ಕುರುಬ ಸಮುದಾಯದ ಕೆ.ಎಸ್.ಈಶ್ವರಪ್ಪಗೆ ಸಿಎಂ ಸ್ಥಾನ ನೀಡುವಂತೆ:ಓಬಿಸಿ ನಾಯಕರ ಆಗ್ರಹ

  ಬೆಂಗಳೂರು,ಜು.23 ರಾಜ್ಯದಲ್ಲಿ ಮುಖ್ಯಮಂತ್ರಿ ಸ್ಥಾನವನ್ನು ಬರೀ ಲಿಂಗಾಯತ, ಒಕ್ಕಲಿಗ ಸಮುದಾಯದವರಿಗೆ ಇಲ್ಲಿಯವರೆಗೂ ನೀಡುತ್ತಾ ಬಂದಿದ್ದು, ಈಗಲಾದರೂ ಸಿಎಂ ಹುದ್ದೆಯನ್ನು ಕುರುಬ ಸಮುದಾಯಕ್ಕೆ ಮೀಸಲಿಟ್ಟು, ಕುರುಬ ಸಮುದಾಯದ ನಾಯಕ ಕೆ.ಎಸ್.ಈಶ್ವರಪ್ಪಗೆ ನೀಡಬೇಕೆಂದು ಹಿಂದುಳಿದ ವರ್ಗಗಳ ಸಮುದಾಯದ ನಾಯಕರು ಆಗ್ರಹಿಸಿದ್ದಾರೆ.
  ಬೆಂಗಳೂರಿನಲ್ಲಿ ಶುಕ್ರವಾರ  ಕುರುಬ,ಈಡಿಗ,ಕೋಳಿ,ಮಾಳಿ,ಸವಿತಾ ಸಮಾಜದ ನಾಯಕರು ಕುರುಬ ಸಮುದಾಯದ ನಾಯಕ ಮುಕುಡಪ್ಪ ನೇತೃತ್ವದಲ್ಲಿ ಜಂಟಿ ಸುದ್ದಿಗೋಷ್ಠಿ ನಡೆಸಲಾಯಿತು.
  ಮುಕುಡಪ್ಪ ಮಾತನಾಡಿ, ಯಡಿಯೂರಪ್ಪನವರೇ ಸಿಎಂ ಆಗಿ ಮುಂದುವರಿಯಬೇಕು.ಬದಲಾವಣೆ ಮಾಡಿದರೆ ಈಶ್ವರಪ್ಪಗೆ ಅವಕಾಶ ಕೊಡಬೇಕು.ಈಶ್ವರಪ್ಪನವರನ್ನು ಸಿಎಂ ಮಾಡಬೇಕು.ಒಕ್ಕಲಿಗ ಸಮುದಾಯದಿಂದ ಡಿ.ವಿ.ಸದಾನಂದಗೌಡರು ಆಗಿದ್ದರು,ಶೆಟ್ಟರ್ ಕೂಡ ಸಿಎಂ ಆಗಿದ್ದಾರೆ.ಯಡಿಯೂರಪ್ಪನವರಷ್ಟೇ ಬಿಜೆಪಿಯಲ್ಲಿ ಈಶ್ವರಪ್ಪ ಹಿರಿಯರಾಗಿದ್ದು, ಈಶ್ವರಪ್ಪನವರಿಗೆ ಸಿಎಂ ಸ್ಥಾನ ಕೊಡಬೇಕು.20 ವರ್ಷ ಲಿಂಗಾಯತರು ಸಿಎಂ ಆಗಿದ್ದಾರೆ, 18 ವರ್ಷ ಒಕ್ಕಲಿಗರು ಸಿಎಂ ಆಗಿದ್ದಾರೆ.ಕುರುಬರು 5 ವರ್ಷ ಮಾತ್ರ ಸಿಎಂ ಆಗಿದ್ದರು ಎಂದು ಕಾಂಗ್ರೆಸ್‌ ನಿಂದ ಸಿದ್ದರಾಮಯ್ಯನವರನ್ನು ಸಿಎಂ ಮಾಡಲಾಗಿತ್ತೆಂಬುದನ್ನು  ಪರೋಕ್ಷವಾಗಿ ಒತ್ತಿ ಹೇಳಿದ ಮುಕುಡಪ್ಪ ಬಿಜೆಪಿಯಲ್ಲಿ ಕುರುಬ ಸಮುದಾಯದಿಂದ ಈಶ್ವರಪ್ಪಗೆ ಸಿಎಂ ಸ್ಥಾನ ಕೊಡಬೇಕೆಂದರು.
  ಕೋಲಿ ಸಮಾಜದ ಮುಖಂಡ ತಿಪ್ಪಣ್ಣ ರೆಡ್ಡಿ ಮಾತನಾಡಿ,ರಾಷ್ಟ್ರ ಪತಿಗಳು ದಲಿತರು.ರಾಜ್ಯದ ರಾಜ್ಯಪಾಲರು ದಲಿತರು.41 ಜನರಿಗೆ ಕೇಂದ್ರದಲ್ಲಿ ಸಚಿವ ಸ್ಥಾನ ಕೊಟ್ಟಿದ್ದಾರೆ.ಎಸ್ಸಿ,ಎಸ್ಟಿ ಓಬಿಸಿಯವರು ಆಗಿದ್ದಾರೆ.ಇಲ್ಲಿಯೂ ಓಬಿಸಿ  ಈಶ್ವರಪ್ಪನವರಿಗೆ ಅವಕಾಶ ಕೊಡಬೇಕು.ಬರಿ ಎರಡೇ ಸಮುದಾಯಕ್ಕೆ ಯಾಕೆ ಸಿಎಂ ಸ್ಥಾನ ಕೊಡಬೇಕು.ಲಿಂಗಾಯತ,ಒಕ್ಕಲಿಗರಿಗೆ ಮಾತ್ರ ಏಕೆ?ಕುರುಬರು ಹಿಂದುಳಿದ ಸಮುದಾಯದವರು.ಅದಕ್ಕೆ ಕುರುಬ ಸಮುದಾಯದ ಈಶ್ವರಪ್ಪಗೆ ಕೊಡಬೇಕು ಎಂದು ಒತ್ತಾಯಿಸಿದರು.