2028ರಲ್ಲಿ ಚಂದ್ರನ ಮೇಲೆ ಗಗನಯಾತ್ರಿಗಳನ್ನು ಇಳಿಸುವ ಯೋಜನೆಗೆ ನಾಸಾ ಪುನರ್ ದೃಢೀಕರಣ

ವಾಷಿಂಗ್ಟನ್, ಅ.24 : ಆರ್ಟೆಮಿಸ್-4 (Artemis IV) ಯೋಜನೆಯ ಭಾಗವಾಗಿ 2028ರಲ್ಲಿ ಗಗನಯಾತ್ರಿಗಳನ್ನು ಚಂದ್ರನ ಮೇಲ್ಮೈಗೆ ಇಳಿಸುವ ತನ್ನ ಯೋಜನೆಯನ್ನು ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾ ಪುನರ್ ದೃಢಪಡಿಸಿದೆ. ನಿಗದಿತ ಗುರಿಯನ್ನು ತಲುಪಲು ತಾಂತ್ರಿಕ ಅಗತ್ಯತೆಗಳನ್ನು ಪರಿಷ್ಕರಿಸುವುದರ ಜೊತೆಗೆ ಸಿದ್ಧತಾ ಕಾರ್ಯಗಳನ್ನು ತ್ವರಿತಗೊಳಿಸಲಾಗುತ್ತಿದೆ ಎಂದು ಸಂಸ್ಥೆ ತಿಳಿಸಿದೆ.

ನಾಸಾ ಆಡಳಿತಾಧಿಕಾರಿ ಜೇರೆಡ್ ಐಸಾಕ್‌ಮನ್ ಅವರು, ಅಮೆರಿಕದ ಗಗನಯಾತ್ರಿಗಳನ್ನು ಸುರಕ್ಷಿತವಾಗಿ ಹಾಗೂ ಯಶಸ್ವಿಯಾಗಿ ಮತ್ತೆ ಚಂದ್ರನ ಮೇಲ್ಮೈಗೆ ಕರೆದೊಯ್ಯುವ ಸಾಧ್ಯತೆಯನ್ನು ಹೆಚ್ಚಿಸಲು ಸಂಸ್ಥೆ ತನ್ನ ಪ್ರಯತ್ನಗಳನ್ನು ಚುರುಕುಗೊಳಿಸಿದೆ ಎಂದು ಹೇಳಿದರು.

2028ರಲ್ಲಿ ಗಗನಯಾತ್ರಿಗಳು ಚಂದ್ರನ ಮೇಲೆ ಮೊದಲ ಹೆಜ್ಜೆ ಇಡುವ ವೇಳೆಗೆ, ಅವರಿಗೆ ನೆರವಾಗಲು ಚಂದ್ರನ ಮೇಲ್ಮೈಯಲ್ಲಿ ರೋವರ್ ವಾಹನ ಹಾಗೂ ಶಾಶ್ವತ ಮಾನವ ವಾಸ್ತವ್ಯದ ಆರಂಭಿಕ ಸೌಲಭ್ಯಗಳು ಸಿದ್ಧವಾಗಿರಲಿವೆ ಎಂದು ಅವರು ತಿಳಿಸಿದರು.

ನಾಸಾದ ಆರ್ಟೆಮಿಸ್ ಕಾರ್ಯಕ್ರಮದ ವ್ಯವಸ್ಥಾಪಕ ಜೆರೆಮಿ ಪಾರ್ಸನ್ಸ್ ಮಾತನಾಡಿ, ಚಂದ್ರನ ಮೇಲೆ ಗಗನಯಾತ್ರಿಗಳನ್ನು ಇಳಿಸುವ ಲ್ಯಾಂಡರ್‌ಗಳ ಅಭಿವೃದ್ಧಿ ಕಾರ್ಯವನ್ನು ಎಲಾನ್ ಮಸ್ಕ್ ಅವರ ಸ್ಪೇಸ್‌ಎಕ್ಸ್ ಮತ್ತು ಜೆಫ್ ಬೆಜೋಸ್ ಅವರ ಬ್ಲೂ ಒರಿಜಿನ್ ಎಂಬ ಎರಡು ಖಾಸಗಿ ಕಂಪನಿಗಳು ಸಮಾನಾಂತರವಾಗಿ ಕೈಗೊಂಡಿವೆ ಎಂದು ಹೇಳಿದರು.

2028ರ ಗುರಿಯನ್ನು ಸಾಧಿಸುವುದರತ್ತ ನಾಸಾ ಸಂಪೂರ್ಣ ಗಮನ ಹರಿಸಿದೆ. ಗಗನಯಾತ್ರಿಗಳನ್ನು ಚಂದ್ರನ ಮೇಲ್ಮೈಗೆ ಕರೆದೊಯ್ಯುವ ಜವಾಬ್ದಾರಿಯನ್ನು ಯಾವ ಕಂಪನಿಗೆ ವಹಿಸಬೇಕು ಎಂಬ ನಿರ್ಧಾರವನ್ನು ಸಾಧ್ಯವಾದಷ್ಟು ಕೊನೆಯ ಹಂತದವರೆಗೆ ಮುಂದೂಡಲಾಗುವುದು ಎಂದು ಪಾರ್ಸನ್ಸ್ ತಿಳಿಸಿದರು.

ಎರಡೂ ಕಂಪನಿಗಳು 2028ರಲ್ಲಿ ಚಂದ್ರನ ಮೇಲೆ ಗಗನಯಾತ್ರಿಗಳನ್ನು ಇಳಿಸುವ ಗುರಿಯೊಂದಿಗೆ ಕಾರ್ಯನಿರ್ವಹಿಸುತ್ತಿದ್ದು, ಅವುಗಳ ಪ್ರಗತಿಯನ್ನು ನಾಸಾ ಸೂಕ್ಷ್ಮವಾಗಿ ಗಮನಿಸುತ್ತಿದೆ ಎಂದು ಅವರು ಹೇಳಿದರು.

ಮಾನವರನ್ನು ಮತ್ತೆ ಚಂದ್ರನ ಮೇಲೆ ಇಳಿಸುವುದು ಮತ್ತು ಅಲ್ಲಿ ದೀರ್ಘಕಾಲೀನ ಮಾನವ ವಾಸ್ತವ್ಯಕ್ಕೆ ಅಗತ್ಯವಾದ ಅಡಿಪಾಯವನ್ನು ನಿರ್ಮಿಸುವುದು ನಾಸಾದ ಆರ್ಟೆಮಿಸ್ ಕಾರ್ಯಕ್ರಮದ ಪ್ರಮುಖ ಉದ್ದೇಶವಾಗಿದೆ.