ಮಗುವಿನ ಕೈಗೆ ಮೊಬೈಲ್ ಸಿಕ್ರೆ ದೇವ್ರೇ ಗತಿ! 31 ಬರ್ಗರ್ ಆರ್ಡರ್.. ಜೊತೆಗೆ ಟಿಪ್ಸ್ ಬೇರೆ!
ಟೆಕ್ಸಾಸ್: ಮೇ 17 : ಪುಟ್ಟ ಮಕ್ಕಳ ಕೈಗೆ ಮೊಬೈಲ್ ಸಿಕ್ಕಿಬಿಟ್ರೆ ಏನೆಲ್ಲಾ ಎಡವಟ್ಟುಗಳಾಗಿಬಿಡ್ತವೆ ಅನ್ನೋದಕ್ಕೆ ಇದು ಮತ್ತೊಂದು ತಾಜಾ ಉದಾಹರಣೆ. ಯುನೈಟೆಡ್ ಸ್ಟೇಟ್ಸ್‌ನ ಟೆಕ್ಸಾಸ್‌ನಲ್ಲಿ ಎರಡು ವರ್ಷದ ಬಾಲಕ ತನ್ನ ತಾಯಿಯ ಫೋನ್ ಬಳಸಿ ಸ್ಥಳೀಯ ಮೆಕ್‌ ಡೊನಾಲ್ಡ್ ಔಟ್‌ಲೆಟ್‌ನಿಂದ ಎರಡು ಡಜನ್‌ಗಿಂತಲೂ ಹೆಚ್ಚು ಚೀಸ್‌ಬರ್ಗರ್‌ಗಳನ್ನು ಆರ್ಡರ್ ಮಾಡಿದ್ದಾನೆ. ಮಹಿಳೆ ಫೋನ್ ಪರಿಶೀಲಿಸಿದಾಗ ಕೃತ್ಯ ನಡೆದಿರುವುದು ಗೊತ್ತಾಗಿದೆ.
ಕೆಲ್ಸೆ ಬುರ್ಖಾಲ್ಟರ್ ಗೋಲ್ಡನ್ ತನ್ನ ಮಗ ಬ್ಯಾರೆಟ್ ಆಹಾರ ವಿತರಣಾ ಪ್ಲಾಟ್‌ಫಾರ್ಮ್ ಡೋರ್‌ಡ್ಯಾಶ್‌ನಲ್ಲಿ ತನಗೆ ತಿಳಿಯದೇ ಆರ್ಡರ್ ಮಾಡಿದ್ದಾನೆ ಎಂದು ಹೇಳಿದರು.ನನ್ನ ಮಗ ನನ್ನ ಫೋನ್‌ನೊಂದಿಗೆ ಆಟವಾಡುತ್ತಿದ್ದನು, ಅವನು ಚಿತ್ರಗಳನ್ನು ತೆಗೆದುಕೊಳ್ಳುತ್ತಿದ್ದಾನೆ ಎಂದು ನಾನು ಭಾವಿಸಿದೆ. ಆದರೆ ನಾನು ಬೇರೆ ಕಡೆ ಮಗ್ನಳಾಗಿದ್ದಾಗ ಅವನು ಆಟವಾಡುತ್ತಿದ್ದ ಸಮಯದಲ್ಲಿ ಆರ್ಡರ್ ಮಾಡಿದ್ದಾನೆ ಎಂಬುದು ನನಗೆ ನಂತರ ತಿಳಿಯಿತು ಎಂದಿದ್ದಾರೆ.
ಡೋರ್‌ಡ್ಯಾಶ್‌ನಿಂದ ಬಂದ ಸಂದೇಶವನ್ನು ನೋಡಿ ನನಗೆ ಆಶ್ಚರ್ಯವಾಯಿತು. 31 ಚೀಸ್‌ಬರ್ಗರ್‌ ಆರ್ಡರ್‌ನ ಗಾತ್ರದ ಕಾರಣ ಡೆಲಿವರಿ ತಲುಪುವುದು ಸಾಮಾನ್ಯಕ್ಕಿಂತ ಹೆಚ್ಚು ಸಮಯ ತೆಗೆದುಕೊಳ್ಳುತ್ತದೆ ಎಂದು ತಿಳಿಸಲಾಗಿತ್ತು ಎಂದು ಮಗುವಿನ ತಾಯಿ ತಿಳಿಸಿದ್ದಾರೆ.
ಮೂರು ಮಕ್ಕಳ ತಾಯಿ ಕಂಪ್ಯೂಟರ್‌ನಲ್ಲಿ ಕೆಲಸ ಮಾಡುತ್ತಿದ್ದಾಗ ಆಕೆಯ ಮಗ ತನ್ನ ಅನ್‌ಲಾಕ್ ಆಗಿದ್ದ ಫೋನ್ ಅನ್ನು ಹಿಡಿದು ಆರ್ಡರ್ ಮಾಡಿದ್ದ.31 ಚೀಸ್ ಬರ್ಗರ್ ಬಿಲ್‌ನ ಒಟ್ಟು ಮೊತ್ತವು $61.58 ಆಗಿತ್ತು. ಇದರೊಂದಿಗೆ ಆತ $16 ಟಿಪ್ಸ್ ಕೂಡ ಸೇರಿಸಿದ್ದನಂತೆ.
ಆದರೆ ಮಗುವನ್ನು ಗದರಿಸುವ ಬದಲು ಆ ಮಹಿಳೆ ತಮಗೆ ಬೇಕಾದವರಿಗೆ ಚೀಸ್ ಬರ್ಗರ್ ನೀಡಲು ನಿರ್ಧರಿಸಿದ್ದಾರೆ.ಯಾರಾದರೂ ಆಸಕ್ತಿ ಹೊಂದಿದ್ದರೆ ನಾನು ಮೆಕ್‌ಡೊನಾಲ್ಡ್ ನಿಂದ 31 ಉಚಿತ ಚೀಸ್ ಬರ್ಗರ್‌ಗಳನ್ನು ಹೊಂದಿದ್ದೇನೆ. ಮೇಲ್ನೋಟಕ್ಕೆ ನನ್ನ 2 ವರ್ಷದ ಮಗುವಿಗೆ ಡೋರ್‌ಡ್ಯಾಶ್ ಅನ್ನು ಹೇಗೆ ಆರ್ಡರ್ ಮಾಡಬೇಕೆಂದು ತಿಳಿದಿದೆ, ಎಂದು ಅವರು ಫೇಸ್‌ಬುಕ್‌ನಲ್ಲಿ ಪೋಸ್ಟ್ ಮಾಡಿದ್ದಾರೆ.
ಕೆಲವೇ ನಿಮಿಷಗಳಲ್ಲಿ ಕೆಲ್ಸೆ ಬುರ್ಖಾಲ್ಟರ್ ಗೋಲ್ಡನ್ ಅವರಿಗೆ ಉತ್ತಮ ಪ್ರತಿಕ್ರಿಯೆ ಸಿಕ್ಕಿತು. ಸ್ಥಳೀಯರಲ್ಲಿ ಕೆಲವರು ಚೀಸ್ ಬರ್ಗರ್‌ಗಳನ್ನು ತೆಗೆದುಕೊಂಡರೆ, ಇತರರು ಅದನ್ನು ಹೇಗೆ ಸಂಗ್ರಹಿಸಬೇಕು ಎಂಬುದರ ಕುರಿತು ಸಲಹೆ ನೀಡಿದರು. ತನ್ನ ಮಗ ಫುಡ್ ಡೆಲಿವರಿ ಆಪ್ ದುರುಪಯೋಗಪಡಿಸಿಕೊಳ್ಳುವುದನ್ನು ತಡೆಯಲು ತನ್ನ ಮೊಬೈಲ್ ಫೋನ್‌ನಲ್ಲಿ ಡೋರ್‌ಡ್ಯಾಶ್ ಅಪ್ಲಿಕೇಶನ್ ಅನ್ನು ತೆಗೆಯುವುದಾಗಿ ತಾಯಿ ತಿಳಿಸಿದ್ದಾರೆ.
