ಲೋಕದರ್ಶನ ವರದಿ 

ಹಾವೇರಿ  08: ಜಿಲ್ಲೆಯ ಬಡವರು, ಮಹಿಳೆಯರು ಹಾಗೂ ಸಾಮಾನ್ಯ ಜನರಿಗೆ ಆದ್ಯತಾ ವಲಯದ ಸಾಲಗಳನ್ನು ಹೆಚ್ಚಿನ ಪ್ರಮಾಣದಲ್ಲಿ ನೀಡುವಂತಾಗಬೇಕು  ಜೊತೆಗೆ ಮಹಿಳಾ ಸ್ವಸಹಾಯ ಸಂಘಗಳ ಸಂಖ್ಯೆಯನ್ನು ಹೆಚ್ಚಿಸುವುದರೊಂದಿಗೆ ಗ್ರಾಮೀಣ ಪ್ರದೇಶಗಳಲ್ಲಿ ಹೊಸ ಬ್ಯಾಂಕ್ ಶಾಖೆಗಳನ್ನು ಆರಂಭಿಸಲು ಕ್ರಮ ವಹಿಸಬೇಕು ಎಂದು ಸಂಸದರಾದ ಬಸವರಾಜ ಬೊಮ್ಮಾಯಿ ಹೇಳಿದರು. 

ನಗರದ ಜಿಲ್ಲಾ ಪಂಚಾಯತ್ ಸಭಾಭವನದಲ್ಲಿ ಸೋಮವಾರ ನಡೆದ ಜಿಲ್ಲಾ ಮಟ್ಟದ ಪ್ರಗತಿ ಪರೀಶೀಲನಾ ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಅವರು,  ಜಿಲ್ಲಾ ಕೇಂದ್ರ ಸಹಕಾರ ಬ್ಯಾಂಕ್ (ಡಿಸಿಸಿ ಬ್ಯಾಂಕ್) 2025-26ನೇ ಸಾಲಿನ ಮಾರ್ಚ್‌-2026 ಅಂತ್ಯದವರೆಗೆ ವಿವಿಧ ಕ್ಷೇತ್ರಗಳಿಗೆ ಸಾಲ ವಿತರಣೆ ಮಾಡುವಲ್ಲಿ ಗಮನಾರ್ಹ ಸಾಧನೆ ಮಾಡಿದೆ ನಿಗದಿತ ಗುರಿಯನ್ನು ಮೀರಿ ಒಟ್ಟು 107 ಶೇಕಡಾ ಪ್ರಗತಿ ಸಾಧಿಸಿದೆ ಬ್ಯಾಂಕ್‌ಗೆ ಒಟ್ಟು ?9,809.07 ಕೋಟಿ ಸಾಲ ವಿತರಣೆಯ ಗುರಿ ನಿಗದಿಯಾಗಿದ್ದರೆ, ಮಾರ್ಚ್‌-2026ರ ಅಂತ್ಯದ ವೇಳೆಗೆ ?10,493.96 ಕೋಟಿ ಸಾಲ ವಿತರಣೆ ಮಾಡಿ 107 ಶೇಕಡಾ ಸಾಧನೆ ದಾಖಲಿಸಿದೆ ಎಂದರು.  

ಕೃಷಿ ಕ್ಷೇತ್ರದಲ್ಲಿ 5,784.44 ಕೋಟಿ ಗುರಿಗೆ ವಿರುದ್ಧವಾಗಿ ?5,925.38 ಕೋಟಿ ಸಾಲ ವಿತರಣೆ ಮಾಡಿ 102 ಶೇಕಡಾ ಸಾಧನೆ ಮಾಡಲಾಗಿದೆ. ಕೃಷಿ ಅವಧಿ ಸಾಲ ವಿಭಾಗದಲ್ಲಿ 106 ಶೇಕಡಾ ಪ್ರಗತಿ ದಾಖಲಿಸಿದೆ. ಬೆಳೆ ಸಾಲದಲ್ಲಿ ಶೇ.100ರಷ್ಟು ಸಾಧನೆ ಕಂಡುಬಂದಿದೆ. ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಕೈಗಾರಿಕೆ (ಎಂಎಸ್‌ಎಂಇ) ಕ್ಷೇತ್ರದಲ್ಲಿ ?1,790.63 ಕೋಟಿ ಸಾಲ ವಿತರಣೆ ಮೂಲಕ 104 ಶೇಕಡಾ ಸಾಧನೆ ಮಾಡಲಾಗಿದೆ. ಆದ್ಯತಾ ವಲಯದ ಒಟ್ಟು ಸಾಲ ವಿತರಣೆಯಲ್ಲಿ ?8,178.48 ಕೋಟಿ ವಿತರಣೆ ಮಾಡಿ 101 ಶೇಕಡಾ ಪ್ರಗತಿ ದಾಖಲಿಸಿದೆ ಎಂದರು. 

ಆದ್ಯತಾ ರಹಿತ ವಲಯದಲ್ಲಿ ಬ್ಯಾಂಕ್‌ಗಳು ?2,315.48 ಕೋಟಿ ಸಾಲ ವಿತರಣೆ ಮಾಡಿ 136 ಶೇಕಡಾ ಸಾಧನೆ ಮಾಡಿವೆ. ಆದರೆ ಇತರೆ ಆದ್ಯತಾ ವಲಯ (ಒಪಿಎಸ್) ವಿಭಾಗದಲ್ಲಿ ?462.47 ಕೋಟಿ ಸಾಲ ವಿತರಣೆ ಮಾತ್ರವಾಗಿದ್ದು, ಗುರಿಗೆ ಹೋಲಿಸಿದರೆ 77 ಶೇಕಡಾ ಸಾಧನೆ ಮಾಡಿದೆ. ಕೃಷಿ, ಕೈಗಾರಿಕೆ ಹಾಗೂ ಸ್ವಯಂ ಉದ್ಯೋಗ ಚಟುವಟಿಕೆಗಳಿಗೆ ಹೆಚ್ಚಿನ ಪ್ರಮಾಣದಲ್ಲಿ ಸಾಲ ಸೌಲಭ್ಯ ಒದಗಿಸುವ ಮೂಲಕ ಜಿಲ್ಲೆಯ ಆರ್ಥಿಕ ಅಭಿವೃದ್ಧಿಗೆ ಸಹಕಾರ ನೀಡುವಂತೆ ತಿಳಿಸಿದರು.