ಲೋಕದರ್ಶನ ವರದಿ  

ಮುಂಡಗೋಡ 30 : ಕರ್ನಾಟಕ ರಾಜ್ಯ ಸರ್ಕಾರಿ ನೌಕರರ ಸಂಘದ ಮುಂಡಗೋಡ ತಾಲೂಕು ಘಟಕದ ವತಿಯಿಂದ ಆಗಸ್ಟ್‌ 1ರಂದು ನಡೆಯಲಿರುವ ಹಿರಿಯ ಶಿಕ್ಷಕ ಹಾಗೂ ಮಾಜಿ ತಾಲೂಕು ಅಧ್ಯಕ್ಷ  ಸುಭಾಸಚಂದ್ರ ಆರ್‌. ಡೋರಿ ಅವರ ಸೇವಾ ನಿವೃತ್ತಿ ಅಭಿನಂದನೋತ್ಸವ ಸಮಾರಂಭದ ಆಮಂತ್ರಣ ಪತ್ರಿಕೆಯನ್ನು ಶಿರಸಿ ಶೈಕ್ಷಣಿಕ ಜಿಲ್ಲಾ ಪ್ರೌಢಶಾಲಾ ಮುಖ್ಯ ಶಿಕ್ಷಕರ ಸಂಘದ ಜಿಲ್ಲಾಧ್ಯಕ್ಷ ಎಸ್‌. ಡಿ. ಮುಡೆಣ್ಣವರ ಬಿಡುಗಡೆಗೊಳಿಸಿದರು. ಈ ಸಂದರ್ಭದಲ್ಲಿ ಎಸ್‌. ಡಿ. ಮುಡೆಣ್ಣವರ ಮಾತನಾಡಿದ ಅವರು,  ಸುಭಾಸಚಂದ್ರ ಡೋರಿ ಅವರು 35 ವರ್ಷಗಳ ಕಾಲ ಆದರ್ಶ ಶಿಕ್ಷಕರಾಗಿ ಹಾಗೂ ಸಂಘದ ಅಧ್ಯಕ್ಷರಾಗಿ ಶಿಕ್ಷಕರು ಮತ್ತು ಸರ್ಕಾರಿ ನೌಕರರ ಹಿತಕ್ಕಾಗಿ ಸೇವೆ ಸಲ್ಲಿಸಿದ್ದು, ಇಂತಹ ವ್ಯಕ್ತಿತ್ವವನ್ನು ಗೌರವಿಸುವುದು ಸಮಾಜದ ಕರ್ತವ್ಯ ಎಂದು ಹೇಳಿದರು.

ಗೌರವ ಅಧ್ಯಕ್ಷ ಹನಮಂತ ತಳವಾರ ಮಾತನಾಡಿ, ಆಗಸ್ಟ್‌ 1ರಂದು ಮಧ್ಯಾಹ್ನ 2.30ಕ್ಕೆ ಮುಂಡಗೋಡದ ದೈವಜ್ಞ ಸಭಾಭವನದಲ್ಲಿ ನಡೆಯುವ ಅಭಿನಂದನೋತ್ಸವದಲ್ಲಿ ಶಿಕ್ಷಕರು, ಸರ್ಕಾರಿ ನೌಕರರು ಹಾಗೂ ಸಾರ್ವಜನಿಕರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸುವಂತೆ ಮನವಿ ಮಾಡಿದರು. ಈ ಸಂದರ್ಭದಲ್ಲಿ ಸಂಘದ ಕಾರ್ಯದರ್ಶಿ ಗಣೇಶ ಗಬ್ಬೂರ, ನಿರ್ದೇಶಕರಾದ ಕಾಂತೇಶ ಕುಮ್ಮಣ್ಣವರ, ಎಂ. ಎಸ್‌. ಕಾರ್ಕಳ,  ನಾಗರಾಜ ವಾಲ್ಮೀಕಿ,  ಸಂಗಪ್ಪ ಚವಡಿ, ಮಂಜುನಾಥ ನೀಲಮ್ಮನವರ,  ಮುತ್ತುರಾಜ ಹೊನ್ನಣ್ಣನವರ ಸೇರಿದಂತೆ ಸಂಘದ ಪದಾಧಿಕಾರಿಗಳು ಹಾಗೂ ಸದಸ್ಯರು ಉಪಸ್ಥಿತರಿದ್ದರು. ಕಾರ್ಯಕ್ರಮದಲ್ಲಿ ಗಣೇಶ ಗಬ್ಬೂರ ಅವರು ಸ್ವಾಗತಿಸಿ, ಎಂ. ಎಸ್‌. ಕಾರ್ಕಳ ಅವರು ವಂದಿಸಿದರು.