ಸ್ಪೇನ್‌ನ ಟೊಲೆಡೊ ಪ್ರಾಂತ್ಯದಲ್ಲಿ ಎರಡು ರೈಲುಗಳ ನಡುವೆ ಭೀಕರ ಡಿಕ್ಕಿ: 30 ಮಂದಿ ಸಾವು, 100ಕ್ಕೂ ಹೆಚ್ಚು ಜನರಿಗೆ ಗಾಯ
ಹಾನಿಗೊಳಗಾದ ರೈಲು ಬೋಗಿಗಳ ಅವಶೇಷಗಳಡಿ ಸಿಲುಕಿರುವವರಿಗಾಗಿ ರಕ್ಷಣಾ ಸಿಬ್ಬಂದಿ ತೀವ್ರ ಶೋಧ ಕಾರ್ಯ ನಡೆಸುತ್ತಿದ್ದು, ಸಾವಿನ ಸಂಖ್ಯೆ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಮ್ಯಾಡ್ರಿಡ್ ಪ್ರದೇಶವನ್ನು ದಕ್ಷಿಣ ಸ್ಪೇನ್‌ನ ಸೆವಿಲ್ಲಾ ನಗರಕ್ಕೆ ಸಂಪರ್ಕಿಸುವ ಹೈಸ್ಪೀಡ್ ರೈಲು ಮಾರ್ಗದಲ್ಲಿ ಸ್ಥಳೀಯ ಕಾಲಮಾನ ಬುಧವಾರ ಬೆಳಗ್ಗೆ ಸುಮಾರು 8.45ಕ್ಕೆ ಈ ಅಪಘಾತ ಸಂಭವಿಸಿದೆ.
ಮಾಧ್ಯಮ ವರದಿಗಳ ಪ್ರಕಾರ, ಖಾಸಗಿ ರೈಲ್ವೆ ಕಂಪನಿ ಇರಿಯೊ (Iryo) ನಿರ್ವಹಿಸುತ್ತಿದ್ದ ಪ್ರಯಾಣಿಕ ರೈಲು ನಿಂತಿದ್ದಾಗ ಅಥವಾ ನಿಧಾನಗತಿಯಲ್ಲಿ ಚಲಿಸುತ್ತಿದ್ದಾಗ, ಸರ್ಕಾರಿ ಸ್ವಾಮ್ಯದ ರೈಲ್ವೆ ಕಂಪನಿ ರೆನ್ಫೆ (Renfe) ನಿರ್ವಹಿಸುತ್ತಿದ್ದ ಎವಿಇ ಹೈಸ್ಪೀಡ್ ರೈಲು ಅದಕ್ಕೆ ಡಿಕ್ಕಿ ಹೊಡೆದಿದೆ.
ಡಿಕ್ಕಿಯ ಪರಿಣಾಮ ರೆನ್ಫೆ ರೈಲಿನ ಒಂದು ಭಾಗ ಹಳಿ ತಪ್ಪಿದ್ದು, ಇರಿಯೊ ರೈಲಿನ ಹಲವು ಬೋಗಿಗಳು ಹಳಿ ತಪ್ಪಿವೆ.
ಎರಡೂ ರೈಲುಗಳಲ್ಲಿ ನೂರಾರು ಪ್ರಯಾಣಿಕರು ಪ್ರಯಾಣಿಸುತ್ತಿದ್ದರು. ಒಂದು ರೈಲಿನಲ್ಲಿ 146 ಪ್ರಯಾಣಿಕರು ಹಾಗೂ ಒಂದು ಮಗು ಇದ್ದರೆ, ಮತ್ತೊಂದು ರೈಲಿನಲ್ಲಿ 397 ಪ್ರಯಾಣಿಕರಿದ್ದರು ಎಂದು ಪ್ರಾದೇಶಿಕ ಸರ್ಕಾರದ ವಕ್ತಾರೆ ಎಸ್ತರ್ ಪಡಿಲ್ಲಾ ತಿಳಿಸಿದ್ದಾರೆ.
ಮಧ್ಯ ಸ್ಪೇನ್‌ನ ಉರ್ಡಾ ಸಮೀಪದ ಅಪಘಾತ ಸ್ಥಳಕ್ಕೆ ಅಗ್ನಿಶಾಮಕ ವಾಹನಗಳು, ಆಂಬ್ಯುಲೆನ್ಸ್‌ಗಳು ಹಾಗೂ ಪೊಲೀಸ್ ವಾಹನಗಳು ಸೇರಿದಂತೆ ಹತ್ತಾರು ತುರ್ತು ಸೇವಾ ವಾಹನಗಳನ್ನು ನಿಯೋಜಿಸಲಾಗಿದೆ. ರಕ್ಷಣಾ ಕಾರ್ಯಾಚರಣೆಗೆ ಕನಿಷ್ಠ ಮೂರು ಹೆಲಿಕಾಪ್ಟರ್‌ಗಳನ್ನೂ ಬಳಸಿಕೊಳ್ಳಲಾಗಿದೆ.
ಕೆಲವು ಪ್ರಯಾಣಿಕರನ್ನು ಬಸ್‌ಗಳ ಮೂಲಕ ಸುರಕ್ಷಿತ ಸ್ಥಳಗಳಿಗೆ ಸ್ಥಳಾಂತರಿಸಲಾಗಿದ್ದು, ಗಾಯಾಳುಗಳು ಹಾಗೂ ಅಪಘಾತದಿಂದ ತೊಂದರೆಗೊಳಗಾದವರಿಗೆ ರೆಡ್‌ಕ್ರಾಸ್ ನೆರವು ಒದಗಿಸಿದೆ.
ರೆನ್ಫೆ ರೈಲಿನಲ್ಲಿ ಪ್ರಯಾಣಿಸುತ್ತಿದ್ದ ಪ್ರಯಾಣಿಕರೊಬ್ಬರು ಸಿಎನ್‌ಎನ್‌ಗೆ ಮಾಹಿತಿ ನೀಡಿದ್ದು, ಅಪಘಾತ ಸಂಭವಿಸುವ ಮೊದಲು ರೈಲು ಸುಮಾರು 20 ನಿಮಿಷಗಳ ಕಾಲ ನಿಂತಿತ್ತು. ಬಳಿಕ ಪ್ರಯಾಣ ಆರಂಭಿಸಿದ ಕೆಲವೇ ಸಮಯದಲ್ಲಿ ಡಿಕ್ಕಿ ಸಂಭವಿಸಿದೆ ಎಂದು ತಿಳಿಸಿದ್ದಾರೆ.
ಅಪಘಾತದ ತೀವ್ರತೆಯನ್ನು ವಿವರಿಸಿದ ಪ್ರಯಾಣಿಕರಾದ ಪ್ಯಾಟ್ರಿಷಿಯಾ ಅಲ್ವಾರೆಜ್, ಡಿಕ್ಕಿಯ ರಭಸಕ್ಕೆ ಕೆಲವು ಪ್ರಯಾಣಿಕರು ಗಾಳಿಯಲ್ಲಿ ಎಸೆಯಲ್ಪಟ್ಟರು ಹಾಗೂ ರೈಲಿನ ಬೋಗಿಯ ಒಳಭಾಗದಲ್ಲಿ ಭಾರೀ ಹಾನಿಯಾಗಿದೆ ಎಂದು ಹೇಳಿದ್ದಾರೆ.
ಸ್ಪೇನ್ ಪ್ರಧಾನಿ ಪೆಡ್ರೊ ಸಾಂಚೆಝ್ ಅವರು ಸಾರಿಗೆ ಸಚಿವರು ಹಾಗೂ ಪ್ರಾದೇಶಿಕ ಸರ್ಕಾರದೊಂದಿಗೆ ನಿರಂತರ ಸಂಪರ್ಕದಲ್ಲಿರುವುದಾಗಿ ತಿಳಿಸಿದ್ದಾರೆ. ಸಂತ್ರಸ್ತರಿಗೆ ನೆರವು ನೀಡಲು ತುರ್ತು ಸೇವಾ ಸಿಬ್ಬಂದಿ ಕಾರ್ಯನಿರ್ವಹಿಸುತ್ತಿದ್ದಾರೆ ಎಂದು ಹೇಳಿದ್ದಾರೆ.
ಇದೇ ವೇಳೆ, ಅಪಘಾತದ ಹಿನ್ನೆಲೆಯಲ್ಲಿ ಆಸ್ಪತ್ರೆಗಳು ಹಾಗೂ ತುರ್ತು ವೈದ್ಯಕೀಯ ತಂಡಗಳಿಗೆ ನೆರವಾಗಲು ರಕ್ತದಾನ ಮಾಡುವಂತೆ ಕ್ಯಾಸ್ಟಿಲ್ಲಾ-ಲಾ ಮಂಚಾ ಪ್ರಾದೇಶಿಕ ಸರ್ಕಾರ ಸಾರ್ವಜನಿಕರಲ್ಲಿ ಮನವಿ ಮಾಡಿದೆ.
ರೈಲ್ವೆ ಸಂಘಟನೆಯ ವಕ್ತಾರ ರಾಫೆಲ್ ಎಸ್ಕುಡೆರೊ ಈ ಅಪಘಾತವನ್ನು ಅಸಾಮಾನ್ಯ ಘಟನೆ ಎಂದು ಬಣ್ಣಿಸಿದ್ದಾರೆ. ರೈಲುಗಳ ಸಂಚಾರವನ್ನು ನೈಜ ಸಮಯದಲ್ಲಿ ಮೇಲ್ವಿಚಾರಣೆ ಮಾಡಲಾಗುತ್ತಿದ್ದು, ಹಳಿಗಳ ಸ್ಥಿತಿಗತಿಯ ಕುರಿತು ರೈಲು ಚಾಲಕರಿಗೆ ಮಾಹಿತಿ ನೀಡಲಾಗುತ್ತದೆ ಎಂದು ಸ್ಪೇನ್‌ನ ಆಂಟೆನಾ 3 ರೇಡಿಯೊ ಕೇಂದ್ರಕ್ಕೆ ತಿಳಿಸಿದ್ದಾರೆ.
ಅಪಘಾತಕ್ಕೆ ನಿಖರವಾದ ಕಾರಣ ಇನ್ನೂ ತಿಳಿದುಬಂದಿಲ್ಲ.
ಈ ವರ್ಷ ಸ್ಪೇನ್‌ನಲ್ಲಿ ಸಂಭವಿಸಿದ ಸರಣಿ ರೈಲು ಅಪಘಾತಗಳ ಹಿನ್ನೆಲೆಯಲ್ಲಿ ಈ ದುರಂತ ಮತ್ತಷ್ಟು ಆತಂಕ ಮೂಡಿಸಿದೆ. ಜನವರಿಯಲ್ಲಿ ದಕ್ಷಿಣ ಸ್ಪೇನ್‌ನ ಕಾರ್ಡೋಬಾ ಪ್ರಾಂತ್ಯದ ಆಡಮುಜ್ ಸಮೀಪ ಸಂಭವಿಸಿದ ರೈಲು ಡಿಕ್ಕಿಯಲ್ಲಿ 40ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದರು. ಇದಾದ ಬಳಿಕ ಬಾರ್ಸಿಲೋನಾ ಸಮೀಪ ಪ್ರಯಾಣಿಕ ರೈಲೊಂದು ಹಳಿ ತಪ್ಪಿದ ಘಟನೆ ನಡೆದಿತ್ತು.
