ರತ್ನಗಿರಿ ಹಳ್ಳದಲ್ಲಿ ಮುಳುಗಿ ನಾಲ್ವರು ಸಹೋದರ-ಸಹೋದರಿಯರ ಸಾವು, ಐದನೇ ಮಗು ರಕ್ಷಣೆ

ರತ್ನಗಿರಿ, ಅ. 12 (ಯುಎನ್‌ಐ): ಮಹಾರಾಷ್ಟ್ರದ ರತ್ನಗಿರಿ ಜಿಲ್ಲೆಯ ರಾಜಾಪುರ ತಾಲ್ಲೂಕಿನ ನಾನಾರ್ ಇಂಗಲೇವಾಡಿ ಪ್ರದೇಶದಲ್ಲಿ ಭಾನುವಾರ ಆಳವಾದ ಹಳ್ಳಕ್ಕೆ ಬಿದ್ದು ಒಂದೇ ಕುಟುಂಬದ ನಾಲ್ವರು ಮಕ್ಕಳು ಮುಳುಗಿ ಸಾವನ್ನಪ್ಪಿದ್ದಾರೆ. ಐದನೇ ಮಗುವನ್ನು ಸ್ಥಳೀಯರು ಸುರಕ್ಷಿತವಾಗಿ ರಕ್ಷಿಸಿದ್ದಾರೆ.

ನಾನಾರ್ ಇಂಗಲೇವಾಡಿ ಪೊಲೀಸರ ಪ್ರಕಾರ, ಐವರು ಮಕ್ಕಳು ತಮ್ಮ ತಾಯಿ ಹೀನಾ ಭಟ್ಕರ್ ಅವರೊಂದಿಗೆ ಸಿಂಪಿ ಮತ್ತು ಚಿಪ್ಪುಮೀನುಗಳನ್ನು ಸಂಗ್ರಹಿಸಲು ಹಳ್ಳಕ್ಕೆ ತೆರಳಿದ್ದರು. ಈ ವೇಳೆ ನೀರಿನ ಆಳವನ್ನು ಸರಿಯಾಗಿ ಅಂದಾಜಿಸಲು ಸಾಧ್ಯವಾಗದೆ, ಮಕ್ಕಳು ಏಕಾಏಕಿ ನೀರಿನೊಳಗಿನ ಆಳವಾದ ತಗ್ಗಿಗೆ ಜಾರಿ ಬಿದ್ದು ಮುಳುಗತೊಡಗಿದ್ದಾರೆ.

ಮೃತ ಮಕ್ಕಳನ್ನು ಮೊಹಮ್ಮದ್ ಜುನೈದ್ ಭಟ್ಕರ್, ಜುಹೇರಿಯಾ ಭಟ್ಕರ್, ಬುಷ್ರಾ ಭಟ್ಕರ್ ಮತ್ತು ಮಹಿರಾ ಭಟ್ಕರ್ ಎಂದು ಗುರುತಿಸಲಾಗಿದೆ.

ಮಕ್ಕಳ ಕೂಗಾಟ ಕೇಳಿ ಸ್ಥಳೀಯ ಗ್ರಾಮಸ್ಥರು ಹಾಗೂ ಕರಾವಳಿ ಪೊಲೀಸರು ತಕ್ಷಣ ಸ್ಥಳಕ್ಕೆ ಧಾವಿಸಿ, ಒಂದು ಬಾಲಕಿಯನ್ನು ರಕ್ಷಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಶೋಧ ಮತ್ತು ರಕ್ಷಣಾ ಕಾರ್ಯಾಚರಣೆಯ ವೇಳೆ ಮೂವರ ಮೃತದೇಹಗಳನ್ನು ಹೊರತೆಗೆಯಲಾಗಿದೆ.

ಉಳಿದ 15 ವರ್ಷದ ಬಾಲಕಿ ಮಹಿರಾ ಭಟ್ಕರ್‌ಗಾಗಿ ಸೋಮವಾರವೂ ಶೋಧ ಕಾರ್ಯಾಚರಣೆ ಮುಂದುವರಿದಿದೆ ಎಂದು ವರದಿ ತಿಳಿಸಿದೆ.