`ಕನ್ನಡದ ದಾಸಯ್ಯ’ ಶಾಂತಕವಿಗಳ ಸ್ಮರಣೆ

ಧಾರವಾಡ 16:  ಕನ್ನಡದ ಕರ್ಮಠ ಅನುಯಾಯಿ ಮತ್ತು ಕಟ್ಟಾಳು ಆಗಿದ್ದ ಶಾಂತಕವಿ ಉರ್ಫ ಸಕ್ಕರಿ ಬಾಳಾಚಾರ್ಯ ಅವರಿಗೆ ಕನ್ನಡವೇ ಉಸಿರಾಗಿತ್ತು ಎಂದು ಹಿರಿಯ ಸಾಹಿತಿ ಮತ್ತು ಪ್ರಾಧ್ಯಾಪಕ ಪ್ರೊ. ಹರ್ಷ ಡಂಬಳ ಅವರು ಇಲ್ಲಿ ಹೇಳಿದರು. 

ಕರ್ನಾಟಕ ವಿದ್ಯಾವರ್ಧಕ ಸಂಘದ ಆಶ್ರಯದಲ್ಲಿ ನಡೆದ ಕನ್ನಡ ನಾಟಕ ರಂಗದ ಪಿತಾಮಹ ಶಾಂತಕವಿಗಳ ಸ್ಮರಣೆ (ದಿ. ಬಾಳಾಚಾರ್ಯ ಸಕ್ಕರಿ) ಕಾರ‍್ಯಕ್ರಮದಲ್ಲಿ ಮುಖ್ಯ ಉಪನ್ಯಾಸಕರಾಗಿ ಅವರು ಮಾತನಾಡುತ್ತಿದ್ದರು.

ಮರಾಠಿ, ಸಂಸ್ಕೃತ, ಇಂಗ್ಲೀಷ ಭಾಷೆಗಳ ದಬ್ಬಾಳಿಕೆಯಿಂದ ಕನ್ನಡದ ಭಾಷೆ ಇಲ್ಲವೇ ಇಲ್ಲ ಎನ್ನುವ ಮಟ್ಟಿಗೆ ಇದ್ದ ಪರಿಸ್ಥಿತಿಯಲ್ಲಿ ಅವರು ಕೈಕೊಂಡ ಕನ್ನಡದ ಸೇವೆ ಅಮೂಲ್ಯ ಎಂದು ಅವರು ಹೇಳಿದರು. ಬದುಕಿದ್ದ 64 ವರ್ಷಗಳಲ್ಲಿ (1856-1920) ಅವರು ಕನ್ನಡದ ಬಗ್ಗೆ ಕೈಕೊಂಡ ಕಾರ್ಯ ಈಗಲೂ ರೋಮಾಂಚನವನ್ನುಂಟು ಮಾಡುತ್ತದೆ. ಕನ್ನಡದ ಸಾಹಿತ್ಯ, ಕಥೆ, ಕಾವ್ಯ ನಾಟಕಗಳು ಅವರ ಅಮೂಲ್ಯ ಕಾಣಿಕೆಗಳು. ಬರಿ ಹತ್ತು ವರ್ಷಗಳಲ್ಲಿ 63 ಕನ್ನಡದ ಕೃತಿಗಳನ್ನು ಅವರು  ಕನ್ನಡಿಗರಿಗೆ ಅರ್ಪಿಸಿದ್ದಾರೆ. ಕನ್ನಡದ ಪ್ರಾಥಮಿಕ ಶಾಲಾ ಶಿಕ್ಷಕರಾಗಿದ್ದು, ಮರಾಠಿ ಅಧಿಕಾರಿಗಳ ಅವಕೃಪೆಗೆ ತುತ್ತಾಗಿ ಊರೂರು ಅಲೆದ ಶಾಂತಕವಿಗಳು ಛಲಬಿಡದ ತ್ರಿವಿಕ್ರಮನಂತೆ ಕೈಕೊಂಡವರು ಎಂದು ಪ್ರೊ. ಹರ್ಷ ಡಂಬಳ ಹೇಳಿದರು.  

ಮುಖ್ಯ ಅತಿಥಿಗಳಾಗಿ ಆಗಮಿಸಿದ್ದ ಕರ್ನಾಟಕ ಸಾಹಿತ್ಯ ಅಕಾಡೆಮಿ ಸದಸ್ಯರು ಮತ್ತು ಕನ್ನಡ ಪ್ರಾಧ್ಯಾಪಕರೂ ಆಗಿರುವ ಡಾ. ಜಿನದತ್ತ ಹಡಗಲಿ ಅವರು ಶಾಂತಕವಿಗಳನ್ನು ಆಧುನಿಕ ವಿದ್ಯಾರಣ್ಯರು ಎಂದು ವರ್ಣಿಸಿದರು. ಕನ್ನಡಿಗರ ಹೊಣೆಗೇಡಿತನದ  19 ನೇ ಶತಮಾನದ ಉಗಮ ಮತ್ತು ಆರಂಭದ ಕಾಲದಲ್ಲಿ ಇದ್ದ ಪರಿಸ್ಥಿತಿಯಲ್ಲಿ ಅವರು ಕನ್ನಡದ ಕಾರ‍್ಯ ಕೈಕೊಂಡಿದ್ದು ಈಗಲೂ ನಮ್ಮನ್ನೆಲ್ಲ ಎಚ್ಚರಿಸುತ್ತದೆ. ಕನ್ನಡಿಗರ ಪ್ರಜ್ಞೆ ಬೆಳೆಸುವ ಪ್ರವೃತ್ತಿಯನ್ನು ಉಂಟು ಮಾಡಿದವರೆ ಶಾಂತಕವಿಗಳು. 1918 ರಲ್ಲಿ ಧಾರವಾಡದಲ್ಲಿ ಜರುಗಿದ ಕನ್ನಡ ಸಾಹಿತ್ಯ ಸಮ್ಮೇಳನಕ್ಕೆ ಆರ್ಥಿಕ ಮುಗ್ಗಟ್ಟು ಉಂಟಾದಾಗ ತಾವೆ ಕಟ್ಟಿದ ಹಾಡು.. `ಕನ್ನಡದ ದಾಸಯ್ಯ ಬಂದಾನ ನಿಮ್ಮ ಮನೆಗೆ’ ಎಂದು ಹಾಡುವ ಮೂಲಕ ಧನಸಂಗ್ರಹ ಮಾಡಿದವರು ಶಾಂತಕವಿಗಳು ಎಂದು ಡಾ. ಜಿನದತ್ತ ಹಡಗಲಿ ಹೇಳಿದರು. 

ಸಭೆಯ ಅಧ್ಯಕ್ಷತೆಯನ್ನು ವಹಿಸಿದ್ದ ನಿವೃತ್ತ ಗ್ರಂಥಾಲಯ ಅಧಿಕಾರಿ ಜಿ. ಬಿ. ಹೊಂಬಳ ಅವರು, ಕನ್ನಡಿಗರಲ್ಲಿ ಕನ್ನಡತನದ ಅಭಿಮಾನ ಬೇರೆ ಭಾಷಿಕರನ್ನು ನೋಡಿದಾಗ ಕಡಿಮೆ ಎನಿಸುತ್ತಿದೆ. ನಮ್ಮ ಇತಿಹಾಸವನ್ನು ನಾವು ತಿಳಿದುಕೊಳ್ಳಬೇಕು. ಕನ್ನಡಿಗರನ್ನು ಜಾಗೃತಗೊಳಿಸಿದವರ ಇತಿಹಾಸವನ್ನು ಅರ್ಥೈಸಿಕೊಂಡು ಅವರು ತೋರಿದ ದಾರಿಯಲ್ಲಿ ಮುನ್ನಡೆಯಬೇಕೆಂದು ಹೇಳಿದರು. 

ಸಂಘದ ಪ್ರಧಾನ ಕಾರ್ಯದರ್ಶಿ ಪ್ರಕಾಶ ಎಸ್. ಉಡಿಕೇರಿ ಸ್ವಾಗತಿಸಿದರು. ಉಪಾಧ್ಯಕ್ಷ ನಿಂಗಣ್ಣ ಕುಂಟಿ (ಇಟಗಿ)ಯವರು   ಪ್ರಾಸ್ತಾವಿಕವಾಗಿ ಮಾತನಾಡಿದರು. ಕಾರ್ಯಕ್ರಮ ಸಂಯೋಜಕ ಮನೋಜ ಪಾಟೀಲ ಅವರು ಕಾರ‍್ಯಕ್ರಮ ನಿರೂಪಿಸಿದರು. ಮಹಾಂತೇಶ ನರೇಗಲ್ಲ ಅಭಾರ ಮನ್ನಿಸಿದರು. 

ಸಭೆಯಲ್ಲಿ ಶಾಂತ ಕವಿಗಳ ವಂಶಜರಾದ ಬಾಬುರಾವ ನಾಯಕ ಮತ್ತು ಹನುಮೇಶ ನಾಯಕ ಸೇರಿದಂತೆ ವೀರಣ್ಣ ಒಡ್ಡೀನ, ಆನಂದ ಪಾಟೀಲ, ಶಶಿಧರ ನರೇಂದ್ರ, ವಿಷಯಾ ಜೇವೂರ, ಅರವಿಂದ ಕುಲಕರ್ಣಿ, ಬಸಯ್ಯಾ ಶಿರೋಳ ಮತ್ತಿತರರು ಪಾಲ್ಗೊಂಡಿದ್ದರು.