ಗದಗ 07: ಜಾಗತಿಕ ತಾಪಮಾನ ಮತ್ತು ಪರಿಸರ ಮಾಲಿನ್ಯದ ಭೀಕರತೆಯ ವಿರುದ್ಧ ಕೇವಲ ಭಾಷಣ ಮಾಡದೆ, ಪ್ರಾಯೋಗಿಕ ಬದಲಾವಣೆಗೆ ಮುನ್ನುಡಿ ಬರೆಯಲು ದಾರೀದೀಪ ಮಹಿಳಾ ವಿವಿಧೋದ್ದೇಶಗಳ ಸಂಸ್ಥೆಯು ಸಜ್ಜಾಗಿದೆ. ವಿಶ್ವ ಪರಿಸರ ದಿನಾಚರಣೆಯ ಅಂಗವಾಗಿ ಸಂಸ್ಥೆಯ ವತಿಯಿಂದ ಹಮ್ಮಿಕೊಂಡಿದ್ದ "ಪ್ಲಾಸ್ಟಿಕ್ ತ್ಯಜಿಸಿ, ಪರಿಸರ ಉಳಿಸಿ" ಎಂಬ ಬೃಹತ್ ಜಾಗೃತಿ ಆಂದೋಲನವು ಇಡೀ ಸಮಾಜದ ಕಣ್ಣು ತೆರೆಸುವಲ್ಲಿ ಯಶಸ್ವಿಯಾಗಿದೆ. ಭೂಮಿಯನ್ನು ತಾಯಿಯಂತೆ ಪೂಜಿಸುವ ನಾವು, ಅವಳಿಗೆ ಪ್ಲಾಸ್ಟಿಕ್ ಎಂಬ ವಿಷ ಉಣಿಸುವುದನ್ನು ನಿಲ್ಲಿಸಬೇಕು ಎಂಬ ಆಶಯದೊಂದಿಗೆ, ಪ್ಲಾಸ್ಟಿಕ್ ಬದಲಿಗೆ ಬಟ್ಟೆ ಚೀಲಗಳನ್ನು ಬಳಸುವ ಹೊಸ ಯುಗಕ್ಕೆ ಈ ಕಾರ್ಯಕ್ರಮ ನಾಂದಿ ಹಾಡಿತು.     

ಕಾರ್ಯಕ್ರಮದ ಘನ ಅಧ್ಯಕ್ಷತೆ ವಹಿಸಿ ಮಾತನಾಡಿದ ದಾರೀದೀಪ ಮಹಿಳಾ ವಿವಿಧೋದ್ದೇಶಗಳ ಸಂಸ್ಥೆಯ ಅಧ್ಯಕ್ಷರಾದ ಶ್ರೀಮತಿ ಶಕುಂತಲಾ ಮುಳುಗುಂದ ಅವರು, "ಪ್ಲಾಸ್ಟಿಕ್ ಎಂಬುದು ನಮ್ಮ ಭವಿಷ್ಯವನ್ನು ನುಂಗುತ್ತಿರುವ ಮಹಾಮಾರಿ. ಇದನ್ನು ನಮ್ಮ ಅಡುಗೆಮನೆಯಿಂದ ಹೊರಹಾಕದಿದ್ದರೆ ಮುಂದಿನ ಪೀಳಿಗೆಗೆ ಉಸಿರಾಡಲು ಜೀವಾಳವಾದ ಗಾಳಿಯೂ ಸಿಗದಂತಾಗುತ್ತದೆ. ಪ್ರತಿಯೊಬ್ಬ ಮಹಿಳೆಯೂ ಕೈಯಲ್ಲಿ ಬಟ್ಟೆ ಚೀಲ ಹಿಡಿದು ಹೊರಟಾಗ ಮಾತ್ರ ಈ ದೇಶದಲ್ಲಿ ನಿಜವಾದ ಪರಿಸರ ಕ್ರಾಂತಿ ಸಾಧ್ಯ" ಎಂದು ಪ್ರತಿಪಾದಿಸಿ ಮಾತನಾಡಿದರು.      ಪ್ರಮುಖ ವೈಚಾರಿಕ ಚಿಂತಕರಾದ ಶ್ರೀಮತಿ ರಾಜೇಶ್ವರಿ ಕುಲಕರ್ಣಿ ಅವರು ಮಾತನಾಡಿ, "ಮಾನವನ ಸ್ವಾರ್ಥಕ್ಕೆ ಮೂಕ ಪ್ರಾಣಿಗಳು ಮತ್ತು ಸುಂದರ ಪ್ರಕೃತಿ ಬಲಿಯಾಗುತ್ತಿವೆ. ನಾವು ಎಸೆಯುವ ಒಂದೊಂದು ಪ್ಲಾಸ್ಟಿಕ್ ಚೀಲವೂ ಭೂಮಿಯ ಒಡಲನ್ನು ಸೀಳುತ್ತಿವೆ.

ಈ ಮಾರಕ ಪ್ಲಾಸ್ಟಿಕ್ ಸಾಂಸ್ಕೃತಿಕ ಪಿಡುಗನ್ನು ಬೇರುಸಹಿತ ಕಿತ್ತೆಸೆಯಲು ಮಹಿಳಾ ಶಕ್ತಿ ಒಟ್ಟಾಗಬೇಕಿದೆ" ಎಂದು ಗುಡುಗಿದರು. ಶ್ರೀಮತಿ ಸುರೇಖಾ ಚಿಟ್ಟಿ ಅವರು ಮಾತನಾಡಿ, ನಮ್ಮ ಹಿರಿಯರು ಬಟ್ಟೆ ಚೀಲ ಹಿಡಿದು ಸಂತೆಗೆ ಹೋಗುತ್ತಿದ್ದರು, ಅದೊಂದು ಗೌರವದ ಸಂಕೇತವಾಗಿತ್ತು. ಇಂದು ಪ್ಲಾಸ್ಟಿಕ್ ವ್ಯಾಮೋಹಕ್ಕೆ ಬಿದ್ದು ರೋಗಗಳನ್ನು ನಾವೇ ಆಹ್ವಾನಿಸುತ್ತಿದ್ದೇವೆ. ಸುಸ್ಥಿರ ಮತ್ತು ಆರೋಗ್ಯಕರ ಭವಿಷ್ಯಕ್ಕಾಗಿ ನಾವೆಲ್ಲರೂ ನೈಸರ್ಗಿಕ ಬಟ್ಟೆ ಚೀಲಗಳ ಬಳಕೆಗೆ ಇಂದೇ ಸಂಕಲ್ಪ ಮಾಡಬೇಕು" ಎಂದು ಪ್ರಬಲವಾಗಿ ಪ್ರತಿಪಾದಿಸಿದರು. ಶ್ರೀಮತಿ ನಿರ್ಮಲ ಪೂಜಾರ ಅವರು ಮಾತನಾಡಿ, ಬದಲಾವಣೆ ತರಲು ಯಾರೋ ಬರುತ್ತಾರೆ ಎಂದು ಕಾಯುವುದಲ್ಲ, ನಮ್ಮ ಮನೆ ಮತ್ತು ನಮ್ಮ ಪರಿಸರದಿಂದಲೇ ಪ್ಲಾಸ್ಟಿಕ್ ಮುಕ್ತ ಅಭಿಯಾನ ಆರಂಭವಾಗಬೇಕು. ಬಟ್ಟೆ ಚೀಲಗಳ ಬಳಕೆ ಕೇವಲ ಫ್ಯಾಷನ್ ಅಲ್ಲ, ಅದು ಈ ಭೂಮಿಯನ್ನು ಉಳಿಸುವ ನಮ್ಮೆಲ್ಲರ ಪರಮ ಕರ್ತವ್ಯ" ಎಂದು ಕರೆ ನೀಡಿದರು.

ಮಹಿಳಾ ಶಕ್ತಿಯ ಒಗ್ಗಟ್ಟಿನ ಗರಿಮೂಡಿಸಿದ ಹೇಳಿಕೆ ಸಮಾಜ ಬದಲಾವಣೆಯ ಸಂಕಲ್ಪದೊಂದಿಗೆ ಸಂಸ್ಥೆಯ ಪ್ರಮುಖ ನಾಯಕಿಯರಾದ ಶ್ರೀಮತಿ ಜ್ಯೋತಿ ದೇಸಾಯಿ ಗೌಡರ, ಸುಪ್ರಿಯ ಅಯ್ಯನಗೌಡರ, ದೀಪ ಉಘಲಾಟ, ಪ್ರತಿಭಾ ಇನಾಮತಿ, ಶೋಭಾ ಹಿರೇಮಠ, ಸುಜಾತ ಅಬ್ಬಕಿ ಹಾಗೂ ಆಶಾ ಕಂಠಿ ಇವರೆಲ್ಲರೂ ವೇದಿಕೆಯಲ್ಲಿ ಪ್ರತ್ಯೇಕವಾಗಿ ಗಂಭೀರ ವಿಚಾರ ಮಂಡನೆ ಮಾಡಿದರು. ಪ್ಲಾಸ್ಟಿಕ್ ಚೀಲಗಳನ್ನು ಬಹಿಷ್ಕರಿಸುವುದು ಕೇವಲ ಒಂದು ದಿನದ ಆಚರಣೆಯಾಗಬಾರದು, ಅದು ನಮ್ಮ ಜೀವನದ ಉಸಿರಾಗಬೇಕು ಎಂದು ಕಟುವಾಗಿ ನುಡಿದರು.     ಈ ಸಂದರ್ಭದಲ್ಲಿ ದಾರೀದೀಪ ಮಹಿಳಾ ವಿವಿಧೋದ್ದೇಶಗಳ ಸಂಸ್ಥೆಯ ಸರ್ವ ಸದಸ್ಯರು ಸ್ವಯಂಪ್ರೇರಿತರಾಗಿ, ಅತ್ಯಂತ ಶಿಸ್ತುಬದ್ಧವಾಗಿ ಒಗ್ಗೂಡಿ ಈ ಕಾರ್ಯಕ್ರಮವನ್ನು ಕೇವಲ ಒಂದು ಸಭೆಯನ್ನಾಗಿಸದೇ ದೊಡ್ಡ ಜನಾಂದೋಲನವನ್ನಾಗಿ ಪರಿವರ್ತಿಸಿ ಯಶಸ್ವಿಯಾಗಿ ನಡೆಸಿಕೊಟ್ಟರು.     ಈ ಕ್ರಾಂತಿಕಾರಿ ನಡೆಗೆ ಸಾರ್ವಜನಿಕ ವಲಯದಲ್ಲಿ ವ್ಯಾಪಕ ಪ್ರಶಂಸೆ ವ್ಯಕ್ತವಾಗಿದೆ.