ಮುಂಬೈ, ಜುಲೈ 30: ಶಾಲಾ ಮಕ್ಕಳಲ್ಲಿ ಆರೋಗ್ಯಕರ ಆಹಾರ ಪದ್ಧತಿಯನ್ನು ಉತ್ತೇಜಿಸುವ ಪ್ರಮುಖ ಕ್ರಮವಾಗಿ, ಮಹಾರಾಷ್ಟ್ರ ಆಹಾರ ಮತ್ತು ಔಷಧ ಆಡಳಿತ (FDA) ರಾಜ್ಯಾದ್ಯಂತ ಶಾಲೆಗಳ ಒಳಗೆ ಹಾಗೂ ಶಿಕ್ಷಣ ಸಂಸ್ಥೆಗಳ 50 ಮೀಟರ್ ವ್ಯಾಪ್ತಿಯೊಳಗೆ ಜಂಕ್ ಫುಡ್ ಮಾರಾಟ, ಜಾಹೀರಾತು ಮತ್ತು ಉಚಿತ ವಿತರಣೆ ಮೇಲೆ ನಿಷೇಧ ಹೇರಿದೆ.

"ಮಹಾರಾಷ್ಟ್ರದ ಪ್ರತಿಯೊಂದು ಮಗುವಿಗೂ ಆಹಾರ ಸುರಕ್ಷತೆ" (Save Food for Every Child in Maharashtra) ಅಭಿಯಾನದ ಅಡಿಯಲ್ಲಿ ಹೊರಡಿಸಲಾದ ಈ ಆದೇಶವು ರಾಜ್ಯದ 1.08 ಲಕ್ಷಕ್ಕೂ ಹೆಚ್ಚು ಶಾಲೆಗಳಲ್ಲಿ ಓದುತ್ತಿರುವ ಎರಡು ಕೋಟಿಗೂ ಹೆಚ್ಚು ವಿದ್ಯಾರ್ಥಿಗಳನ್ನು ಗುರಿಯಾಗಿಸಿಕೊಂಡಿದೆ ಎಂದು FDA ಆಯುಕ್ತ ತುಕಾರಾಮ್ ಮುಂಢೆ ತಿಳಿಸಿದ್ದಾರೆ.

ಈ ನಿಷೇಧವು ಹೆಚ್ಚಿನ ಕೊಬ್ಬು, ಹೆಚ್ಚು ಸಕ್ಕರೆ ಮತ್ತು ಹೆಚ್ಚು ಉಪ್ಪು (HFSS) ಹೊಂದಿರುವ ಎಲ್ಲಾ ಆಹಾರ ಪದಾರ್ಥಗಳಿಗೆ ಅನ್ವಯಿಸುತ್ತದೆ. ಇದರಲ್ಲಿ ವಡಾ ಪಾವ್, ಸಮೋಸಾ, ಚಿಪ್ಸ್, ಚಾಕೊಲೇಟ್‌ಗಳು, ಐಸ್‌ಕ್ರೀಮ್‌ಗಳು ಮತ್ತು ಕಾರ್ಬೊನೇಟೆಡ್ ಪಾನೀಯಗಳಂತಹ ಜನಪ್ರಿಯ ತಿಂಡಿಗಳು ಸೇರಿವೆ. ಇವುಗಳನ್ನು ಇನ್ನು ಮುಂದೆ ಶಾಲಾ ಕ್ಯಾಂಟೀನ್‌ಗಳು, ಟಕ್ ಶಾಪ್‌ಗಳು, ಹಾಸ್ಟೆಲ್‌ಗಳು ಅಥವಾ ಶಾಲಾ ಆವರಣದ 50 ಮೀಟರ್ ಒಳಗೆ ಕಾರ್ಯನಿರ್ವಹಿಸುವ ಮಾರಾಟಗಾರರು ಮಾರಾಟ ಮಾಡಲು ಅನುಮತಿ ಇರುವುದಿಲ್ಲ.

ಈ ಆದೇಶದ ಭಾಗವಾಗಿ, ಎಲ್ಲಾ ಶಾಲಾ ಕ್ಯಾಂಟೀನ್‌ಗಳು, ಹಾಸ್ಟೆಲ್ ಅಡುಗೆಮನೆಗಳು ಮತ್ತು ಮಧ್ಯಾಹ್ನದ ಊಟ (ಮಿಡ್-ಡೇ ಮೀಲ್) ಪೂರೈಕೆದಾರರು ಮಾನ್ಯವಾದ ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ನೋಂದಣಿ ಅಥವಾ ಪರವಾನಗಿ ಹೊಂದಿರಬೇಕು.

ಈ ನಿಯಮವನ್ನು ಜಾರಿಗೆ ತರುವ ಜವಾಬ್ದಾರಿಯನ್ನು ಶಾಲಾ ಮುಖ್ಯೋಪಾಧ್ಯಾಯರು ಮತ್ತು ನಿರ್ವಹಣಾ ಸಮಿತಿಗಳಿಗೆ ನೀಡಲಾಗಿದ್ದು, ಉಲ್ಲಂಘನೆ ಕಂಡುಬಂದಲ್ಲಿ ಆಡಳಿತಾತ್ಮಕ ಮತ್ತು ಕಾನೂನು ಕ್ರಮ ಎದುರಿಸಬೇಕಾಗುತ್ತದೆ.

ಆರೋಗ್ಯಕರ ಆಹಾರ ಪದ್ಧತಿಯನ್ನು ಉತ್ತೇಜಿಸಲು ಶಾಲೆಗಳು ತಾಜಾ ಹಣ್ಣುಗಳು, ತರಕಾರಿಗಳು, ಸಂಪೂರ್ಣ ಧಾನ್ಯಗಳು ಮತ್ತು ಹಾಲು ಉತ್ಪನ್ನಗಳಂತಹ ಪೌಷ್ಟಿಕ ಆಹಾರಗಳನ್ನು ಒದಗಿಸುವಂತೆ ಸೂಚಿಸಲಾಗಿದೆ.

ರಾಷ್ಟ್ರೀಯ ಶಾಲಾ ಆಹಾರ ಸುರಕ್ಷತಾ ನಿಯಮಗಳು 2021ರಿಂದಲೇ ಜಾರಿಯಲ್ಲಿವೆ ಎಂದು ಉಲ್ಲೇಖಿಸಿದ ಮುಂಢೆ, ಈ ನಿಯಮ ಜಾರಿಗೆ ಯಾವುದೇ ಹೆಚ್ಚುವರಿ ಸಮಯಾವಕಾಶ (ಗ್ರೇಸ್ ಪೀರಿಯಡ್) ನೀಡಲಾಗುವುದಿಲ್ಲ ಎಂದು ಹೇಳಿದ್ದಾರೆ.

ಆಹಾರ ಸುರಕ್ಷತಾ ಅಧಿಕಾರಿಗಳಿಗೆ ಪ್ರತಿಯೊಂದು ಶಾಲೆಯನ್ನು ಕನಿಷ್ಠ ವರ್ಷಕ್ಕೆ ಎರಡು ಬಾರಿ ಪರಿಶೀಲಿಸುವಂತೆ ಸೂಚಿಸಲಾಗಿದ್ದು, ನಿಯಮಿತ ಆಹಾರ ಮಾದರಿ ಪರೀಕ್ಷೆಗಳು ಮತ್ತು ಅನುಸರಣೆ ಪರಿಶೀಲನೆಗಳ ಮೂಲಕ ಮೇಲ್ವಿಚಾರಣೆ ನಡೆಸಲಾಗುತ್ತದೆ.

"ಹೆಚ್ಚಿನ ಕೊಬ್ಬು, ಟ್ರಾನ್ಸ್-ಫ್ಯಾಟ್ ಮತ್ತು ಸಕ್ಕರೆ ಹೆಚ್ಚಿರುವ ಉತ್ಪನ್ನಗಳನ್ನು ಶಾಲೆಗಳ ಒಳಗೆ ಮತ್ತು ಸುತ್ತಮುತ್ತ ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ" ಎಂದು ಮುಂಢೆ ಹೇಳಿದ್ದಾರೆ. ಮಕ್ಕಳ ಆರೋಗ್ಯ ಮತ್ತು ಸುರಕ್ಷಿತ ಹಾಗೂ ಪೌಷ್ಟಿಕ ಆಹಾರ ಪಡೆಯುವ ಅವರ ಸಂವಿಧಾನಿಕ ಹಕ್ಕಿನ ವಿಷಯದಲ್ಲಿ ರಾಜ್ಯ ಸರ್ಕಾರ ಯಾವುದೇ ರಾಜಿ ಮಾಡಿಕೊಳ್ಳುವುದಿಲ್ಲ ಎಂದು ಅವರು ತಿಳಿಸಿದ್ದಾರೆ.