ಲೋಕದರ್ಶನ ವರದಿ 

ಬಾಗಲಕೋಟೆ, ಸೆ.19: ಪರೀಕ್ಷೆ ಎನ್ನುವುದು ಕೇವಲ ಅಂಕಪಟ್ಟಿಗೆ ಸಂಬಂಧಿಸಿದ ವಿಷಯವಲ್ಲ. ಮಕ್ಕಳಲ್ಲಿ ಪಡೆದುಕೊಂಡಿರುವ ಜ್ಞಾನದ ಮೇಲೆ ಅವಲಂಬಿತವಾಗಿದೆ ಎಂದು ಪ್ರಾಚಾರ್ಯ ಎಸ್‌.ಆರ್‌. ಮುಗನೂರಮಠ ಹೇಳಿದರು.  ನಗರದ ಬಿವಿವಿ ಸಂಘದ ಬಸವೇಶ್ವರ ಪದವಿ ಪೂರ್ವ ಕಲಾ ಮಹಾವಿದ್ಯಾಲಯದಲ್ಲಿ ಮಕ್ಕಳ ಶಿಕ್ಷಣಾಭಿವೃದ್ಧಿಗಾಗಿ ವಿದ್ಯಾರ್ಥಿಗಳು ಹಾಗೂ ಪಾಲಕರ ಸಭೆಯಲ್ಲಿ ಅವರು ಮಾತನಾಡಿದರು.  

ವಿದ್ಯಾರ್ಥಿಗಳ ಕಲಿಕೆಯಲ್ಲಿ ಶಿಕ್ಷಕರೊಂದಿಗೆ ಪಾಲಕರೂ ಜವಾಬ್ದಾರರಾಗಬೇಕು. ಮನೆಯಲ್ಲಿ ಮಕ್ಕಳು ಓದುವ ಸಂದರ್ಭದಲ್ಲಿ ಟಿವಿ, ಮೊಬೈಲ್ ಬಳಕೆಯಿಂದ ಅವರ ಏಕಾಗ್ರತೆಗೆ ಭಂಗವಾಗಬಹುದು. ಆದ್ದರಿಂದ ಅಧ್ಯಯನಕ್ಕೆ ಪ್ರತ್ಯೇಕ ಸ್ಥಳ ಕಲ್ಪಿಸಬೇಕು. ರಾತ್ರಿ ಓದಿದ ಪಾಠಗಳನ್ನು ಬೆಳಗ್ಗೆ ಪುನರಾವರ್ತನೆ ಮಾಡುವುದರಿಂದ ಹೆಚ್ಚು ನೆನಪಿನಲ್ಲಿ ಉಳಿಯುತ್ತದೆ ಎಂದು ಸಲಹೆ ನೀಡಿದರು.  

ವಿದ್ಯಾರ್ಥಿಗಳು ಪಾಲಕರ ಕಷ್ಟಗಳನ್ನು ಅರಿತುಕೊಂಡು ಅಧ್ಯಯನದಲ್ಲಿ ಶ್ರಮಿಸಬೇಕು. ಭವಿಷ್ಯದ ಬುನಾದಿಗೆ ತಂದೆ-ತಾಯಿ ಹಾಗೂ ಗುರುಗಳು ಅಡಿಪಾಯವಾಗಿದ್ದಾರೆ ಎಂದು ಹೇಳಿದರು.  ಸಭೆಯಲ್ಲಿ ಐಕ್ಯೂಎಸಿ ಘಟಕದ ಸಂಯೋಜಕ ಡಾ. ಎ.ಯು. ರಾಠೋಡ, ಪಿಯುಸಿ ವಿಭಾಗದ ಎಸ್‌.ಎಂ. ಚಿಮ್ಮಲಗಿ, ಎಸ್‌.ಕೆ. ಪವಾರ್, ಬೋಧಕ-ಬೋಧಕೇತರ ಸಿಬ್ಬಂದಿ, ಪಾಲಕರು ಹಾಗೂ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.