ಲಕ್ಷ್ಮೇಶ್ವರ 28: ಜೂನ್ 30, 2026ರಿಂದ ಎಸ್‌ಐಆರ್ ಅಡಿಯಲ್ಲಿ ಮತದಾರರ ಪಟ್ಟಿಯ ವಿಶೇಷ ಪರಿಷ್ಕರಣೆ ಕಾರ್ಯ ಆರಂಭವಾಗಲಿದೆ ಎಂದು ತಹಶೀಲ್ದಾರ ಎಂ. ಧನಂಜಯ ತಿಳಿಸಿದ್ದಾರೆ.  ಈ ಕುರಿತು ಪ್ರಕಟಣೆ ನೀಡಿರುವ ಅವರು, ಪರಿಷ್ಕರಣೆ ಕಾರ್ಯದ ಅಂಗವಾಗಿ ಬಿಎಲ್‌ಒ  ಮನೆ ಮನೆಗೆ ಭೇಟಿ ನೀಡಿ ಅರ್ಜಿ ನಮೂನೆ ವಿತರಿಸಿ ಮತದಾರರ ಸಹಿ ಪಡೆಯಲಿದ್ದಾರೆ. ನಂತರ ಮತದಾರರು ನಮೂನೆಯಲ್ಲಿ ಅಗತ್ಯ ಮಾಹಿತಿಯನ್ನು ಭರ್ತಿ ಮಾಡಿ, ಒಂದು ಪಾಸ್ಪೋರ್ಟ್‌ ಗಾತ್ರದ ಭಾವಚಿತ್ರ ಅಂಟಿಸಿ ನಿಗದಿತ ಅವಧಿಯೊಳಗೆ ಸಂಬಂಧಿತ ಬಿಎಲ್‌ಒ ಅವರಿಗೆ ಸಲ್ಲಿಸಬೇಕು ಎಂದು ಮನವಿ ಮಾಡಿದ್ದಾರೆ.  

ನಿಗದಿತ ನಮೂನೆಯನ್ನು ಭರ್ತಿ ಮಾಡಿ ಸಲ್ಲಿಸದಿದ್ದಲ್ಲಿ ಮತದಾರರ ಪಟ್ಟಿಯಿಂದ ಹೆಸರು ಕೈಬಿಡುವ ಸಾಧ್ಯತೆ ಇರುವುದರಿಂದ ಎಲ್ಲ ಮತದಾರರು ಕಡ್ಡಾಯವಾಗಿ ಸಹಕರಿಸಬೇಕು. ಪಾಸ್ಪೋರ್ಟ್‌ ಗಾತ್ರದ ಭಾವಚಿತ್ರ ಇಲ್ಲದವರು ಕೂಡಲೇ ಫೋಟೊ ತೆಗೆಸಿಕೊಂಡು ಸಿದ್ಧವಾಗಿರಬೇಕು ಎಂದು ಅವರು ತಿಳಿಸಿದ್ದಾರೆ.  ಮತದಾರರು ಚುನಾವಣಾ ಆಯೋಗದ ಈ ಮಹತ್ವದ ಪರಿಷ್ಕರಣೆ ಕಾರ್ಯದಲ್ಲಿ ಸಕ್ರಿಯವಾಗಿ ಪಾಲ್ಗೊಂಡು ಅಗತ್ಯ ದಾಖಲೆಗಳನ್ನು ಸಮಯಕ್ಕೆ ಸರಿಯಾಗಿ ಸಲ್ಲಿಸುವಂತೆ ತಹಶೀಲ್ದಾರ ಎಂ. ಧನಂಜಯ ಮನವಿ ಮಾಡಿದ್ದಾರೆ.