ಬಾಂಗ್ಲಾದೇಶ : ಮಸೀದಿಯ ಎಸಿ ಸ್ಫೋಟದಲ್ಲಿ 12 ಸಾವು, ಹಲವರಿಗೆ ಗಾಯ

ಢಾಕಾ, ಸೆಪ್ಟೆಂಬರ್  05: ಬಾಂಗ್ಲಾದೇಶದ ರಾಜಧಾನಿ ಢಾಕಾದಿಂದ 20 ಕಿ.ಮೀ ದೂರದಲ್ಲಿರುವ ನಾರಾಯಂಗಂಜ್ ಜಿಲ್ಲೆಯಲ್ಲಿ ಶುಕ್ರವಾರ ರಾತ್ರಿ ಮಸೀದಿಯ ಹವಾನಿಯಂತ್ರಣಗಳು ಸ್ಫೋಟಗೊಂಡು ಬಾಲಕ ಸೇರಿದಂತೆ 12 ಜನರು ಸಾವನ್ನಪ್ಪಿದ್ದಾರೆ ಮತ್ತು ಹಲವಾರು ಮಂದಿ ಗಂಭೀರವಾದ ಸುಟ್ಟ ಗಾಯಗಳಿಗೆ ಒಳಗಾಗಿದ್ದಾರೆ ಎಂದು ಅಧಿಕಾರಿಯೊಬ್ಬರು ಶನಿವಾರ ಬೆಳಿಗ್ಗೆ ತಿಳಿಸಿದ್ದಾರೆ.

ಶನಿವಾರ ಬೆಳಿಗ್ಗೆ ತನಕ 12 ಜನರು ಸುಟ್ಟಗಾಯಗಳೊಂದಿಗೆ ಸಂಸ್ಥೆಗೆ ದಾಖಲಾದ ನಂತರ ಸಾವನ್ನಪ್ಪಿದ್ದಾರೆ" ಎಂದು ಢಾಕಾದ ಶೇಖ್ ಹಸೀನಾ ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಬರ್ನ್ ಅಂಡ್ ಪ್ಲಾಸ್ಟಿಕ್ ಸರ್ಜರಿಯ ಸಂಯೋಜಕರಾದ ಸಮಂತಾ ಲಾಲ್ ಸೇನ್ ಪತ್ರಕರ್ತರಿಗೆ ಹೇಳಿದ್ದಾರೆ.

ಕನಿಷ್ಠ 37 ಮಂದಿ ಗಾಯಗೊಂಡವರನ್ನು ಆಸ್ಪತ್ರೆಗಳಿಗೆ ದಾಖಲಿಸಲಾಗಿದೆ.  ಬಲಿಯಾದವರಲ್ಲಿ ಹೆಚ್ಚಿನವರು ಶೇಕಡಾ 60 ರಿಂದ 70 ರಷ್ಟು ಸುಟ್ಟಗಾಯಗಳಿಂದ ಬಳಲುತ್ತಿದ್ದು, ಇತರ 25 ಜನರ ಆರೋಗ್ಯ ಸ್ಥಿತಿಯೂ ಗಂಭೀರವಾಗಿದೆ.

ರಾತ್ರಿಯ ಪ್ರಾರ್ಥನೆಯ ನಂತರ ಶುಕ್ರವಾರ ಸ್ಥಳೀಯ ಸಮಯ ಸುಮಾರು 9  ಗಂಟೆಗೆ ಮಸೀದಿಯಿಂದ ಹೊರಡುವಾಗ ಅನಿಲ ಸೋರಿಕೆಯಾಗಿರಬಹುದು ಎಂದು ಅಗ್ನಿಶಾಮಕ ಅಧಿಕಾರಿಗಳು ಶಂಕಿಸಿದ್ದಾರೆ.

ಮೂರು ಅಂತಸ್ತಿನ ಮಸೀದಿಯಲ್ಲಿ ಸುಮಾರು 100 ಆರಾಧಕರು ಇದ್ದಾಗ ನೆಲ ಮಹಡಿಯಲ್ಲಿರುವ ಎಲ್ಲಾ ಎಂಟು ಹವಾನಿಯಂತ್ರಣಗಳು ಜ್ವಾಲೆಗೆ ಸಿಲುಕಿದವು.

ಬೃಹತ್ ಸ್ಫೋಟದಿಂದಾಗಿ ಮಸೀದಿಯ ಕಿಟಕಿ ಗಾಜು ಬೀದಿಗೆ ಸಿಡಿದಿದ್ದು, ಸೀಲಿಂಗ್ ಫ್ಯಾನ್‌ಗಳು, ತಂತಿಗಳು ಮತ್ತು ಎಲೆಕ್ಟ್ರಿಕ್ ಸ್ವಿಚ್ ಬೋರ್ಡ್‌ಗಳು ಸುಟ್ಟುಹೋಗಿವೆ ಎಂದು ನಾರಾಯಂಗಂಜ್‌ನ ಫತುಲ್ಲಾ ಪೊಲೀಸ್ ಠಾಣೆಯ ಅಧಿಕಾರಿ ಶಫಿಕುಲ್ ಇಸ್ಲಾಂ ಹೇಳಿದ್ದಾರೆ.