ಸಮುದ್ರದಲ್ಲಿ ಪಾತಿ ದೋಣಿ ಮುಳುಗಿ ಇಬ್ಬರು ವಿದ್ಯಾರ್ಥಿಗಳು ಸಾವು

ಕಾರವಾರ 19: ಹೊನ್ನಾವರ ಸನಿಹ ಮಂಕಿ ಗ್ರಾಮದ ವ್ಯಾಪ್ತಿಯ ಅರಬ್ಬೀ ಸಮುದ್ರದಲ್ಲಿ ಮುಳುಗಿ ಇಬ್ಬರು ವಿದ್ಯಾರ್ಥಿಗಳು  ಸಾವನ್ನಪ್ಪಿದ  ಘಟನೆ ಕಾರವಾರ  ಜಿಲ್ಲೆಯ ಹೊನ್ನಾವರ ಸನಿಹದ  ಮಂಕಿ ಗ್ರಾಮದ ವ್ಯಾಪ್ತಿಯ ಕಡಲತೀರದಲ್ಲಿ  ನಡೆದಿದೆ.  

ಸಾವನ್ನಪ್ಪಿದ  ವಿದ್ಯಾರ್ಥಿಗಳಾದ ಮದನ್ ನಾರಾಯಣ ಖಾರ್ವಿ (17) ಮತ್ತು ಸುಜನ್ ನಾರಾಯಣ ಖಾರ್ವಿ (15) ಎಂದು ಗುರುತಿಸಲಾಗಿದೆ. ವಿದ್ಯಾರ್ಥಿಗಳು  ಗುರುವಾರ ಸಂಜೆ 6:30ರ ಸುಮಾರಿಗೆ ತಮ್ಮ ಪಾತಿ ದೋಣಿಯಲ್ಲಿ ಮೀನುಗಾರಿಕೆಗೆ ತೆರಳಿದ್ದರು. ಆದರೆ ಮಂಕಿಯ ಮಡಿ ಸಮುದ್ರದ ದಡದಿಂದ ಅರಬ್ಬೀ ಸಮುದ್ರದಲ್ಲಿ ಸುಮಾರು 100 ಮೀಟರ್ ದೂರ ತೆರಳಿದ್ದ ವೇಳೆ ಬಲವಾದ ಸಮುದ್ರದ ಅಲೆಗಳಿಗೆ ಸಿಲುಕಿ ಪಾತಿ ದೋಣಿ ಮಗುಚಿದೆ. ಪರಿಣಾಮ ವಿದ್ಯಾರ್ಥಿ ಸಹೋದರರು  ಸಮುದ್ರದಲ್ಲಿ ಮುಳುಗಿದರು.  

ಅಲೆಯ ರಭಸಕ್ಕೆ ಅವರಿಗೆ ಮೇಲೆ ಬರಲು ಸಾಧ್ಯವಾಗದೆ ಸಾವೀಗೀಡಾಗಿದ್ದಾರೆ. ವಿದ್ಯಾರ್ಥಿಗಳು ಮಂಕಿಯ ದೇವರಗದ್ದೆಯವರಾಗಿದ್ದಾರೆ. ಈ ಕುರಿತು ಮಂಕಿ ಪೊಲೀಸ್ ಠಾಣೆಯಲ್ಲಿ  ಪ್ರಕರಣ ದಾಖಲಾಗಿದೆ.