ಗಣೇಶ್ ಆಚಾರ್ಯ ಅವರ ‘ಡಸ್ಟ್ ಟು ಸ್ಟಾರ್‌ಡಸ್ಟ್’ ಚಿತ್ರಕ್ಕೆ ಅಕ್ಷಯ್ ಕುಮಾರ್, ಅಜಯ್ ದೇವಗನ್, ರಣವೀರ್ ಸಿಂಗ್ ಸೇರಿದಂತೆ ಬಾಲಿವುಡ್ ತಾರೆಯರ ಬೆಂಬಲ
ಮುಂಬೈ, ಅಕ್ಟೋಬರ್ 13 (UNI): ಗಣೇಶ್ ಆಚಾರ್ಯ ಅವರ ಮುಂಬರುವ ‘ಗಣೇಶ್: ಡಸ್ಟ್ ಟು ಸ್ಟಾರ್‌ಡಸ್ಟ್’ ಚಿತ್ರದ ಟ್ರೇಲರ್ ಬಿಡುಗಡೆಯಾದ ಬೆನ್ನಲ್ಲೇ ಬಾಲಿವುಡ್‌ನ ಹಲವು ಗಣ್ಯರು ಚಿತ್ರಕ್ಕೆ ಬೆಂಬಲ ವ್ಯಕ್ತಪಡಿಸಿದ್ದಾರೆ. ಅಕ್ಷಯ್ ಕುಮಾರ್, ಅಜಯ್ ದೇವಗನ್, ಸಂಜಯ್ ದತ್, ರಣವೀರ್ ಸಿಂಗ್, ಕೃತಿ ಸನನ್ ಮತ್ತು ವಿಕ್ಕಿ ಕೌಶಲ್ ಸೇರಿದಂತೆ ಹಲವು ನಟರು, ನೃತ್ಯ ನಿರ್ದೇಶಕ ಗಣೇಶ್ ಆಚಾರ್ಯ ಅವರ ಹೋರಾಟ ಮತ್ತು ಯಶಸ್ಸಿನ ಸ್ಪೂರ್ತಿದಾಯಕ ಪಯಣವನ್ನು ಶ್ಲಾಘಿಸಿದ್ದಾರೆ.
ಈ ಚಿತ್ರವು 2026ರ ಡಿಸೆಂಬರ್ 11ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.
ಚಿತ್ರದ ಟ್ರೇಲರ್ ಹಂಚಿಕೊಂಡ ಅಕ್ಷಯ್ ಕುಮಾರ್, ಗಣೇಶ್ ಆಚಾರ್ಯ ಅವರೊಂದಿಗಿನ ತಮ್ಮ ದೀರ್ಘಕಾಲದ ಒಡನಾಟವನ್ನು ಸ್ಮರಿಸಿದ್ದಾರೆ. ತಮ್ಮ ಆರಂಭಿಕ ದಿನಗಳ ಹಾಡೊಂದಕ್ಕೆ ಆಚಾರ್ಯ ಅವರು ನೃತ್ಯ ನಿರ್ದೇಶನ ಮಾಡಿದ್ದನ್ನು ನೆನಪಿಸಿಕೊಂಡ ಅವರು, ಸಾಮಾನ್ಯ ಹಿನ್ನೆಲೆಯಿಂದ ಬಂದ ಆಚಾರ್ಯ ಅವರು ತಮ್ಮ ಪರಿಶ್ರಮ ಮತ್ತು ಪ್ರತಿಭೆಯ ಮೂಲಕ ಯಶಸ್ಸು ಗಳಿಸಿರುವುದು ಸ್ಪೂರ್ತಿದಾಯಕವಾಗಿದೆ ಎಂದು ಹೇಳಿದ್ದಾರೆ. ಅಲ್ಲದೆ, ತಮ್ಮ ಸ್ನೇಹಿತನ ಚಿತ್ರಕ್ಕೆ ಶುಭ ಹಾರೈಸಿದ್ದಾರೆ.
ಕೃತಿ ಸನನ್ ಅವರು, ಗಣೇಶ್ ಆಚಾರ್ಯ ಅವರ ನೃತ್ಯ ನಿರ್ದೇಶನದಲ್ಲಿ ‘ವಿಸಲ್ ಬಜಾ’ ಮತ್ತು ‘ಪರಮ್ ಸುಂದರಿ’ಯಂತಹ ಹಾಡುಗಳಲ್ಲಿ ಕೆಲಸ ಮಾಡಿರುವುದು ಗೌರವದ ಸಂಗತಿ ಎಂದು ಹೇಳಿದ್ದಾರೆ. ಟ್ರೇಲರ್ ಅನ್ನು ಶ್ಲಾಘಿಸಿದ ಅವರು, ಆಚಾರ್ಯ ಅವರ ಸ್ಪೂರ್ತಿದಾಯಕ ಪಯಣವನ್ನು ಬೆಳ್ಳಿತೆರೆಯ ಮೇಲೆ ವೀಕ್ಷಿಸಲು ಕಾತರರಾಗಿರುವುದಾಗಿ ತಿಳಿಸಿದ್ದಾರೆ.
ವಿಕ್ಕಿ ಕೌಶಲ್ ಅವರು, ಆಚಾರ್ಯ ಅವರೊಂದಿಗೆ ಕೆಲಸ ಮಾಡುವ ಸಂದರ್ಭದಲ್ಲಿ ಅವರ ಜೀವನದ ಹಲವು ಘಟನೆಗಳನ್ನು ಕೇಳಿದ್ದಾಗಿ ಹೇಳಿದ್ದಾರೆ. ಅವರ ಪಯಣ ನಿಜಕ್ಕೂ ‘ಡಸ್ಟ್ ಟು ಸ್ಟಾರ್‌ಡಸ್ಟ್’ ಅಂದರೆ ಧೂಳಿನಿಂದ ನಕ್ಷತ್ರದವರೆಗಿನ ಪಯಣವಾಗಿದೆ ಎಂದು ಬಣ್ಣಿಸಿದ ಅವರು, ಆಚಾರ್ಯ ಅವರ ಕಥೆ ಇಂದಿಗೂ ಜನರಿಗೆ ಸ್ಫೂರ್ತಿ ನೀಡುತ್ತಿದೆ ಎಂದಿದ್ದಾರೆ.
ವರುಣ್ ಧವನ್ ಕೂಡ ಚಿತ್ರದ ಟ್ರೇಲರ್ ಮತ್ತು ನಿರ್ದೇಶನವನ್ನು ಶ್ಲಾಘಿಸಿದ್ದು, ಆಚಾರ್ಯ ಅವರ ಕಥೆ ಇಡೀ ಪೀಳಿಗೆಗೆ ಸ್ಫೂರ್ತಿ ನೀಡುವ ಸಾಮರ್ಥ್ಯ ಹೊಂದಿದೆ ಎಂದು ಹೇಳಿದ್ದಾರೆ. ರಣವೀರ್ ಸಿಂಗ್ ಅವರು ಆಚಾರ್ಯ ಅವರ ಪಯಣವನ್ನು ಸ್ಪೂರ್ತಿದಾಯಕ ಎಂದು ಬಣ್ಣಿಸಿದರೆ, ಟೈಗರ್ ಶ್ರಾಫ್ ಟ್ರೇಲರ್ ಅನ್ನು ಮೆಚ್ಚಿಕೊಂಡಿದ್ದಾರೆ.
ರಿತೇಶ್ ದೇಶಮುಖ್, ಸೋನಂ ಬಾಜ್ವಾ, ತಮನ್ನಾ ಭಾಟಿಯಾ ಮತ್ತು ಪರಿಣೀತಿ ಚೋಪ್ರಾ ಸೇರಿದಂತೆ ಇತರ ನಟರೂ ಚಿತ್ರದ ಬಗ್ಗೆ ತಮ್ಮ ಉತ್ಸಾಹ ವ್ಯಕ್ತಪಡಿಸಿದ್ದಾರೆ. ಸುನೀಲ್ ಶೆಟ್ಟಿ, ಜಾನಿ ಲಿವರ್, ಮನೀಶ್ ಪೌಲ್, ಪ್ರಭುದೇವ, ಸೋನು ಸೂದ್, ವಿದ್ಯಾ ಬಾಲನ್, ಮೌನಿ ರಾಯ್ ಮತ್ತು ಮೃಣಾಲ್ ಠಾಕೂರ್ ಸೇರಿದಂತೆ ಹಲವು ಗಣ್ಯರು ಚಿತ್ರತಂಡಕ್ಕೆ ಶುಭ ಹಾರೈಸಿದ್ದಾರೆ. ಅಜಯ್ ದೇವಗನ್ ಮತ್ತು ಸಂಜಯ್ ದತ್ ಕೂಡ ಚಿತ್ರದ ಟ್ರೇಲರ್ ಹಂಚಿಕೊಳ್ಳುವ ಮೂಲಕ ತಮ್ಮ ಬೆಂಬಲ ಸೂಚಿಸಿದ್ದಾರೆ.
‘ಗಣೇಶ್: ಡಸ್ಟ್ ಟು ಸ್ಟಾರ್‌ಡಸ್ಟ್’ ಚಿತ್ರದ ಮೂಲಕ ಗಣೇಶ್ ಆಚಾರ್ಯ ತಮ್ಮ ಜೀವನದ ಕಥೆಯನ್ನು ಬೆಳ್ಳಿತೆರೆಗೆ ತರಲಿದ್ದಾರೆ. ತಮ್ಮ ಹೋರಾಟ, ಮಹತ್ವಾಕಾಂಕ್ಷೆ, ತ್ಯಾಗ ಮತ್ತು ಅಂತಿಮವಾಗಿ ಸಾಧಿಸಿದ ಯಶಸ್ಸಿನ ಕಥೆಯನ್ನು ಈ ಚಿತ್ರದಲ್ಲಿ ತೆರೆದಿಡಲಿದ್ದಾರೆ. ಹಲವು ವರ್ಷಗಳಿಂದ ಹಿಂದಿ ಚಿತ್ರರಂಗದ ಅನೇಕ ಜನಪ್ರಿಯ ಹಾಡುಗಳಿಗೆ ನೃತ್ಯ ನಿರ್ದೇಶನ ಮಾಡಿರುವ ಆಚಾರ್ಯ, ವಿವಿಧ ತಲೆಮಾರುಗಳ ನಟರೊಂದಿಗೆ ಕೆಲಸ ಮಾಡಿದ್ದಾರೆ.
ಈ ಚಿತ್ರದಲ್ಲಿ ಶಿವಾಂಶು ಸೋನಿ, ಅಲೋಕ್ ಶಾ, ಸುಕನ್ಯಾ ಕಲನ್ ಮತ್ತು ಸಾಕ್ಷಿ ಪವಾರ್ಸ್ಕರ್ ನಟಿಸಿದ್ದಾರೆ.
ವಿ2ಎಸ್ ಪ್ರೊಡಕ್ಷನ್ಸ್ ಆ್ಯಂಡ್ ಎಂಟರ್‌ಟೈನ್‌ಮೆಂಟ್ ಬ್ಯಾನರ್ ಅಡಿಯಲ್ಲಿ ಸೌಂದರ್ಯ ಆಚಾರ್ಯ ಈ ಚಿತ್ರವನ್ನು ನಿರ್ಮಿಸಿದ್ದಾರೆ. ಗಣೇಶ್ ಆಚಾರ್ಯ ಅವರೇ ಚಿತ್ರದ ಕಥೆ ಬರೆದು ನಿರ್ದೇಶನ ಮಾಡಿದ್ದಾರೆ. ಚಿತ್ರದ ಚಿತ್ರಕಥೆ ಮತ್ತು ಸಂಭಾಷಣೆಗಳನ್ನು ದಿಗಂಗನಾ ಸೂರ್ಯವಂಶಿ ಹಾಗೂ ಗಣೇಶ್ ಆಚಾರ್ಯ ರಚಿಸಿದ್ದಾರೆ.
ಜುನೈದ್ ಕುಮಾರ್ ಸಂಗೀತ ಮತ್ತು ಹಿನ್ನೆಲೆ ಸಂಗೀತ ಸಂಯೋಜಿಸಿದ್ದು, ಸಮೀರ್ ಅಂಜಾನ್ ಮತ್ತು ಗಣೇಶ್ ಆಚಾರ್ಯ ಗೀತ ಸಾಹಿತ್ಯ ರಚಿಸಿದ್ದಾರೆ.
