ಅಫ್ಘಾನಿಸ್ತಾನ ತೆರವು ಕಾರ್ಯ : ಟರ್ಕಿ ಸಹಕಾರಕ್ಕೆ ಬ್ಲಿಂಕೆನ್ ಮಾತುಕತೆ

ವಾಷಿಂಗ್ಟನ್, ಆಗಸ್ಟ್ 25: ಅಫ್ಘಾನಿಸ್ತಾನದಲ್ಲಿ ನಡೆಯುತ್ತಿರುವ ಸ್ಥಳಾಂತರಿಸುವ ಪ್ರಯತ್ನಗಳಲ್ಲಿ ಸಹಕಾರದ ಕುರಿತು ಅಮೆರಿಕ ವಿದೇಶಾಂಗ ಕಾರ್ಯದರ್ಶಿ ಆಂಟನಿ ಬ್ಲಿಂಕನ್ ಅವರು ಟರ್ಕಿಶ್ ವಿದೇಶಾಂಗ ಸಚಿವ ಮೆವ್ಲಟ್ ಕ್ಯಾವೊಸೊಗ್ಲು ಅವರೊಂದಿಗೆ ಮಾತುಕತೆ ನಡೆಸಿರುವುದಾಗಿ ವಿದೇಶಾಂಗ ಇಲಾಖೆಯ ವಕ್ತಾರ ನೆಡ್ ಪ್ರೈಸ್ ಹೇಳಿದ್ದಾರೆ.

"ವಿದೇಶಾಂಗ ಕಾರ್ಯದರ್ಶಿ ಆಂಟನಿ ಜೆ. ಬ್ಲಿಂಕನ್ ಅವರು ಟರ್ಕಿಶ್ ವಿದೇಶಾಂಗ ಸಚಿವ ಮೆವ್ಲಟ್ ಕ್ಯಾವೊಸೊಗ್ಲು ಅವರೊಂದಿಗೆ ಮಾತನಾಡುತ್ತಾ ಅಫ್ಘಾನಿಸ್ತಾನದಲ್ಲಿ ನಮ್ಮ ನಿರಂತರ ಸಹಕಾರ ಮತ್ತು ನಮ್ಮ ನಾಗರಿಕರು, ಮಿತ್ರರು ಮತ್ತು ಪಾಲುದಾರರ ಸುರಕ್ಷಿತ ಮತ್ತು ಕ್ರಮಬದ್ಧವಾದ ಸ್ಥಳಾಂತರವನ್ನು ಖಚಿತಪಡಿಸಿಕೊಳ್ಳಲು ನಮ್ಮ ಪ್ರಯತ್ನಗಳನ್ನು ಚರ್ಚಿಸಿದರು" ಎಂದು ಮಂಗಳವಾರ ತಿಳಿಸಿದ್ದಾರೆ.

ಅಮೆರಿಕ ಸರ್ಕಾರವು ಕಾಬೂಲ್ ವಿಮಾನ ನಿಲ್ದಾಣದಿಂದ ಸ್ಥಳಾಂತರ ಕಾರ್ಯವನ್ನು ಚುರುಕುಗೊಳಿಸಿದ್ದು, ಈ ಮೂಲಕ ತಾಲಿಬಾನ್ ಜೊತೆ ಒಪ್ಪಂದ ಮಾಡಿಕೊಂಡಿದ್ದ ಆಗಸ್ಟ್ 31 ರ ಗಡುವನ್ನು ಪೂರೈಸುವ ಪ್ರಯತ್ನದಲ್ಲಿದೆ.   ಒಂದು ವೇಳೆ ಸ್ಥಳಾಂತರಿಸುವ ಕಾರ್ಯಾಚರಣೆಗೆ ತಾಲಿಬಾನ್ ಸಹಕರಿಸದಿದ್ದರೆ ಅಮೆರಿಕ ತನ್ನ ಸಂಪೂರ್ಣ ಸೇನೆಯನ್ನು ಹಿಂದಕ್ಕೆ ಪಡೆಯುವ ಗಡುವು ಪಾಲನೆ ಅನಿಶ್ಚಿತ ಎಂದು ಬಿಡೆನ್ ಆಡಳಿತ ಮಂಗಳವಾರ ಹೇಳಿದೆ. 

ಸೋಮವಾರ, ಟರ್ಕಿಯ ಆಡಳಿತಾರೂಢ ನ್ಯಾಯ ಮತ್ತು ಅಭಿವೃದ್ಧಿ ಪಕ್ಷದ ವಕ್ತಾರ ಒಮರ್ ಸೆಲಿಕ್, ಅಂಕಾರಾವೊಂದೇ ಒಬ್ಬ ಅಫ್ಘಾನಿಸ್ತಾನವನ್ನು ಒಪ್ಪಲು ಸಾಧ್ಯವಿಲ್ಲ, ಟರ್ಕಿಯು ನಿರಾಶ್ರಿತರ ಶಿಬಿರವಲ್ಲ ಎಂದು ಹೇಳಿದ್ದಾರೆ. ಟರ್ಕಿಶ್ ಅಧ್ಯಕ್ಷ ರಿಸೆಪ್ ತಯ್ಯಿಪ್ ಎರ್ಡೊಗನ್ ವಾರಾಂತ್ಯದಲ್ಲಿ ಜರ್ಮನ್ ಚಾನ್ಸೆಲರ್ ಏಂಜೆಲಾ ಮರ್ಕೆಲ್ ಅವರನ್ನು ಭೇಟಿಯಾಗಿ ಸ್ಥಳಾಂತರಕ್ಕಾಗಿ ಅಂತಾರಾಷ್ಟ್ರೀಯ ನೆರವು ಸಂಸ್ಥೆಗಳಿಗೆ ಸಹಾಯ ಮಾಡಲು ಒಟ್ಟಾಗಿ ಕೆಲಸ ಮಾಡಲು ಸಮ್ಮತಿಸಿದ್ದಾರೆ.