ಯುವಕರು ಸಮಯಾವಕಾಶವನ್ನು ಒಳ್ಳೆಯ ರೀತಿಯಲ್ಲಿ ಬಳಸಿಕೊಂಡಲ್ಲಿ ಆರೋಗ್ಯಕ್ಕೆ ಹಿತ

           ದಾಂಡೇಲಿ 12: ತಾಲೂಕು ಕಾನೂನು ಸೇವಾ ಸಮಿತಿ, ನ್ಯಾಯವಾದಿಗಳ ಸಂಘ, ಅಭಿಯೋಜನಾ ಇಲಾಖೆ, ಕಂದಾಯ ಇಲಾಖೆ, ಶಿಕ್ಷಣ ಇಲಾಖೆ ಹಾಗೂ ಸರ್ಕಾರಿ ಉಪಕರಣಗಾರ ಮತ್ತು ತರಬೇತಿ ಕೇಂದ್ರ ದಾಂಡೇಲಿ ಇವರ ಸಂಯುಕ್ತ ಆಶ್ರಯದಲ್ಲಿ ಸೋಮವಾರ ಸರ್ಕಾರಿ ಉಪಕರಣಗಾರ ಮತ್ತು ತರಬೇತಿ ಕೇಂದ್ರದಲ್ಲಿ ಆಯೋಜಿಸಿದ್ದ ರಾಷ್ಟ್ರೀಯ ಯುವ ದಿನಾಚರಣೆ ಅಂಗವಾಗಿ ನಡೆದ  ಕಾರ್ಯಕ್ರಮವನ್ನು ಸ್ಥಳೀಯ ಸಿವಿಲ್ ನ್ಯಾಯಾಧೀಶರಾದ ತೇಜಸ್ವಿನಿ ಸೊಗಲದ ಜ್ಯೋತಿ ಬೆಳಗಿಸಿ ಉದ್ಘಾಟಿಸಿ ಮಾತನಾಡಿ. ಯುವಜನರು ಜೀವಮಾನದಲ್ಲಿ ಅಧ್ಬುತವಾದ ಸಮಯಾವಕಾಶವನ್ನು ಒಳ್ಳೆಯ ರೀತಿಯಲ್ಲಿ ಬಳಸಿಕೊಂಡಲ್ಲಿ ಅಧ್ಬುತವಾದ ಕೆಲಸಗಳೊಂದಿಗೆ ಎಲ್ಲರ ನೆನಪಿನಲ್ಲಿ ಉಳಿಯುತ್ತಾರೆ. ಆ ದಿಶೆಯಲ್ಲಿ ಯುವ ಜನರು ಮೆದುಳನ್ನು ಸರಿಯಾದ ರೀತಿಯಲ್ಲಿ ಆಲೋಚಿಸಿ ಉಪಯೋಗಿಸಿ ಅಧ್ಬುತ ಕಾರ್ಯ ಮಾಡುವಂತಾಗಬೇಕು ಎಂದು ನುಡಿದರು.  

          ಮುಖ್ಯ ಅತಿಥಿಗಳಾಗಿ ನ್ಯಾಯವಾದಿ ಸಂಘದ ಅಧ್ಯಕ್ಷರಾದ ಎಸ್‌.ಎಮ್ ದಬಗಾರ ಮಾತನಾಡಿ ಸ್ವಾಮಿ ವಿವೇಕಾನಂದರ ಆದರ್ಶವನ್ನು ಯುವಜನರು ಬೆಳಸಿಕೊಳ್ಳುವಂತಾಗಬೇಕು. ಯುವ ಜನತೆ ರಾಷ್ಟ್ರದ ಅಧ್ಬುತ ಶಕ್ತಿಯಾಗಿದ್ದು ರಾಷ್ಟೃದ ಅಭಿವೃದ್ದಿಗೆ ಮಹತ್ವದ ಕೊಡುಗೆ ನೀಡಬೇಕಿದೆ ಎಂದರು. ಉಪಾಧ್ಯಕ್ಷರಾದ ಅನಿತಾ ಎಸ್‌. ಹಿರಿಯ ವಕೀಲರಾದ ಸೋಮಕುಮಾರ ಅವರು ವಿದ್ಯಾರ್ಥಿಗಳಿಗೆ ಸೂಕ್ತ ಕಾನೂನು ಮಾಹಿತಿಗಳ ಮೂಲಕ ತಿಳುವಳಿಕೆ ನೀಡಿದರು. ಸರ್ಕಾರಿ ಉಪಕರಣಗಾರ ಹಿರಿಯ ಆಡಳಿತಾಧಿಕಾರಿ ವಾಸುದೇವ ಎಂ. ಮಿರಾಶಿ ಅಧ್ಯಕ್ಷತೆವಹಿಸಿದ್ದರು. ಸರ್ಕಾರಿ ವಕೀಲರಾದ ರಮೇಶ ಎಂ. ಬಂಕಾಪೂರ ಯುವಜನರ ಕರ್ತವ್ಯಗಳ ಕುರಿತು ಉಪನ್ಯಾಸ ನೀಡಿದರು. ಉಪ ತಹಶೀಲದಾರ ಗೋಪಿ ಕಂದಾಯ ಇಲಾಖೆಯ ಕುರಿತಂತೆ ಮಾಹಿತಿ ನೀಡಿದರು. ಲಲಿತಾ ಪುಟ್ಟೆಗೌಡ ಕಾರ್ಯಕ್ರಮ ಸಂಯೋಜಿಸಿದರು.