ಲೋಕದರ್ಶನ ವರದಿ 

  ಸವಣೂರ 14 : ಪಟ್ಟಣದ ಹೆಸ್ಕಾಂ ಕಚೇರಿಯಲ್ಲಿ ವಿದ್ಯುತ್ ನೌಕರರು ವಿದ್ಯುತ್ ಇಲಾಖೆಯಲ್ಲಿ ಖಾಸಗಿಕರಣಕ್ಕೆ ತೀವ್ರ ವಿರೋಧ ವ್ಯಕ್ತಪಡಿಸಿ ಸಾಂಕೇತಿಕವಾಗಿ ಪ್ರತಿಭಟಿಸಿದರು. ವಿದ್ಯುತ್ ವಿತರಣಾ ವ್ಯವಸ್ಥೆಯಲ್ಲಿ ಟಾಟಾ ಪವರ್ ಕಂಪನಿ ಯವರು ರಾಜ್ಯದಲ್ಲಿ ವಿದ್ಯುತ್ ವಿತರಣೆಯ ಪರವಾನಗೆಗಾಗಿ ಕರ್ನಾಟಕ ವಿದ್ಯುತ್ ಶಕ್ತಿ ಮಂಡಳಿ ಅರ್ಜಿ ಸಲ್ಲಿಸಿರುವ ಹಿನ್ನಲೆಯಲ್ಲಿ, ಸರ್ಕಾರಿ ಸ್ವಾಮ್ಯದ ಸಂಸ್ಥೆಯನ್ನು ಖಾಸಗಿಯವರಿಗೆ ಮಾರಲು ಹೊರಟಿರುವ ಸರ್ಕಾರದ ಹಿಂಬಾಗಿಲ ಪ್ರಯತ್ನವನ್ನು ಖಂಡಿಸಿದರು. ಹಾವೇರಿಯ ಮತ್ತು ರಾಣೆಬೆನ್ನೂರು ವಿಭಾಗದ ನೌಕರರ ಸಂಘದ ಸಂಘಟನಾ ಕಾರ್ಯದರ್ಶಿಗಳಾದ ಶಿವಾನಂದ ಹಾದಿಮನಿ ಮಾತನಾಡಿ ನಮ್ಮ ಹಿಂದಿನ ನೌಕರರು ಗುಡ್ಡ ಬೆಟ್ಟಗಳಲ್ಲಿ ವಿದ್ಯುತ್ ಮಾರ್ಗಗಳನ್ನು ಮಾಡಿ, ರಾಜ್ಯದ ಜನರಿಗೆ ಬೆಳಕು ಕೊಡಲು ಅದೆಷ್ಟೋ ಜನ ಪವರ್ಮನ್ ಗಳು ಕತ್ತಲಲ್ಲೇ ಜೀವ ಬಿಟ್ಟಿದ್ದಾರೆ.

ಇಷ್ಟೊಂದು ಜೀವದ ಹಂಗು ತೊರೆದು ಕಟ್ಟಿದ ಸರ್ಕಾರಿ ಸಂಸ್ಥೆಯನ್ನು ಖಾಸಗಿಯವರಿಗೆ ಅಷ್ಟು ಸುಲಭವಾಗಿ ಮಾರಿಬಿಟ್ಟರೆ ಈಗಿರುವ ನೌಕರರ ಉದ್ಯೋಗ ಭದ್ರತೆ ಧಕ್ಕೆ ಉಂಟಾಗುತ್ತದೆ.ಹಾಗಾಗಿ ಇದು ಹೀಗೆ ಮುಂದುವರೆದಲ್ಲಿ ಬಿದಿಗಿಳಿದು ಪ್ರತಿಭಟನೆ ಮಾಡಲಾಗುವುದು ಎಂದರು. ಉಪ-ವಿಭಾಗದ ಸಹಾಯಕ ಕಾರ್ಯನಿವಾಹಕ ಅಭಿಯಂತರರಾದ ದೇವರಾಜ ಅವರೆಡ್ಡಿ ಮಾತನಾಡಿ ನಾವೆಲ್ಲರೂ ಒಗ್ಗಟ್ಟಿನಿಂದ ಸರ್ಕಾರ ಆಕ್ಷೇಪಣೆ ಸಲ್ಲಿಸುವ ಮಟ್ಟಕ್ಕೆ ಹೋರಾಟ ನಡೆಸಬೇಕೆಂದರು.ಈ ಸಂದರ್ಭದಲ್ಲಿ ಉಪ-ವಿಭಾಗದ ಅಧಿಕಾರಿಗಳು, ನೌಕರರ ಸಂಘದ ಎಲ್ಲ ಸಮಿತಿಗಳ ಪದಾಧಿಕಾರಿಗಳು ಹಾಗೂ ನೌಕರರು ಪಾಲ್ಗೊಂಡಿದ್ದರು.