ಲೋಕದರ್ಶನ ವರದಿ 

ನೇಸರಗಿ ಸೆ.11: ಬೆಳಗಾವಿ ಜಿಲ್ಲೆಯ ಮುಧೋಳ ತಾಲೂಕಿನ ಹುಣಶ್ಯಾಳ ಪಿ.ವೈ. ಗ್ರಾಮದಲ್ಲಿ  ಕೃಷಿ ವಿಜ್ಞಾನ ಕೇಂದ್ರ, ಮತ್ತಿಕೊಪ್ಪ ಹಾಗೂ ಹುಣಶ್ಯಾಳದ ಸತೀಶ್ ಶುಗರ್ಸ್‌ ಲಿಮಿಟೆಡ್ ಸಹಯೋಗದಲ್ಲಿ ಕಬ್ಬಿನ ಸಮಗ್ರ ನಿರ್ವಹಣೆ ಕುರಿತು ವಿಚಾರ ಸಂಕಿರಣ ನಡೆಯಿತು.  

ಕಾರ್ಯಕ್ರಮದಲ್ಲಿ ಕೃಷಿ ವಿಜ್ಞಾನ ಕೇಂದ್ರದ ಹಿರಿಯ ವಿಜ್ಞಾನಿ ಹಾಗೂ ಮುಖ್ಯಸ್ಥ ಡಾ. ಮಂಜುನಾಥ ಚೌರಡ್ಡಿ ಮಾತನಾಡಿ, ಬೆಳಗಾವಿ ಹಾಗೂ ಸುತ್ತಮುತ್ತಲಿನ ಜಿಲ್ಲೆಗಳ ರೈತರು ಕಬ್ಬಿನಲ್ಲಿ ಹೆಚ್ಚಿನ ಇಳುವರಿ ಪಡೆಯಲು ‘100 ಟನ್ ಇಳುವರಿ ತಾಂತ್ರಿಕ ಪದ್ಧತಿ’ಗಳನ್ನು ಅಳವಡಿಸಿಕೊಳ್ಳಬೇಕು ಎಂದು ಸಲಹೆ ನೀಡಿದರು.  

ಕೊಯಮತ್ತೂರಿನ ತಳಿ ಸಂಸ್ಥೆ ಹಾಗೂ ಪುಣೆಯ ವಸಂತದಾದಾ ಸಕ್ಕರೆ ಸಂಸ್ಥೆಯಿಂದ ತರಿಸಲಾದ ಅಂಗಾಂಶ ಕೃಷಿ (ಟಿಶ್ಯೂ ಕಲ್ಚರ್) ಮೂಲ ತಳಿಗಳನ್ನು ಕೃಷಿ ವಿಜ್ಞಾನ ಕೇಂದ್ರದ ಆವರಣದಲ್ಲಿ ಬೆಳೆಸಲಾಗಿದ್ದು, ದ್ವಿತೀಯ ಹಂತದ ಫೌಂಡೇಶನ್ ಸಸಿಗಳು ರೈತರಿಗೆ ವಿತರಿಸಲು ಸಿದ್ಧವಾಗಿವೆ ಎಂದು ತಿಳಿಸಿದರು.  

ಕೃಷಿ ವಿಜ್ಞಾನ ಕೇಂದ್ರ ಸಿದ್ಧಪಡಿಸಿದ ಜೈವಿಕ ಗೊಬ್ಬರ ಹಾಗೂ ಜೈವಿಕ ಕೀಟನಾಶಕಗಳ ಬಳಕೆಯಿಂದ ರಾಸಾಯನಿಕ ಗೊಬ್ಬರ ಮತ್ತು ಕೀಟನಾಶಕಗಳ ಬಳಕೆಯನ್ನು ಶೇ.30ರಷ್ಟು ಕಡಿಮೆ ಮಾಡಬಹುದು. 5 ಅಡಿ ಹಾಗೂ 7 ಅಡಿ ಅಂತರದ ಸಾಲು ಪದ್ಧತಿಯಲ್ಲಿ ದ್ವಿದಳ ಧಾನ್ಯಗಳನ್ನು ಅಂತರ ಬೆಳೆಯಾಗಿ ಬೆಳೆಸುವುದರಿಂದ ಮಣ್ಣಿನ ಫಲವತ್ತತೆ ಹೆಚ್ಚುವುದರ ಜೊತೆಗೆ ರೈತರಿಗೆ ಹೆಚ್ಚುವರಿ ಆದಾಯ ದೊರೆಯಲಿದೆ ಎಂದರು.  

ಗ್ರಾಮ ಪಂಚಾಯಿತಿ ಅಧ್ಯಕ್ಷ ಅಜ್ಜಪ್ಪಗಿರೆಡ್ಡಿ ಮಾತನಾಡಿ, ಮತ್ತಿಕೊಪ್ಪದಲ್ಲಿರುವ ಎಲ್ಲ ಸೌಲಭ್ಯಗಳನ್ನು ರೈತರು ಸದುಪಯೋಗಪಡಿಸಿಕೊಂಡು ನೂರು ಟನ್ ಇಳುವರಿ ಪಡೆಯಬೇಕು ಎಂದು ಕರೆ ನೀಡಿದರು.  

ಸತೀಶ್ ಶುಗರ್ಸ್‌ ಲಿಮಿಟೆಡ್ ಪರವಾಗಿ ಸಿ. ಪೂಜೇರಿ ಅವರು ರೈತರಿಗೆ ಕಾರ್ಖಾನೆ ಹಂತದಲ್ಲಿ ದೊರೆಯುವ ತಾಂತ್ರಿಕ ಬೆಂಬಲದ ಕುರಿತು ವಿವರಿಸಿದರು. ಪ್ರಗತಿಪರ ರೈತರಾದ ರಮೇಶ ನಾಯ್ಕ, ದುಂಡಪ್ಪ ಜಾಡರ, ವೆಂಕಪ್ಪ ಮುಧೋಳ, ಮಲ್ಲಪ್ಪ ಪಾಟೀಲ, ಭೀಮಶಿ ಕುರುಬರಹಟ್ಟಿ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.