ಕೇರಳದಲ್ಲಿ ನಿರಂತರ ಶ್ರೀಗಂಧದ ಮರಗಳ ಕಳವು: ಸಮಗ್ರ ತನಿಖೆಗೆ ಎಎನ್‌ಇಸಿ ಟ್ರಸ್ಟ್ ಆಗ್ರಹ
ಕೊಚ್ಚಿ, ಅ. 28: ಕೇರಳದ ನೆನ್ಮಾರ ಅರಣ್ಯ ವಿಭಾಗದಲ್ಲಿ, ವಿಶೇಷವಾಗಿ ಕೊಲ್ಲಂಗೋಡ್ ಅರಣ್ಯ ವ್ಯಾಪ್ತಿಯಲ್ಲಿ ನಿರಂತರವಾಗಿ ನಡೆಯುತ್ತಿರುವ ಶ್ರೀಗಂಧದ ಮರಗಳ ಕಳವು ಹಾಗೂ ಅಕ್ರಮ ಮರಗಳ ಕಡಿತ ಪ್ರಕರಣಗಳ ಕುರಿತು ಸ್ವತಂತ್ರ ಮತ್ತು ಕಾಲಮಿತಿಯ ತನಿಖೆ ನಡೆಸುವಂತೆ ಎಎನ್‌ಇಸಿ ಟ್ರಸ್ಟ್ ಕೇರಳ ಸರ್ಕಾರವನ್ನು ಒತ್ತಾಯಿಸಿದೆ.
ಈ ಸಂಬಂಧ ಅರಣ್ಯ ಸಚಿವರು, ಮುಖ್ಯ ಕಾರ್ಯದರ್ಶಿ ಹಾಗೂ ಹಿರಿಯ ಅರಣ್ಯ ಅಧಿಕಾರಿಗಳಿಗೆ ಮನವಿ ಸಲ್ಲಿಸಿರುವ ಟ್ರಸ್ಟ್, ಕಳೆದ ಎರಡು ತಿಂಗಳಲ್ಲಿ ವಾಮಲಾ ಮತ್ತು ತೆಕ್ಕಡಿ ಪ್ರದೇಶಗಳಿಂದ ಸುಮಾರು 30 ಶ್ರೀಗಂಧದ ಮರಗಳನ್ನು ಕಳವು ಮಾಡಲಾಗಿದೆ ಎಂದು ವರದಿಯಾಗಿರುವುದನ್ನು ಉಲ್ಲೇಖಿಸಿದೆ. ಅಲ್ಲದೆ, ಕಳೆದ ವಾರವೊಂದರಲ್ಲೇ ಕೊಟ್ಟಮಲ ಪ್ರದೇಶದಲ್ಲಿ ಸುಮಾರು 25 ಶ್ರೀಗಂಧದ ಮರಗಳು ಸೇರಿದಂತೆ ವಿವಿಧ ಮರಗಳನ್ನು ಕಡಿದು ಹಾಕಲಾಗಿದೆ ಎಂದು ತಿಳಿಸಿದೆ.
ಕೆಲವು ಪ್ರಕರಣಗಳಲ್ಲಿ ಇದುವರೆಗೆ ಯಾರನ್ನೂ ಬಂಧಿಸಿಲ್ಲ ಎಂಬ ವರದಿಗಳ ಬಗ್ಗೆ ಕಳವಳ ವ್ಯಕ್ತಪಡಿಸಿರುವ ಟ್ರಸ್ಟ್, ಅರಣ್ಯ ರಕ್ಷಣಾ ಕ್ರಮಗಳು, ಗಸ್ತು ವ್ಯವಸ್ಥೆ, ತನಿಖೆಯ ಪ್ರಗತಿ ಹಾಗೂ ಇಲಾಖಾ ಕ್ರಮಗಳ ಕುರಿತು ಸಮಗ್ರ ಪರಿಶೀಲನೆ ನಡೆಸುವಂತೆ ಆಗ್ರಹಿಸಿದೆ. ವಟ್ಟಯಾರ್ಮಡಕ್ಕು ಪ್ರದೇಶದಲ್ಲಿ ಸುಮಾರು ಎರಡು ವರ್ಷಗಳ ಹಿಂದೆ ನಡೆದಿದ್ದ ಮರಗಳ ಕಡಿತ ಮತ್ತು ಮರದ ದಿಮ್ಮಿಗಳ ಸಾಗಣೆ ಪ್ರಕರಣವನ್ನೂ ಮರುಪರಿಶೀಲಿಸಬೇಕು ಎಂದು ಒತ್ತಾಯಿಸಿದೆ. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕೆಲವು ಅರಣ್ಯ ಸಿಬ್ಬಂದಿಯನ್ನು ಅಮಾನತುಗೊಳಿಸಲಾಗಿತ್ತು ಎನ್ನಲಾಗಿದೆ.
ಕಳೆದ ಐದು ವರ್ಷಗಳಲ್ಲಿ ನೆನ್ಮಾರ ಅರಣ್ಯ ವಿಭಾಗದ, ವಿಶೇಷವಾಗಿ ಕೊಲ್ಲಂಗೋಡ್ ವ್ಯಾಪ್ತಿಯಲ್ಲಿ ದಾಖಲಾಗಿರುವ ಎಲ್ಲ ಶ್ರೀಗಂಧದ ಕಳವು ಪ್ರಕರಣಗಳ ಪರಿಶೀಲನೆ ನಡೆಸಬೇಕು ಎಂದು ಟ್ರಸ್ಟ್ ಆಗ್ರಹಿಸಿದೆ. ಗಸ್ತು ನೋಂದಣಿ ಪುಸ್ತಕಗಳು, ಬೀಟ್ ದಾಖಲೆಗಳು, ಜಿಪಿಎಸ್ ವಿವರಗಳು ಹಾಗೂ ಇತರ ಸಾಕ್ಷ್ಯಗಳನ್ನು ಪರಿಶೀಲಿಸಿ ಕರ್ತವ್ಯ ಲೋಪವಾಗಿದೆಯೇ ಎಂಬುದನ್ನು ಪತ್ತೆಹಚ್ಚಿ ಹೊಣೆಗಾರರನ್ನು ಗುರುತಿಸಬೇಕು ಎಂದು ತಿಳಿಸಿದೆ.
ವಟ್ಟಯಾರ್ಮಡಕ್ಕು ಪ್ರದೇಶವು ಆನಮಲೈ ಹುಲಿ ಸಂರಕ್ಷಿತ ಪ್ರದೇಶದ ಗಡಿಯ ಸಮೀಪದಲ್ಲಿದ್ದು, ತಮಿಳುನಾಡಿನಿಂದಲೂ ತಲುಪಲು ಸಾಧ್ಯವಿದೆ ಎಂಬ ವರದಿಗಳನ್ನು ಉಲ್ಲೇಖಿಸಿರುವ ಟ್ರಸ್ಟ್, ಅರಣ್ಯ ಗಡಿಗಳು ಮತ್ತು ಪ್ರದೇಶದ ನಿಖರ ವ್ಯಾಪ್ತಿಯನ್ನು ಪರಿಶೀಲಿಸಬೇಕು. ಅಂತರರಾಜ್ಯ ಮಾರ್ಗಗಳ ಮೂಲಕ ಮರದ ದಿಮ್ಮಿಗಳ ಸಾಗಣೆ ನಡೆದಿರುವ ಬಗ್ಗೆ ಅನುಮಾನಗಳಿದ್ದರೆ ತಮಿಳುನಾಡಿನ ಸಂಬಂಧಪಟ್ಟ ಅಧಿಕಾರಿಗಳೊಂದಿಗೆ ಸಮನ್ವಯ ಸಾಧಿಸಿ ತನಿಖೆ ನಡೆಸಬೇಕು ಎಂದು ಮನವಿ ಮಾಡಿದೆ.
ಪ್ರಕರಣಗಳಿಗೆ ಸಂಬಂಧಿಸಿದ ಮಹಜರ್‌ಗಳು, ಛಾಯಾಚಿತ್ರಗಳು, ಜಿಪಿಎಸ್ ದಾಖಲೆಗಳು, ಮರಗಳ ಅಳತೆ ವಿವರಗಳು, ಅರಣ್ಯ ನಕ್ಷೆಗಳು, ಗಸ್ತು ಪುಸ್ತಕಗಳು ಹಾಗೂ ಇತರ ಸಾಕ್ಷ್ಯಗಳನ್ನು ತಕ್ಷಣವೇ ಸಂರಕ್ಷಿಸಬೇಕು. ಪ್ರಕರಣಗಳ ತನಿಖೆಯೊಂದಿಗೆ ನೇರ ಸಂಬಂಧ ಹೊಂದಿರದ ಹಿರಿಯ ಅಧಿಕಾರಿಯ ಮೇಲ್ವಿಚಾರಣೆಯಲ್ಲಿ ವಿಚಾರಣೆ ನಡೆಸಬೇಕು ಎಂದು ಟ್ರಸ್ಟ್ ಒತ್ತಾಯಿಸಿದೆ.
"ಶ್ರೀಗಂಧದ ಮರಗಳ ಕಳವು ಮತ್ತು ಅಕ್ರಮ ಮರಗಳ ಕಡಿತದ ಪುನರಾವರ್ತಿತ ವರದಿಗಳನ್ನು ಸೂಕ್ತ ಪರಿಶೀಲನೆ ಇಲ್ಲದೆ ಸಣ್ಣ ಅಥವಾ ಪ್ರತ್ಯೇಕ ಘಟನೆಗಳೆಂದು ಪರಿಗಣಿಸಲು ಸಾಧ್ಯವಿಲ್ಲ. ಇವು ಸಾಬೀತಾದಲ್ಲಿ ಅಮೂಲ್ಯ ಅರಣ್ಯ ಸಂಪತ್ತಿಗೆ ಗಂಭೀರ ನಷ್ಟ ಉಂಟಾಗಿರುವುದರ ಜೊತೆಗೆ ಅರಣ್ಯ ರಕ್ಷಣಾ ವ್ಯವಸ್ಥೆಯ ಕಾರ್ಯಕ್ಷಮತೆಯ ಬಗ್ಗೆಯೂ ಪ್ರಶ್ನೆಗಳು ಮೂಡುತ್ತವೆ" ಎಂದು ಎಎನ್‌ಇಸಿ ಟ್ರಸ್ಟ್‌ನ ಕಾನೂನು ಪ್ರತಿನಿಧಿ, ವಕೀಲ ಸಂತೋಷ್ ಟಿ.ಎಸ್. ತಿಳಿಸಿದ್ದಾರೆ.
ತನಿಖೆಯ ಪ್ರಗತಿ, ಬಂಧನಗಳು, ವಶಪಡಿಸಿಕೊಂಡ ಮರಗಳ ವಿವರ, ಹಿಂದಿನ ವಟ್ಟಯಾರ್ಮಡಕ್ಕು ಪ್ರಕರಣದಲ್ಲಿ ಕೈಗೊಂಡ ಕ್ರಮಗಳು ಹಾಗೂ ಇಂತಹ ಘಟನೆಗಳು ಮರುಕಳಿಸದಂತೆ ಜಾರಿಗೊಳಿಸಿರುವ ಮುನ್ನೆಚ್ಚರಿಕೆ ಕ್ರಮಗಳ ಕುರಿತು ಕಾಲಮಿತಿಯೊಳಗೆ ಲಿಖಿತ ವರದಿ ಸಲ್ಲಿಸುವಂತೆ ಟ್ರಸ್ಟ್ ಕೇರಳ ಸರ್ಕಾರವನ್ನು ಆಗ್ರಹಿಸಿದೆ.
