓಜಾ ನಿರ್ದೇಶನದ ಲಿಟಲ್ ಥಾಮಸ್ ಚಿತ್ರವು ಮಕ್ಕಳಲ್ಲಿ ಕುತೂಹಲ ಹೊಂದಿರುವ ಬಾಲಕನ ಕಥೆಯನ್ನು ಒಳಗೊಂಡಿದೆ. ಶಿಶುಗಳು ಎಲ್ಲಿಂದ ಬರುತ್ತಾರೆ ಎಂಬುದನ್ನು ತಿಳಿದುಕೊಳ್ಳಲು ಬಯಸುವ ಆತ, ತನಗೊಬ್ಬ ಸಹೋದರ ಅಥವಾ ಸಹೋದರಿ ಇರಬೇಕೆಂದು ಹಂಬಲಿಸುತ್ತಾನೆ. 41 ವರ್ಷದ ರಸಿಕಾ ದುಗ್ಗಲ್ ಚಿತ್ರದಲ್ಲಿ ಜೆಸ್ಸಿ ಮಿರಾಂಡಾ ಪಾತ್ರದಲ್ಲಿ ನಟಿಸಿದ್ದಾರೆ.
ಮಕ್ಕಳ ಸಿನಿಮಾಗಳ ಮಹತ್ವದ ಕುರಿತು ಮಾತನಾಡಿದ ಮಿರ್ಜಾಪುರ ಖ್ಯಾತಿಯ ನಟಿ, "ಸಿನಿಮಾ ನಮ್ಮ ಜಗತ್ತನ್ನು ವಿಸ್ತರಿಸುವ ಮತ್ತು ಕಲ್ಪನೆಗಳಿಗೆ ಹೊಸ ರೆಕ್ಕೆಗಳನ್ನು ನೀಡುವ ಅದ್ಭುತ ಮಾಧ್ಯಮವಾಗಿದೆ. ವಯಸ್ಕರಾದ ಬಳಿಕ ನಮ್ಮಲ್ಲಿ ಮೂಡುವ ಅನೇಕ ಆಲೋಚನೆಗಳು ಮತ್ತು ವಿಚಾರಗಳ ಮೂಲ ನಾವು ಬಾಲ್ಯದಲ್ಲಿ ನೋಡಿದ ಸಿನಿಮಾಗಳಲ್ಲಿರುತ್ತವೆ. ಆದ್ದರಿಂದ ಮಕ್ಕಳು ತಮ್ಮನ್ನು ತಾವು ಗುರುತಿಸಿಕೊಳ್ಳಬಹುದಾದ, ಅವರ ಕುತೂಹಲವನ್ನು ಅರ್ಥಮಾಡಿಕೊಂಡು ಅದನ್ನು ಉತ್ತೇಜಿಸುವ ಸಿನಿಮಾಗಳ ಅಗತ್ಯವಿದೆ. ಅವರ ಕುತೂಹಲವನ್ನು ನಿರ್ಲಕ್ಷಿಸಬಾರದು" ಎಂದು ಹೇಳಿದರು.
ಮಕ್ಕಳ ಸಿನಿಮಾಗಳು ಮನರಂಜನೆಯ ಜೊತೆಗೆ ಬೋಧನೆಯ ರೂಪ ಪಡೆಯದೆ, ಪ್ರಮುಖ ಸಂದೇಶಗಳನ್ನು ಪರಿಣಾಮಕಾರಿಯಾಗಿ ತಲುಪಿಸಬಹುದು ಎಂದು ಅವರು ಅಭಿಪ್ರಾಯಪಟ್ಟರು.
ಮಕ್ಕಳು ಆಸಕ್ತಿಯಿಂದ ವೀಕ್ಷಿಸುವ ಮತ್ತು ಅವರ ಕಲ್ಪನಾಶಕ್ತಿಗೆ ಹೊಸ ದಿಕ್ಕುಗಳನ್ನು ತೆರೆದಿಡುವ ಕಥೆಗಳನ್ನು ರೂಪಿಸಲು ಹೆಚ್ಚಿನ ಚಿತ್ರನಿರ್ಮಾಪಕರು ಮುಂದಾಗಬೇಕು ಎಂಬ ಆಶಯವನ್ನು ರಸಿಕಾ ದುಗ್ಗಲ್ ವ್ಯಕ್ತಪಡಿಸಿದರು.
