ಅನುದಾನರಹಿತ ಶಾಲೆಗಳ ಒಕ್ಕೂಟ ರಚನೆ; ನೂತನ ಲೋಗೋ ಬಿಡುಗಡೆ ಹಾಗೂ ಪದಾಧಿಕಾರಿಗಳಿಗೆ ಸನ್ಮಾನ

ಲೋಕದರ್ಶನ ವರದಿ 

       ಶಿಗ್ಗಾವಿ: ತಾಲೂಕಿನ ಅನುದಾನರಹಿತ ಶಾಲೆಗಳ ಶೈಕ್ಷಣಿಕ ಹಿತರಕ್ಷಣೆ ಹಾಗೂ ಶೈಕ್ಷಣಿಕ ಪ್ರಗತಿಯ ಉದ್ದೇಶದಿಂದ ಶಿಗ್ಗಾವಿ ತಾಲೂಕು ಅನುದಾನರಹಿತ ಶಾಲೆಗಳ ಒಕ್ಕೂಟ'ವನ್ನು ಆಪೂಸ (ಂಕಗಖ) ಹೆಸರಿನಲ್ಲಿ ನೂತನವಾಗಿ ರಚಿಸಲಾಯಿತು. 

ಈ ಸಂದರ್ಭದಲ್ಲಿ ಶ್ರೀ ವಿರಕ್ತಮಠದ ಪೂಜ್ಯ ಸಂಗನಬಸವ ಮಹಾಸ್ವಾಮೀಜಿಯವರು ಒಕ್ಕೂಟದ ನೂತನ ಅಧಿಕೃತ ಲೋಗೋವನ್ನು ಅನಾವರಣಗೊಳಿಸಿ, ಆಯ್ಕೆಯಾದ ನೂತನ ಪದಾಧಿಕಾರಿಗಳನ್ನು ಸನ್ಮಾನಿಸಿ ಮಾತನಾಡಿ, ಪ್ರಸ್ತುತ ಶೈಕ್ಷಣಿಕ ದಿನಗಳಲ್ಲಿ ಅನುದಾನರಹಿತ ಶಾಲೆಗಳು ಗ್ರಾಮೀಣ ಹಾಗೂ ನಗರ ಪ್ರದೇಶದ ಮಕ್ಕಳಿಗೆ ಗುಣಮಟ್ಟದ ಶಿಕ್ಷಣ ನೀಡುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿವೆ. ತಾಲೂಕಿನ ಎಲ್ಲಾ ಅನುದಾನರಹಿತ ಶಾಲೆಗಳು ಒಂದಾಗಿ ಒಕ್ಕೂಟವನ್ನು ರಚಿಸಿಕೊಂಡಿರುವುದು ಶ್ಲಾಘನೀಯ. ಈ ಒಕ್ಕೂಟವು ಶೈಕ್ಷಣಿಕ ಗುಣಮಟ್ಟ ಹೆಚ್ಚಿಸಲು, ಮಕ್ಕಳ ಸವಾಂರ್ಗೀಣ ವಿಕಾಸಕ್ಕೆ ಶ್ರಮಿಸಲು ಮತ್ತು ಶಾಲೆಗಳ ಸಮಸ್ಯೆಗಳಿಗೆ ಧ್ವನಿಯಾಗಲು ಶ್ರಮಿಸಲಿ ಎಂದು ಹಾರೈಸಿದರು. 

ನೂತನ ಅಧ್ಯಕ್ಷರಾಗಿ ಆಯ್ಕೆಯಾದ ಬಸರೆಡ್ಡಿ ಬಿ.ಎನ್‌. ಮಾತನಾಡಿ, ತಾಲೂಕಿನ ಎಲ್ಲಾ ಅನುದಾನರಹಿತ ಶಾಲೆಗಳ ನಡುವೆ ಪರಸ್ಪರ ಸಹಕಾರ ಹಾಗೂ ಒಗ್ಗಟ್ಟು ಮೂಡಿಸುವುದು ಈ ಒಕ್ಕೂಟದ ಮುಖ್ಯ ಉದ್ದೇಶವಾಗಿದೆ. ಶಾಲೆಗಳು ಎದುರಿಸುತ್ತಿರುವ ಮೂಲಭೂತ ಹಾಗೂ ಆಡಳಿತಾತ್ಮಕ ಸವಾಲುಗಳನ್ನು ಸರ್ಕಾರದ ಗಮನಕ್ಕೆ ತಂದು ಪರಿಹರಿಸಲು ಒಕ್ಕೂಟ ಶ್ರಮಿಸಲಿದೆ. ಶೈಕ್ಷಣಿಕ ಸುಧಾರಣೆ ಹಾಗೂ ಶಿಕ್ಷಣ ಸಂಸ್ಥೆಗಳ ಹಿತರಕ್ಷಣೆಗೆ ನಮ್ಮ ಪದಾಧಿಕಾರಿಗಳ ತಂಡ ಬದ್ಧವಾಗಿ ಕೆಲಸ ಮಾಡಲಿದೆ ಎಂದು ತಿಳಿಸಿದರು.   

ಸಭೆಯಲ್ಲಿ ಉಪಾಧ್ಯಕ್ಷರನ್ನಾಗಿ ಈರನಗೌಡ ದೊಡ್ಡಗೌಡರ ಕಾರ್ಯದರ್ಶಿಯಾಗಿ ಡಾಽ ಶಿವು ಹಾವೇರಿ ಸಹ ಕಾರ್ಯದರ್ಶಿಯಾಗಿ ವಿಶ್ವೇಶ್ವರಯ್ಯ ಹಿರೇಮಠ, ಖಜಾಂಚಿಯಾಗಿ ರಾಘವೇಂದ್ರ ಬೇವಿನಮರದ ಅವರನ್ನು ಆಯ್ಕೆ ಮಾಡಲಾಯಿತು. 

ಈ ಸಂದರ್ಭದಲ್ಲಿ ಡಾಽ ಆರ್‌.ಎಸ್‌.ಅರಳಲೆಮಠ, ಬಸವರಾಜ ಬೆಟಗೇರಿ, ವಿರೇಶ ಸೊಬರದ, ಅರುಣಾ ದೇಶಪಾಂಡೆ, ವಿ.ಎಸ್‌. ಪಾಟೀಲ, ಶಿವಬಸವಸ್ವಮಿಗಳು, ಜಿ.ಎಸ್‌.ದೇಸಾಯಿ, ಸುರೇಶ ಎಂ.ಕೆ, ಬಾಗೂರ ಸರ್, ಆರ್‌.ಎಸ್‌.ಪಲ್ಹಾದವರ, ದೇವರಾಜ ಸುಣಗಾರ, ರಮೇಶ ಗುಡಿಮನಿ ಇತರರಿದ್ದರು.