ಕೊಲೆಯ ಆರೋಪದ ಮೇಲೆ ಕುಸ್ತಿಪಟುವನ್ನು ಗಲ್ಲಿಗೇರಿಸಿದ ಇರಾನ್
ನವದೆಹಲಿ, ಸೆಪ್ಟೆಂಬರ್ .13: ಎರಡು ವರ್ಷಗಳ ಹಿಂದೆ ಸರ್ಕಾರಿ ವಿರೋಧಿ ಪ್ರತಿಭಟನೆಯಲ್ಲಿ ಪಾಲ್ಗೊಂಡ ನಂತರ ಕೊಲೆ ಆರೋಪಿಯಾಗಿದ್ದ 27 ವರ್ಷದ ಕುಸ್ತಿಪಟು ನವೀದ್ ಅಫ್ಕರಿ ಅವರನ್ನು ಗಲ್ಲಿಗೇರಿಸಲಾಗಿದೆ ಎಂದು ಇರಾನ್ ತಿಳಿಸಿದೆ.
ಕುಸ್ತಿಪಟು ನವೀದ್ ಅಫ್ಕರಿ ಅವರನ್ನು ಶನಿವಾರ ಬೆಳಿಗ್ಗೆ ದಕ್ಷಿಣ ನಗರದ ಶಿರಾಜ್‌ನ ಜೈಲಿನಲ್ಲಿ ಗಲ್ಲಿಗೇರಿಸಲಾಯಿತು ಎಂದು ಅವರ ವಕೀಲರು ಖಚಿತಪಡಿಸಿದ್ದಾರೆ. 2018ರಲ್ಲಿ ದೇಶವನ್ನು ಆವರಿಸಿದ್ದ ಸರ್ಕಾರಿ ವಿರೋಧಿ ಪ್ರತಿಭಟನೆಗಳ ಕೇಂದ್ರವಾದ ಶಿರಾಝ್‌ನಲ್ಲಿನ ಅಶಾಂತಿಯ ನಡುವೆ ನೀರಿನ ಉಪಯುಕ್ತತೆಯ ಕೆಲಸಗಾರನನ್ನು ಮಾರಣಾಂತಿಕವಾಗಿ ಇರಿದ ಆರೋಪವನ್ನು ನವೀದ್ ಅಫ್ಕರಿ ಮೇಲೆ ಹೊರಿಸಲಾಗಿತ್ತು.
ಅವರ ವಿರುದ್ಧದ ಆರೋಪಗಳನ್ನು ಇರಾನ್ ಮತ್ತು ವಿದೇಶಗಳಲ್ಲಿ ವ್ಯಾಪಕವಾದ ಸಂದೇಹಗಳಿಗೆ ಎಡೆ ಮಾಡಿಕೊಟ್ಟಿದೆ. ಅನೇಕ ಸರ್ಕಾರಿ ವಿಮರ್ಶಕರು ಭಿನ್ನಾಭಿಪ್ರಾಯವನ್ನು ತಣ್ಣಗಾಗಿಸಲು ನವೀದ್ ಅಫ್ಕರಿ ಅವರನ್ನು ಉದಾಹರಣೆಯಾಗಿ ಬಳಸಲಾಗುತ್ತಿದೆ ಎಂದು ಹೇಳಿದ್ದಾರೆ.
ಜೈಲಿನಿಂದ ಹೊರಬಿದ್ದಿರುವ ಆಡಿಯೋ ಟೇಪ್‌ ಪ್ರಕಾರ, ಅಫ್ಕರಿ ಅವರು ಅಪರಾಧವನ್ನು ತಪ್ಪಾಗಿ ಒಪ್ಪಿಕೊಳ್ಳುವವರೆಗೂ ಹಿಂಸೆಗೆ ಒಳಗಾಗಿದ್ದರು ಎಂದು ತಿಳಿದುಬಂದಿದೆ. ಶನಿವಾರ ಇರಾನ್ ಅಧಿಕಾರಿಗಳು ನವೀದ್ ಅಫ್ಕರಿ ಅವರಿಗೆ ತಮ್ಮ ಕುಟುಂಬದೊಂದಿಗೆ ಅಂತಿಮ ಭೇಟಿಯನ್ನು ನೀಡದೆ ಮರಣದಂಡನೆ ನಡೆಸಿದ್ದಾರೆ ಎಂದು ಕುಸ್ತಿಪಟು ಪರ ವಕೀಲ ಹೇಳಿದ್ದಾರೆ.
"ನವೀದ್ ಅವರ ಕೊನೆಯ ಭೇಟಿಗೆ ನಿರಾಕರಿಸಿದ ನೀವು ಎಷ್ಟು ತುರಾತುರಿಯಲ್ಲಿದ್ದೀರಿ?" ಎಂದು ವಕೀಲ ಹೊಸೆನ್ ಯೂನೆಸಿ ಟ್ವಿಟ್ಟರ್‌ನಲ್ಲಿ ಪೋಸ್ಟ್ ಮಾಡಿದ್ದಾರೆ.
ಅಫ್ಕರಿಯವರ ಪರ ಕಾನೂನು ತಂಡವು ಪ್ರಕರಣದ ನ್ಯಾಯಾಂಗ ಪರಿಶೀಲನೆಗಾಗಿ ಕೊನೆಯ ಹಂತದ ಸಿದ್ದತೆಗಳನ್ನು ನಡೆಸುತ್ತಿತ್ತು. ಆದರೆ, ಅನಿರೀಕ್ಷಿತವಾಗಿ ಅಧಿಕಾರಿಗಳು ತುರಾತುರಿಯಲ್ಲಿ ನೇಣಿಗೇರಿಸಿದ್ದಾರೆ. ಅಫ್ಕರಿಯವರಿಗೆ ಗಲ್ಲು ಶಿಕ್ಷೆ ನೀಡಿರುವ ವಿಷಯ ತಿಳಿದು ಅಂತಾರಾಷ್ಟ್ರೀಯ ಒಲಿಂಪಿಕ್ಸ್‌ ಸಮಿತಿ ಆಘಾತಕ್ಕೆ ಒಳಗಾಗಿದೆ.
ಅರೆಸ್ಟ್‌ ಆಗುವುದಕ್ಕೂ ಮುನ್ನ ನವೀದ್ ಅಫ್ಕರಿ ಬಗ್ಗೆ ಇರಾನ್‌ನಲ್ಲಿಯೂ ಅಷ್ಟೊಂದು ಯಾರಿಗೂ ಗೊತ್ತಿರಲಿಲ್ಲ. ಆದರೆ, ಅವರು ತಮ್ಮ ಸುತ್ತಮುತ್ತ ಮೆಚ್ಚುಗೆ ಗಳಿಸಿದ್ದರು. ಇರಾನ್‌ನಲ್ಲಿ ಕುಸ್ತಿಯ ಜನಪ್ರಿಯತೆಯು ಸರ್ಕಾರಕ್ಕೆ ಅವರ ಮಹತ್ವವನ್ನು ಭಾಗಶಃ ವಿವರಿಸುತ್ತದೆ ಎಂದು ಅವರ ಬೆಂಬಲಿಗರು ಹೇಳುತ್ತಾರೆ.
ಇರಾನ್ ಕಳೆದ ವರ್ಷ 251 ಜನರನ್ನು ಗಲ್ಲಿಗೇರಿಸಿದೆ ಎಂದು ಅಮ್ನೆಸ್ಟಿ ಇಂಟರ್‌ನ್ಯಾಷನಲ್‌ ತಿಳಿಸಿದೆ. ಜೈಲಿನಿಂದ ಅವರ ಕೊನೆಯ ಧ್ವನಿಮುದ್ರಣವೊಂದರಲ್ಲಿ ಅಫ್ಕರಿ ಅವರ ಮನವಿಯನ್ನು ಇರಾನಿನ ಅಧಿಕಾರಿಗಳು ಕೇಳಲು ಬಯಸಿಲ್ಲ ಎಂಬುದನ್ನು ತಿಳಿದುಬಂದಿದೆ.
