IPL 2022; ಗೆಲುವಿಗಾಗಿ ಒಂದೇ ತಂಡ ಆಯ್ಕೆಮಾಡಿದ ಭಜ್ಜಿ, ಶೋಯೆಬ್ ಅಖ್ತರ್

ನವದೆಹಲಿ: ಮೇ 29 : ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2022 ಭಾನುವಾರ ಗುಜರಾತ್ ಟೈಟಾನ್ಸ್ ಮತ್ತು ರಾಜಸ್ಥಾನ್ ರಾಯಲ್ಸ್ ನಡುವಿನ ಪ್ರಶಸ್ತಿ ಹಣಾಹಣಿಯೊಂದಿಗೆ ಮುಕ್ತಾಯಗೊಳ್ಳಲಿದೆ. ಹಾರ್ದಿಕ್ ಪಾಂಡ್ಯ ನೇತೃತ್ವದ ಗುಜರಾತ್ ಟೈಟನ್ಸ್ ಮತ್ತು ಸಂಜು ಸ್ಯಾಮ್ಸನ್ ನೇತೃತ್ವದ ರಾಜಸ್ಥಾನ್ ರಾಯಲ್ಸ್ ಈ ಋತುವಿನಲ್ಲಿ ಎರಡು ಅತ್ಯಂತ ಸ್ಥಿರವಾದ ತಂಡಗಳಾಗಿವೆ. ಅಹಮದಾಬಾದ್‌ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಇಂದು ಫೈನಲ್ ಪಂದ್ಯ ನಡೆಯಲಿದೆ. ಶ್ರೇಷ್ಠ ಆಟಗಾರರಿಂದ ತುಂಬಿರುವ ಉಭಯ ತಂಡಗಳ ಅಂತಿಮ ಪಂದ್ಯವು ಭಾರೀ ನಿರೀಕ್ಷೆ ಹುಟ್ಟಿಸಿದೆ.

ಐಪಿಎಲ್ ಸೀಸನ್ ಆರಂಭದ 2008 ರಲ್ಲಿ ಮೊದಲ ಬಾರಿಗೆ ಕಪ್ ಗೆದ್ದ ಆರ್ ಆರ್ ಮತ್ತೊಮ್ಮೆ ಕಪ್ ಎತ್ತಿಹಿಡಿಯುತ್ತೋ ಅಥವಾ ಮೊದಲ ಬಾರಿಗೆ ಎಂಟ್ರಿ ಪಡೆದಿರೋ ಗುಜರಾತ್  ಟೈಟನ್ಸ್ ಆರಂಭದ ವರ್ಷದಲ್ಲೇ ಗೆಲುವು ದಾಖಲಿಸುತ್ತೋ ಅನ್ನೋ ನಿರೀಕ್ಷೆ ಜೋರಾಗಿದೆ.  ಅಭಿಮಾನಿಗಳ ಲೆಕ್ಕಾಚಾರದ ನಡುವೆ ಭಾರತೀಯ ಕ್ರಿಕೆಟ್ ತಂಡದ ಮಾಜಿ ಸ್ಪಿನ್ನರ್ ಹರ್ಭಜನ್ ಸಿಂಗ್ ಮತ್ತು ಪಾಕಿಸ್ತಾನ ಕ್ರಿಕೆಟ್ ತಂಡದ ಮಾಜಿ ವೇಗಿ ಶೋಯೆಬ್ ಅಖ್ತರ್ ಒಂದೇ ತಂಡವನ್ನು ಐಪಿಎಲ್ 2022 ಗೆಲ್ಲುವ ನೆಚ್ಚಿನ ತಂಡವೆಂದು ಆಯ್ಕೆ ಮಾಡಿದ್ದಾರೆ.

“ರಾಜಸ್ಥಾನ್ ರಾಯಲ್ಸ್ 2022 ರ ಐಪಿಎಲ್ ಅನ್ನು ಶೇನ್ ವಾರ್ನ್‌ಗಾಗಿ ಗೆಲ್ಲಬೇಕು ಎಂದು ಹೃದಯವು ಹೇಳುತ್ತದೆ. ಅವರು 14 ವರ್ಷಗಳ ನಂತರ ಪ್ರಶಸ್ತಿಯನ್ನು ಗೆದ್ದರೆ ಅದು ಅದ್ಭುತವಾಗಿದೆ. ನಾನು ಪ್ರಾಮಾಣಿಕವಾಗಿ ಗುಜರಾತ್ ಟೈಟನ್ಸ್ ಅಥವಾ ಲಕ್ನೋ ಸೂಪರ್ ಜೈಂಟ್ಸ್ ಐಪಿಎಲ್ ಗೆಲ್ಲಬೇಕೆಂದು ಬಯಸಿದ್ದೆ. ಗುಜರಾತ್ ಟೈಟಾನ್ಸ್ ಐಪಿಎಲ್ ಗೆಲ್ಲುತ್ತದೆ ಎಂದು ನನ್ನ ಹೃದಯ ಹೇಳುತ್ತದೆ” ಎಂದು ಶೋಯೆಬ್ ಅಖ್ತರ್ ಹೇಳಿದ್ದಾರೆ.ರಾಜಸ್ತಾನ್ ರಾಯಲ್ಸ್ ತಂಡದ ನಾಯಕರಾಗಿದ್ದ ಶೇನ್ ವಾರ್ನ್ 2008 ರಲ್ಲಿ ತಂಡಕ್ಕೆ ಜಯ ತಂದುಕೊಟ್ಟಿದ್ದರು.

“ನಾನು ಬಹುಶಃ ಗುಜರಾತ್‌ನೊಂದಿಗೆ ಹೋಗುತ್ತೇನೆ. ನನ್ನ ಹೃದಯವು ಗುಜರಾತ್‌ ಎಂದು ಹೇಳುತ್ತಿದೆ. ನನ್ನ ಮನಸ್ಸು ಕೂಡ ಅದೇ ಸೂಚನೆಯನ್ನು ನೀಡುತ್ತಿದೆ. ಜೋಸ್ ಬಟ್ಲರ್ ಉತ್ತಮ ಪ್ರದರ್ಶನ ನೀಡಿದರೆ, ಅದು ತುಂಬಾ ಅಪಾಯಕಾರಿ. ಆದರೆ ಜೋಸ್ ಬಟ್ಲರ್ ಅನ್ನು ಪರೀಕ್ಷಿಸುವ ಒಂದು ಬೌಲಿಂಗ್ ವಿಭಾಗವಿದ್ದರೆ, ಅದು ಗುಜರಾತ್‌ನ ಬೌಲಿಂಗ್‌ನಿಂದ ಸಾಧ್ಯ” ಎಂದು ಹರ್ಭಜನ್ ಸಿಂಗ್ ಹೇಳಿದ್ದಾರೆ.