ಮುಂಬೈ, ಆಗಸ್ಟ್ 21: ಮುಂಬೈನ ಗೋರೆಗಾಂವ್ ಪೂರ್ವದ ಆರೆ ಕಾಲೊನಿಯ ಗೌತಮ್ ನಗರದಲ್ಲಿರುವ ಜಾನುವಾರು ಕೊಟ್ಟಿಗೆಯೊಂದರ ನೀರಿನ ತೊಟ್ಟಿಯಲ್ಲಿ ಈಜುತ್ತಿದ್ದ ಇಬ್ಬರು ಬಾಲಕರು ಮುಳುಗಿ ಮೃತಪಟ್ಟಿದ್ದಾರೆ ಎಂದು ಅಧಿಕಾರಿಗಳು ಶುಕ್ರವಾರ ತಿಳಿಸಿದ್ದಾರೆ.

ಆಗಸ್ಟ್ 21ರಂದು ಬೆಳಗ್ಗೆ ಸುಮಾರು 11.55ಕ್ಕೆ ಮಾಡರ್ನ್ ಬೇಕರಿ ಜಂಕ್ಷನ್ ಸಮೀಪದ ಪ್ರದೇಶದಿಂದ ಪೊಲೀಸ್ ನಿಯಂತ್ರಣ ಕೊಠಡಿಗೆ ಘಟನೆಯ ಕುರಿತು ಮಾಹಿತಿ ಬಂದಿತ್ತು. ತಕ್ಷಣ ಮುಂಬೈ ಅಗ್ನಿಶಾಮಕ ದಳ, ಪೊಲೀಸರು, 108 ಆಂಬ್ಯುಲೆನ್ಸ್ ಸೇವೆ ಹಾಗೂ ವಾರ್ಡ್ ಸಿಬ್ಬಂದಿ ಸ್ಥಳಕ್ಕೆ ಧಾವಿಸಿದರು.

ರಕ್ಷಣಾ ತಂಡಗಳು ನೀರಿನ ತೊಟ್ಟಿಯಿಂದ ಇಬ್ಬರು ಬಾಲಕರನ್ನು ಹೊರತೆಗೆದು, ತಕ್ಷಣ ಟ್ರಾಮಾ ಕೇರ್ ಆಸ್ಪತ್ರೆಗೆ ದಾಖಲಿಸಿದವು. ಆದರೆ, ಚಿಕಿತ್ಸೆ ನೀಡಿದ ವೈದ್ಯರು ಮಧ್ಯಾಹ್ನ ಸುಮಾರು 1.48ಕ್ಕೆ ಇಬ್ಬರೂ ಮೃತಪಟ್ಟಿರುವುದಾಗಿ ಘೋಷಿಸಿದರು.

ಮೃತರನ್ನು ಜೋಗೇಶ್ವರಿ ಗುಂಫಾ ಇಂಗ್ಲಿಷ್ ಮೀಡಿಯಂ ಸೆಕೆಂಡರಿ ಶಾಲೆಯ 10ನೇ ತರಗತಿ ವಿದ್ಯಾರ್ಥಿ ಜೈಬ್ ಪಟೇಲ್ (15) ಮತ್ತು 9ನೇ ತರಗತಿ ವಿದ್ಯಾರ್ಥಿ ನಖೀಬ್ ಪಟೇಲ್ (13) ಎಂದು ಗುರುತಿಸಲಾಗಿದೆ.

ಶಾಲೆಯ ಪ್ರಾಂಶುಪಾಲೆ ಧುಮಾಲ್ ಅವರು ಮಧ್ಯಾಹ್ನ ಸುಮಾರು 3.34ಕ್ಕೆ ಇಬ್ಬರೂ ಶಾಲೆಯ ವಿದ್ಯಾರ್ಥಿಗಳಾಗಿದ್ದು, ಶುಕ್ರವಾರ ಶಾಲೆಗೆ ಗೈರಾಗಿದ್ದರು ಎಂದು ದೃಢಪಡಿಸಿದರು.

ಘಟನೆಯ ನಿಖರ ಕಾರಣ ಹಾಗೂ ಸಂದರ್ಭಗಳ ಕುರಿತು ಪೊಲೀಸರು ತನಿಖೆ ಆರಂಭಿಸಿದ್ದಾರೆ.