ಶ್ರೀಮಂತ ರಾಷ್ಟ್ರಗಳ ತುರ್ತು ಸಭೆ: ಒಗ್ಗಟ್ಟು ಪ್ರದರ್ಶನ

ಬ್ರಸೆಲ್ಸ್: ಮಾರ್ಚ್ 25: ಉಕ್ರೇನ್ ಮೇಲೆ ರಷ್ಯಾ ಮಿಲಿಟರಿ ಕಾರ್ಯಾಚರಣೆ ಕೈಗೊಂಡ ಬಳಿಕ ಇದುವರೆಗೆ ನಡೆದ ಅಂತಾರಾಷ್ಟ್ರೀಯ ಸಭೆಗಳಲ್ಲಿ ವಿಶ್ವದ ನಾಯಕರು ಒಗ್ಗಟ್ಟು ಪ್ರದರ್ಶನ ಮಾಡಿದ್ದಾರೆ ಎಂದು ಬಿಬಿಸಿ ಹೇಳಿದೆ.

ನ್ಯಾಟೋ ಡಿಫೆನ್ಸಿವ್ ಅಲೈಯನ್ಸ್, ಯುರೋಪಿಯನ್ ಯೂನಿಯನ್ ಮತ್ತು ವಿಶ್ವದ ಶ್ರೀಮಂತ ರಾಷ್ಟ್ರಗಳ – ಜಿ7 ಗುಂಪು ಉಕ್ರೇನ್‌ನಲ್ಲಿ ನಡೆಯುತ್ತಿರುವ ಸಂಘರ್ಷಕ್ಕೆ ಸಂಬಂಧಿಸಿದಂತೆ ಬ್ರಸೆಲ್ಸ್‌ನಲ್ಲಿ ತುರ್ತು ಶೃಂಗಸಭೆಗಳನ್ನು ನಡೆಸಿತು.

ಈ ಎಲ್ಲಾ ಶೃಂಗಸಭೆಗಳ ಮುಖ್ಯ ವಿಷಯವೆಂದರೆ ಈ ಬಿಕ್ಕಟ್ಟಿನ ಸಮಯದಲ್ಲಿ ಉಕ್ರೇನ್‌ನೊಂದಿಗೆ ಒಗ್ಗಟ್ಟು ತೋರಿಸುವುದಾಗಿದೆ. ಈ ಸಭೆಗಳಲ್ಲಿ ವಿಶ್ವ ನಾಯಕರು ಉಕ್ರೇನ್‌ಗೆ ಮಿಲಿಟರಿ ಮತ್ತು ಮಾನವೀಯ ನೆರವು ನೀಡಲು ವಾಗ್ದಾನ ಮಾಡಿದರು.

ಏತನ್ಮಧ್ಯೆ, ನ್ಯಾಟೋ ಡಿಫೆನ್ಸಿವ್ ಅಲೈಯನ್ಸ್ ಪೂರ್ವ ಯುರೋಪ್ನಲ್ಲಿ ಪಡೆಗಳ ಗಮನಾರ್ಹ ಹೆಚ್ಚಳವನ್ನು ಅನುಮೋದಿಸಿತು, ಹೆಚ್ಚುವರಿ ಪಡೆಗಳನ್ನು ಸ್ಲೋವಾಕಿಯಾ, ಹಂಗೇರಿ, ಬಲ್ಗೇರಿಯಾ ಮತ್ತು ರೊಮೇನಿಯಾಗೆ ಕಳುಹಿಸುವ ತೀರ್ಮಾನ ಕೈಗೊಳ್ಳಲಾಯಿತು.

ಈ ಮಧ್ಯೆ ಬ್ರಿಟಿಷ್ ಪ್ರಧಾನಿ ಬೋರಿಸ್ ಜಾನ್ಸನ್ ಬ್ರಸೆಲ್ಸ್‌ನಲ್ಲಿ ಬ್ರಿಟನ್ 6,000 ಕ್ಷಿಪಣಿಗಳನ್ನು ಉಕ್ರೇನ್‌ಗೆ ಕಳುಹಿಸುವುದಾಗಿ ಘೋಷಣೆ ಮಾಡಿದರು. ಜೊತೆಗೆ ಉಕ್ರೇನ್ ತನ್ನ ಸೈನಿಕರ ಸಂಬಳವನ್ನು ಪಾವತಿಸಲು ಸಹಾಯ ಮಾಡಲು 25 ಮಿಲಿಯನ್ ಪೌಂಡ್ ನೀಡುವುದಾಗಿ ತಿಳಿಸಿದರು.

ಇದೇ ಸಮಯದಲ್ಲಿ ರಷ್ಯಾವು ರಾಸಾಯನಿಕ ಅಥವಾ ಪರಮಾಣು ಶಸ್ತ್ರಾಸ್ತ್ರಗಳನ್ನು ಬಳಸಿದರೆ ಪರಿಣಾಮಗಳನ್ನು ಲೆಕ್ಕಿಸದೆ ಪ್ರತೀಕಾರಕ್ಕೆ ಒತ್ತಾಯಿಸಲಾಗುವುದು ಎಂದು ವಿಶ್ವ ನಾಯಕರು ಎಚ್ಚರಿಕೆ ನೀಡಿದರು.

ಈ ಬೆಳವಣಿಗೆಗಳ ಬೆನ್ನಲ್ಲೇ, ಪಾಶ್ಚಿಮಾತ್ಯ ದೇಶಗಳು ಸಂಘರ್ಷ ಮತ್ತು ಉದ್ವಿಗ್ನತೆಯನ್ನು ಮುಂದುವರಿಸಲು ಬಯಸುತ್ತಿವೆ ಎಂದು ರಷ್ಯಾ ಆರೋಪಿಸಿದೆ.