ನಡಾಲ್ ಗೆ 1000ನೇ ಗೆಲುವು

ಪ್ಯಾರೀಸ್, ನವೆಂಬರ್.4: ಬುಧವಾರ ನಡೆದ ಪ್ಯಾರಿಸ್ ಮಾಸ್ಟರ್ಸ್ ಪಂದ್ಯಾವಳಿಯ ಮೂರು ಸೆಟ್‌ಗಳ ಕಠಿಣ ಪಂದ್ಯದಲ್ಲಿ ವಿಶ್ವದ 2 ನೇ ಶ್ರೇಯಾಂಕಿತ ಟೆನಿಸ್ ಆಟಗಾರ ಸ್ಪೇನ್‌ನ ರಾಫಾಲ್ ನಡಾಲ್, ತಮ್ಮದೇ ದೇಶದ ಫೆಲಿಸಿಯಾನೊ ಲೋಪೆಜ್ ಅವರನ್ನು ಸೋಲಿಸಿ ವೃತ್ತಿಜೀವನದ 1000 ನೇ ಜಯ ಸಾಧಿಸಿದರು.

ನಡಾಲ್ 4-6 7-6 (5) 6-4ರಿಂದ ಲೋಪೆಜರನ್ನು ಸೋಲಿಸಿದರು. ಮತ್ತು ಸಿಂಗಲ್ಸ್ ಪಂದ್ಯಗಳಲ್ಲಿ 1000 ಪಂದ್ಯಗಳನ್ನು ಗೆದ್ದ ವಿಶ್ವದ ನಾಲ್ಕನೇ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ನಡಾಲ್ ಮೊದಲು ಜಿಮ್ಮಿ ಕಾನರ್ಸ್ (1274), ರೋಜರ್ ಫೆಡರರ್ (1241) ಮತ್ತು ಇವಾನ್ ಲೆಂಡ್ಲ್ (1068) ಈ ಸಾಧನೆ ಮಾಡಿದ್ದರು.

"1000 ಪಂದ್ಯಗಳನ್ನು ಗೆಲ್ಲುವ ಒಂದು ಅಂಶವೆಂದರೆ, ನಿಮ್ಮ ವೃತ್ತಿಜೀವನ ಹೆಚ್ಚು ಉಳಿದಿಲ್ಲ ಆದರೆ ಈ ಸಾಧನೆಯ ಬಗ್ಗೆ ನನಗೆ ತುಂಬಾ ಸಂತೋಷವಾಗಿದೆ. ನಾನು ಬಹಳಷ್ಟು ವಿಷಯಗಳ ಬಗ್ಗೆ ಹೆಮ್ಮೆಪಡುತ್ತೇನೆ. ಆದರೆ ನನ್ನ ವೃತ್ತಿಜೀವನದಲ್ಲಿ ಗಾಯಗಳ ರೂಪದಲ್ಲಿ ನಾನು ಅನೇಕ ತೊಂದರೆಗಳನ್ನು ಎದುರಿಸಿದ್ದೇನೆ. 34 ನೇ ವಯಸ್ಸಿನಲ್ಲಿ ಆಡುವುದು ದೊಡ್ಡ ಸಾಧನೆ" ಎಂದಿದ್ದಾರೆ. 

"ಇದು ತುಂಬಾ ಕಠಿಣ ಪಂದ್ಯವಾಗಿತ್ತು, ಮತ್ತು ನಾನು ಲೋಪೆಜ್ ವಿರುದ್ಧ ಕಳಪೆ ರೀತಿಯಲ್ಲಿ ಪ್ರಾರಂಭಿಸಿದೆ ಏಕೆಂದರೆ ಪಂದ್ಯದುದ್ದಕ್ಕೂ ನಾನು ಸಾಕಷ್ಟು ಒತ್ತಡದಲ್ಲಿದ್ದೆ" ಎಂದು ನಡಾಲ್ ಹೇಳಿದರು. 

20 ಗ್ರ್ಯಾನ್ಸ್ಲಾಮ್ ಪ್ರಶಸ್ತಿಗಳನ್ನು ಗೆದ್ದಿರುವ ನಡಾಲ್ ಮೂರನೇ ಸುತ್ತಿನಲ್ಲಿ ಆಸ್ಟ್ರೇಲಿಯಾದ ಜೋರ್ಡಾನ್ ಥಾಂಪ್ಸನ್ ಅವರನ್ನು ಎದುರಿಸಲಿದ್ದಾರೆ. 

ಮತ್ತೊಂದು ಪಂದ್ಯದಲ್ಲಿ, ನಾಲ್ಕನೇ ಶ್ರೇಯಾಂಕಿತ ಜರ್ಮನಿಯ ಅಲೆಕ್ಸಾಂಡರ್ ಜ್ವೆರೆವ್ ಸೆರ್ಬಿಯಾದ ಮಿಯೋಮಿರ್ ಕೈಮನೋವಿಕ್ ಅವರನ್ನು 6–2, 6–2 ಸೆಟ್‌ಗಳಿಂದ ನೇರ ಸೆಟ್‌ಗಳಲ್ಲಿ ಸೋಲಿಸಿದರು. ಮುಂದಿನ ಪಂದ್ಯದಲ್ಲಿ ಇವರು ಫ್ರಾನ್ಸ್‌ನ ಆಡ್ರಿಯನ್ ಮೆನಾರಿನೊ ಅವರನ್ನು ಎದುರಿಸಲಿದ್ದಾರೆ.

ಒಂಬತ್ತನೇ ಶ್ರೇಯಾಂಕದ ಸ್ಪೇನ್‌ನ ಪ್ಯಾಬ್ಲೊ ಕ್ಯಾರೆನೊ ಬುಸ್ಟಾ, 12 ನೇ ಶ್ರೇಯಾಂಕದ ಸ್ವಿಟ್ಜರ್‌ಲ್ಯಾಂಡ್‌ನ ಸ್ಟಾನಿಸ್ಲಾಸ್ ವಾವ್ರಿಂಕಾ, ಐದನೇ ಶ್ರೇಯಾಂಕದ ರಷ್ಯಾದ ಆಂಡ್ರೇ ರುಬ್ಲೆವ್, ಆರನೇ ಶ್ರೇಯಾಂಕದ ಅರ್ಜೆಂಟೀನಾದ ಶ್ವಾರ್ಟ್‌ಜ್ಮನ್, ಮೂರನೇ ಶ್ರೇಯಾಂಕಿತ ರಷ್ಯಾದ ಡ್ಯಾನಿಲ್ ಮೆಡ್ವೆಡೆವ್, 10 ನೇ ಶ್ರೇಯಾಂಕದ ಕೆನಡಾದ ಮಿಲೋಸ್ ರಾವೊನಿಕ್ ಮತ್ತು ಕ್ರೊಯೇಷಿಯಾದ ಮರಿನ್ ಸಿಲಿಕ್ ಮುನ್ನಡೆ ಸಾಧಿಸಿದ್ದಾರೆ.