ಕಾರವಾರ, ಆ.19: ನಗರದ ರವೀಂದ್ರನಾಥ ಟ್ಯಾಗೋರ್ ಕಡಲತೀರದಲ್ಲಿ ಆಲಿವ್ ರಿಡ್ಲಿ ಜಾತಿಯ ಕಡಲಾಮೆಯ ಕಳೆಬರಹ ಪತ್ತೆಯಾಗಿದೆ.  ಈ ವರ್ಷ ಮೃತಪಟ್ಟ ಎರಡನೇ ಆಲಿವ್ ರಿಡ್ಲಿ ಕಡಲಾಮೆ ಇದಾಗಿದೆ. ಅರಬ್ಬಿ ಸಮುದ್ರದ ಕಾರವಾರದಿಂದ ಹರವಾದ ಕಡಲತೀರದವರೆಗೆ ಆಲಿವ್ ರಿಡ್ಲಿ ಜಾತಿಯ ಆಮೆಗಳ ಸಂಖ್ಯೆ ಹೆಚ್ಚಾಗುತ್ತಿದೆ. ಬುಧವಾರ ನಗರದ ವಾರ್ಶಿಪ್ ಚಾಪೆಲ್ ಮ್ಯೂಸಿಯಂ ಬಳಿಯ ಕಡಲತೀರದಲ್ಲಿ ಕಡಲಾಮೆಯ ಕಳೆಬರಹ ಪತ್ತೆಯಾಗಿದ್ದು, ಅರಣ್ಯ ಇಲಾಖೆ ಹಾಗೂ ಮೆರೈನ್ ಎಸ್ಪಿಎಫ್‌ಎಸ್ ಅಧಿಕಾರಿಗಳು ಸ್ಥಳಕ್ಕೆ ತೆರಳಿ ಪರೀಶೀಲನೆ ನಡೆಸಿದರು.  

ಕಡಲಾಮೆ ಕೆಲವು ದಿನಗಳ ಹಿಂದೆಯೇ ಮೃತಪಟ್ಟಿರುವ ಸಾಧ್ಯತೆಯಿದ್ದು, ದೇಹ ಕೊಳೆತಿದ್ದರಿಂದ ಸಾವಿಗೆ ನಿಖರ ಕಾರಣ ಪತ್ತೆಹಚ್ಚಲು ಸಾಧ್ಯವಾಗಿಲ್ಲ. ಬಳಿಕ ಅಧಿಕಾರಿಗಳ ಸಮ್ಮುಖದಲ್ಲೇ ಕಡಲತೀರದಲ್ಲಿಯೇ ಆಮೆಯನ್ನು ಹೂಳಲಾಯಿತು.  ಸಮುದ್ರದಲ್ಲಿ ಮೀನುಗಾರಿಕೆ ಚಟುವಟಿಕೆಗಳು ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಮೀನುಗಾರಿಕಾ ಬಲೆಗಳಿಗೆ ಸಿಲುಕಿ ಅಥವಾ ಯಾಂತ್ರಿಕ ಬೋಟ್ಗೆ ಡಿಕ್ಕಿಯಾಗಿ ಆಮೆ ಮೃತಪಟ್ಟಿರಬಹುದು ಎಂದು ಅರಣ್ಯಾಧಿಕಾರಿಗಳು ಶಂಕಿಸಿದ್ದಾರೆ.