ಅಮೆರಿಕಾದ ಆಯುಧಗಳೊಂದಿಗೆ ತಾಲಿಬಾನ್ ಶಕ್ತಿ ಪ್ರದರ್ಶನ...!
ಕಾಬೂಲ್‌, ನ 15: ಅಮೆರಿಕಾ, ಇನ್ನತರ ದೇಶಗಳ ಸೇನಾ ಪಡೆಗಳು ಬಿಟ್ಟುಹೋಗಿರುವ ಶಸ್ತ್ರಾಸ್ತ್ರಗಳೊಂದಿಗೆ ತಾಲಿಬಾನ್ ಭಾನುವಾರ ತನ್ನ ಶಕ್ತಿ ಸಾಮರ್ಥ್ಯವನ್ನು ಪ್ರದರ್ಶಿಸಿತು. ಇವುಗಳಲ್ಲಿ ಅಮೆರಿಕಾ ಶಸ್ತ್ರಸಜ್ಜಿತ ವಾಹನಗಳು, ರಷ್ಯಾದ ಹೆಲಿಕಾಪ್ಟರ್‌ಗಳು ಸೇರಿವೆ.
ಆಗಸ್ಟ್‌ನಲ್ಲಿ ನಾಗರಿಕ ಸರ್ಕಾರ ಪತನಗೊಂಡು ತಾಲಿಬಾನ್ ಅಧಿಕಾರಕ್ಕೆ ಬಂದ ನಂತರ ಅವರು ಈ ಶಸ್ತ್ರಾಸ್ತ್ರಗಳನ್ನು ವಶಪಡಿಸಿಕೊಂಡಿದ್ದಾರೆ. ತಾಲಿಬಾನ್ ಪಡೆಗಳ 250 ಮಂದಿ ಯೋಧರು ಹೊಸದಾಗಿ ತರಬೇತಿಯನ್ನು ಪೂರ್ಣಗೊಳಿಸಿದ ಸಂದರ್ಭವಾಗಿ ಸೈನಿಕರು ಪರೇಡ್ ಆಯೋಜಿಸಿದ್ದರು
ಪಥ ಸಂಚಲನದಲ್ಲಿ ಅಮೆರಿಕಾ ನಿರ್ಮಿತ ಎಂ. 117 ಶಸ್ತ್ರಸಜ್ಜಿತ ವಾಹನಗಳು, ಎಂ - 17 ಹೆಲಿಕಾಪ್ಟರ್‌ಗಳು, ಅಮೆರಿಕಾ ನಿರ್ಮಿತ ಎಂ 4 ಅಸಾಲ್ಟ್ ಗನ್‌ಗಳನ್ನು ಪ್ರದರ್ಶಿಸಲಾಯಿತು. ಅಫ್ಘನ್ ರಾಷ್ಟ್ರೀಯ ಪಡೆಯಲ್ಲಿ ಸೇವೆ ಸಲ್ಲಿಸಿದ ಪೈಲಟ್‌ಗಳು, ಮೆಕ್ಯಾನಿಕ್‌ಗಳನ್ನು ಹೊಸದಾಗಿ ತಮ್ಮ ಪಡೆಗಳಿಗೆ ನೇಮಕ ಮಾಡಿಕೊಳ್ಳಲಾಗಿದೆ ಎಂದು ತಾಲಿಬಾನ್ ವಕ್ತಾರರು ತಿಳಿಸಿದ್ದಾರೆ . ತಾಲಿಬಾನ್ ಇತ್ತೀಚೆಗೆ ಮಿಲಿಟರಿ ಸಮವಸ್ತ್ರ ಬಳಸಲು ಪ್ರಾರಂಭಿಸಿದೆ. ಈ ಹಿಂದೆ ತಾಲಿಬಾನ್ ಹೋರಾಟಗಾರರು ಸಾಂಪ್ರದಾಯಿಕ ಉಡುಗೆಯಲ್ಲಿ ಮಾತ್ರ ಕಾಣಿಸಿಕೊಳ್ಳುತ್ತಿದ್ದರು.
ಇತ್ತೀಚೆಗೆ ಪಾಕಿಸ್ತಾನ ಸರ್ಕಾರ, ಉಗ್ರಗಾಮಿ ಸಂಘಟನೆ ತೆಹ್ರೀಕ್-ಎ-ತಾಲಿಬಾನ್ ಪಾಕಿಸ್ತಾನದ ನಡುವೆ , ಅಫ್ಘನ್ ತಾಲಿಬಾನ್ ಮಧ್ಯಸ್ಥಿಕೆ ವಹಿಸಿತ್ತು. ಇದನ್ನು ಸ್ವತಃ ಅಫ್ಘಾನಿಸ್ತಾನ ವಿದೇಶಾಂಗ ಸಚಿವ ಅಮೀರ್ ಖಾನ್ ಮುತಾಖಿ ಹೇಳಿದ್ದಾರೆ. ಪಾಕಿಸ್ತಾನದಲ್ಲಿ ಜಿಯೋ ಟಿವಿಗೆ ನೀಡಿದ ಸಂದರ್ಶನದಲ್ಲಿ ಅವರು ಈ ವಿಷಯವನ್ನು ಬಹಿರಂಗಪಡಿಸಿದ್ದಾರೆ. ತಮ್ಮ ದೇಶದ ನೀತಿಯ ಭಾಗವಾಗಿ ಈ ಕೆಲಸ ಮಾಡಿದ್ದೇವೆ ಎಂದು ಹೇಳಿದ್ದಾರೆ. ಶೀಘ್ರದಲ್ಲಿಯೇ ಮಾತುಕತೆಗಳ ಫಲಿತಾಂಶ ಲಭ್ಯವಾಗಲಿದೆ. ಮಾತುಕತೆಗಳನ್ನು ಅಫ್ಘಾನಿಸ್ತಾನದ ಆಂತರಿಕ ಸಚಿವ ಸಿರಾಜುದ್ದೀನ್ ಹಕ್ಕಾನಿ ನೇತೃತ್ವದಲ್ಲಿ ಸುಮಾರು ಎರಡು ವಾರಗಳ ಕಾಲ ನಡೆಸಲಾಯಿತು ಎಂದು ಹೇಳಲಾಗಿದೆ.
