ಲೋಕದರ್ಶನ ವರದಿ 

 ದಾಂಡೇಲಿ 20 : ದಾಂಡೇಲಿ ನಗರದ ಟಿ.ಆರ್‌.ಟಿ, ಅಂಬೇವಾಡಿ ಹಾಗೂ ಗ್ರಾಮೀಣ ಪ್ರದೇಶಗಳಾದ ಹಸನಮಾಳ, ಸಕ್ಕಲಗಾ ಹಾಗೂ ಬೇಡರಶಿರಗೂರು, ಗೊಬ್ರಾಳ, ಬಡಾಕಾನಶಿರಡಾ  ಮತ್ತಿತರ ಗ್ರಾಮಗಳ ಅರಣ್ಯ ಮತ್ತು ಜನವಸತಿ ಪ್ರದೇಶಗಳಲ್ಲಿ ಇತ್ತೀಚಿನ ದಿನಗಳಲ್ಲಿ ಚುಕ್ಕೆ ಚಿರತೆ ಹಾಗೂ ಅಪರೂಪದ ಸಂಕುಲಕ್ಕೆ ಸೇರಿದ ಕಪ್ಪು ಚಿರತೆಯ ಸಂಚಾರ ಹೆಚ್ಚುತ್ತಿರುವುದು ಸಾರ್ವಜನಿಕರಲ್ಲಿ ಆತಂಕಕ್ಕೆ ಕಾರಣವಾಗಿದೆ.   

4- 5 ದಿನಗಳ ಹಿಂದೆ ಹಸನಮಾಳದ ರೆಸಾರ್ಟ ಒಂದಕ್ಕೆ ಕಪ್ಪು ಚಿರತೆ ನುಗ್ಗಿ   ಸಾಕು ನಾಯಿಯೊಂದನ್ನು ಕಚ್ಚಿ ಎಳೆದೊಯ್ದು ಕೊಂದು ಹಾಕಿದ ಘಟನೆ ವರದಿಯಾಗಿದೆ. ಇದೇ ಚಿರತೆ ಟಿ.ಆರ್‌.ಟಿ ಕಾಲನಿಯ ಸಮೀಪದಲ್ಲೂ ಕಂಡು ಬಂದಿದೆ. ದ್ವಿ ಚಕ್ರ ವಾಹನಗಳಲ್ಲಿ ಸಂಚರಿಸುತ್ತಿದ್ದ ಹಲವರಿಗೂ ಚಿರತೆಗಳು ಕಾಣಿಸಿಕೊಂಡಿದೆ. ಇದುವರೆಗೂ ಚಿರತೆ ಮನುಷ್ಯನ ಮೇಲೆ ದಾಳಿ ನಡೆಸಿದ ಯಾವುದೇ ಪ್ರಕರಣಗಳು ಕಂಡು ಬಂದಿಲ್ಲ.

ಆದರೆ ನಾಯಿ, ದನಕರುಗಳಂತಹ ಸಾಕು ಪ್ರಾಣಿಗಳ ಮೇಲೆ ದಾಳಿ ನಡೆಸುತ್ತಿರುವುದು ದೃಢಪಟ್ಟಿದೆ. ಆಹಾರದ ಕೊರತೆ, ಕಾಡಿನ ಅಂಚಿನ ಪ್ರದೇಶಗಳಲ್ಲಿ ಮಾನವ ಚಟುವಟಿಕೆಗಳ ಹೆಚ್ಚಳ ಹಾಗೂ ಕಾಡು ಪ್ರಾಣಿಗಳ ನೈಸರ್ಗಿಕ ವಾಸ ಸ್ಥಾನದ ಮೇಲೆ ಉಂಟಾಗುತ್ತಿರುವ ಒತ್ತಡದಿಂದ ಚಿರತೆಗಳು ನಾಡಿನತ್ತ ಹೆಜ್ಜೆ ಹಾಕುತ್ತಿದೆ. ಇಂತಹ ಸಂದರ್ಭದಲ್ಲಿ  ಅರಣ್ಯ ಇಲಾಖೆ ಮಾತ್ರವಲ್ಲದೆ ಸಾರ್ವಜನಿಕರು ಮುನ್ನೆಚ್ಚರಿಕೆ ವಹಿಸಬೇಕಿದೆ.

ರಾತ್ರಿ ವೇಳೆ ಒಂಟಿಯಾಗಿ ಸಂಚರಿಸುವದನ್ನು ತಪ್ಪಿಸುವದು ಕಾಡಿನ ಅಂಚಿನ ಪ್ರದೇಶಗಳಲ್ಲಿ ಮಕ್ಕಳನ್ನು ಏಕಾಂಗಿಯಾಗಿ ಬಿಡದಿರುವದು, ಸಾಕು ಪ್ರಾಣಿಗಳನ್ನು ಹೊರಗೆ ಕಟ್ಟದಿರುವದು ಮತ್ತು ಚಿರತೆ ಕಂಡು ಬಂದಲ್ಲಿ ಅದನ್ನು ಕಿರಿ ಕಿರಿ ಮಾಡದೇ ತಕ್ಷಣ ಅರಣ್ಯ ಇಲಾಖೆಗೆ ಮಾಹಿತಿ ನೀಡುವದು ಅಗತ್ಯವಾಗಿದೆ. ಸಂರಕ್ಷಣೆ ಮತ್ತು ಸುರಕ್ಷತೆಯ ಸಮತೋಲನವೇ ಇದಕ್ಕೆ ಪರಿಹಾರವಾಗಿದೆ.