ಶ್ರೀಲಂಕಾದಲ್ಲಿ ನಾಲ್ಕನೇ ಸಚಿವರ ರಾಜೀನಾಮೆ; ಶಾಂತಿ ಕಾಪಾಡಲು ಸೇನಾ ಮುಖ್ಯಸ್ಥರ ಮನವಿ

ಕೊಲಂಬೊ: ಜುಲೈ 10: ದ್ವೀಪ ರಾಷ್ಟ್ರ ಶ್ರೀಲಂಕಾದಲ್ಲಿ ಹದಗೆಟ್ಟ ಆರ್ಥಿಕ ಸ್ಥಿತಿಯಿಂದ ಧಗಧಗಿಸುತ್ತಿರುವ ದೇಶ ಭಾನುವಾರದ ವೇಳೆಗೆ ಕೂಲಾಗಿದೆ. ಆದ್ರೆ ಪರಿಸ್ಥಿತಿ ಈಗಲೂ ಬೂದಿಮುಚ್ಚಿದ ಕೆಂಡದಂತಿದೆ. ಶಾಂತಿಯನ್ನು ಕಾಪಾಡಲು ಶ್ರೀಲಂಕಾ ಸೇನಾ ಮುಖ್ಯಸ್ಥ ಜನರಲ್ ಶವೇಂದ್ರ ಸಿಲ್ವಾ ಇಂದು ಜನರ ಬೆಂಬಲವನ್ನು ಕೋರಿದ್ದಾರೆ. ಅಸಮಾಧಾನದ ನಡುವೆ ಕಳೆದ ಎರಡು ದಿನಗಳಿಂದ ನಾಲ್ವರು ಸಚಿವರು ಸಂಪುಟಕ್ಕೆ ರಾಜೀನಾಮೆ ನೀಡಿದ್ದಾರೆ.

ಧಮ್ಮಿಕಾ ಪೆರೇರಾ ಇಂದು ಹೂಡಿಕೆ ಪ್ರಚಾರ ಸಚಿವ ಸ್ಥಾನದಿಂದ ಕೆಳಗಿಳಿದ್ದಾರೆ. ಕಳೆದ ಎರಡು ದಿನಗಳಿಂದ ಅಸಮಾಧಾನದ ನಡುವೆ ಹರಿನ್ ಫೆರ್ನಾಂಡೋ, ಮಾನುಷ ನಾಣಯ್ಯ ಮತ್ತು ಬಂಡುಲ ಗುಣವರ್ಧನ ನಂತರ ಸಂಪುಟದಿಂದ ಹೊರಬಂದ ನಾಲ್ಕನೇ ಸಚಿವರಾಗಿದ್ದಾರೆ.

ಇಂದು ಕೊಲಂಬೊದಲ್ಲಿ ದರೋಡೆಗೊಳಗಾದ ಅಧ್ಯಕ್ಷೀಯ ಭವನದ ಮೂಲಕ ಪ್ರತಿಭಟನಾಕಾರರು ಸಂಚರಿಸುತ್ತಿದ್ದು, ದೇಶದಲ್ಲಿ ಶಾಂತಿ ಕಾಪಾಡಲು ಸಶಸ್ತ್ರ ಪಡೆಗಳು ಮತ್ತು ಪೊಲೀಸರನ್ನು ಬೆಂಬಲಿಸುವಂತೆ ಜನರಲ್ ಶವೇಂದ್ರ ಸಿಲ್ವಾ ಶ್ರೀಲಂಕಾ ಜನತೆಯನ್ನು ವಿನಂತಿಸಿದ್ದಾರೆ. ಅಧ್ಯಕ್ಷ ಗೋಟಬಯ ರಾಜಪಕ್ಸೆ ಅವರ ಭವನದಲ್ಲಿ ಲಕ್ಷಾಂತರ ರೂಪಾಯಿ ಪತ್ತೆಯಾಗಿದೆ ಎಂದು ಪ್ರತಿಭಟನಾಕಾರರು ಹೇಳಿದ್ದಾರೆ. ವಶಪಡಿಸಿಕೊಂಡ ಹಣವನ್ನು ಭದ್ರತಾ ಪಡೆಗಳಿಗೆ ಹಸ್ತಾಂತರಿಸಲಾಗಿದೆ ಎಂದು ವರದಿಯಾಗಿದೆ.

ಅಂತಾರಾಷ್ಟ್ರೀಯ ಹಣಕಾಸು ನಿಧಿ ಅಥವಾ IMF ನಗದು ಕೊರತೆಯಿರುವ ದೇಶದಲ್ಲಿ ನಡೆಯುತ್ತಿರುವ ಬೆಳವಣಿಗೆಗಳನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದೆ ಮತ್ತು ಐಎಂಎಫ್ ಬೆಂಬಲಿತ ಕಾರ್ಯಕ್ರಮದ ಕುರಿತು ಸಂವಾದವನ್ನು ಪುನರಾರಂಭಿಸಲು ರಾಜಕೀಯ ಬಿಕ್ಕಟ್ಟನ್ನು ಶೀಘ್ರದಲ್ಲೇ ಪರಿಹರಿಸಲಾಗುವುದು ಎಂದು ಆಶಿಸಿದೆ.

ಪ್ರಸ್ತುತ ಆರ್ಥಿಕ ಬಿಕ್ಕಟ್ಟಿನ ಸಂದರ್ಭದಲ್ಲಿ ಶ್ರೀಲಂಕಾಕ್ಕೆ ಸಹಾಯ ಮಾಡಲು ಪ್ರಯತ್ನಿಸುತ್ತಿದೆ ಎಂದು ಭಾರತ ಹೇಳಿದೆ. ಕೇಂದ್ರ ವಿದೇಶಾಂಗ ಸಚಿವ ಎಸ್ ಜೈಶಂಕರ್ ಅವರು ನೆರೆಯ ದೇಶದಲ್ಲಿ ಅಶಾಂತಿಯ ಹಿನ್ನೆಲೆಯಲ್ಲಿ ಸದ್ಯಕ್ಕೆ ಯಾವುದೇ ನಿರಾಶ್ರಿತರ ಬಿಕ್ಕಟ್ಟು ಇಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ಶ್ರೀಲಂಕಾದ ರಾಜಕಾರಣಿಗಳು ಮುಂದೆ ಬರಲು ಮತ್ತು ಜನರ ಅಸಮಾಧಾನವನ್ನು ಪರಿಹರಿಸಲು ದೀರ್ಘಾವಧಿಯ ಪರಿಹಾರಗಳನ್ನು ಸಾಧಿಸಲು ಶೀಘ್ರವಾಗಿ ಕೆಲಸ ಮಾಡಲು ಯುನೈಟೆಡ್ ಸ್ಟೇಟ್ಸ್ ಒತ್ತಾಯಿಸಿದೆ. ಜೊತೆಗೆ ಶ್ರೀಲಂಕಾದಲ್ಲಿ ಶನಿವಾರ ನಡೆದ ಹಿಂಸಾಚಾರವನ್ನು ಟೀಕಿಸಿದೆ. ಮತ್ತು ಪ್ರತಿಭಟನಾಕಾರರು ಮತ್ತು ಪತ್ರಕರ್ತರ ಮೇಲೆ ಯಾವುದೇ ದಾಳಿಯ ಬಗ್ಗೆ ದ್ವೀಪ ರಾಷ್ಟ್ರವನ್ನು ಎಚ್ಚರಿಸಿದೆ.

ಅಧ್ಯಕ್ಷ ಗೋತಬಯ ರಾಜಪಕ್ಸೆ ರಾಜೀನಾಮೆಗೆ ಒತ್ತಾಯಿಸಿ ಸಾವಿರಾರು ಪ್ರತಿಭಟನಾಕಾರರು ಶನಿವಾರ ಅವರ ಅಧಿಕೃತ ನಿವಾಸಕ್ಕೆ ನುಗ್ಗಿದರು. ಪ್ರಧಾನಿ ರನಿಲ್ ವಿಕ್ರಮಸಿಂಘೆ ಅವರು ರಾಜೀನಾಮೆ ನೀಡಲು ಮುಂದಾದ ನಂತರವೂ ಅವರ ಮನೆಗೆ ಬೆಂಕಿ ಹಚ್ಚಲಾಯಿತು.

ಪ್ರತಿಭಟನೆಯ ನಂತರ ಅಧ್ಯಕ್ಷ ರಾಜಪಕ್ಸೆ ಅವರು ಜುಲೈ 13 ರಂದು ರಾಜೀನಾಮೆ ನೀಡುವುದಾಗಿ ಸಂಸತ್ತಿನ ಸ್ಪೀಕರ್ ಮಹಿಂದ ಯಾಪಾ ಅಬೇವರ್ಧನ ಅವರಿಗೆ ತಿಳಿಸಿದ್ದಾರೆ.  ಆದರೆ ಪ್ರಧಾನಿ ವಿಕ್ರಮಸಿಂಘೆ ಅವರು ಸರ್ವಪಕ್ಷ ಸರ್ಕಾರವು ಅಧಿಕಾರ ವಹಿಸಿಕೊಳ್ಳಲು ಸಿದ್ಧವಾದ ತಕ್ಷಣ ರಾಜೀನಾಮೆ ನೀಡುವುದಾಗಿ ಹೇಳಿದರು. ರಾಜಪಕ್ಸೆ ರಾಜೀನಾಮೆ ನೀಡಿದ ನಂತರ ಸ್ಪೀಕರ್ ಹಂಗಾಮಿ ಅಧ್ಯಕ್ಷರಾಗುತ್ತಾರೆ. ನಂತರ ಹೊಸ ಅಧ್ಯಕ್ಷರನ್ನು ಆಯ್ಕೆ ಮಾಡಲು ಸಂಸದರ ನಡುವೆ ಚುನಾವಣೆ ನಡೆಯಲಿದೆ ಎಂದು ವರದಿಗಳು ತಿಳಿಸಿವೆ. ಅಧ್ಯಕ್ಷ ರಾಜಪಕ್ಸೆ ಪ್ರಸ್ತುತ ಎಲ್ಲಿದ್ದಾರೆ ಎಂಬುದು ಸದ್ಯಕ್ಕೆ ತಿಳಿದಿಲ್ಲ.