ಲೋಕದರ್ಶನ ವರದಿ 

ವಿಜಯಪುರ 22 : ಓಂ ಪತಂಜಲಿ ಬಲಮುರಿ ಗಣೇಶ್ ಉಚಿತ ನಿರಂತರ ಯೋಗ ಕೇಂದ್ರ, ವಿಜಯಪುರದ ವತಿಯಿಂದ 12ನೇ ಅಂತರಾಷ್ಟ್ರೀಯ ಯೋಗ ದಿನಾಚರಣೆಯನ್ನು ಭಾನುವಾರ ಅತ್ಯಂತ ಅರ್ಥಪೂರ್ಣ ಹಾಗೂ ಉತ್ಸಾಹಭರಿತವಾಗಿ ಆಚರಿಸಲಾಯಿತು. 

ನಗರದ ಯೋಗಾಭ್ಯಾಸಿಗಳು ಮತ್ತು ಯೋಗ ಬಳಗದ ಸದಸ್ಯರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿ, ಸಾಮೂಹಿಕ ಯೋಗಾಭ್ಯಾಸದ ಮೂಲಕ ಯೋಗದ ಮಹತ್ವವನ್ನು ಸಾರಿದರು. ಕಾರ್ಯಕ್ರಮವು ಯೋಗ ಶಿಕ್ಷಕಿಯರಾದ ವಿಮಲಾಕ್ಷಿ (ಮಾಯ) ಅರವಿಂದ್ ಸಿಂದಗಿ ಹಾಗೂ ರೇಖಾ ಹಾದಿಮನಿ ಅವರ ಮಾರ್ಗದರ್ಶನ ಮತ್ತು ನೇತೃತ್ವದಲ್ಲಿ ನಡೆಯಿತು. 

ಈ ಸಂದರ್ಭದಲ್ಲಿ ವಿವಿಧ ಯೋಗಾಸನಗಳು, ಪ್ರಾಣಾಯಾಮ ಹಾಗೂ ಸೂರ್ಯ ನಮಸ್ಕಾರಗಳನ್ನು ಅಭ್ಯಾಸ ಮಾಡಲಾಯಿತು. ಯೋಗವು ದೈಹಿಕ ಮತ್ತು ಮಾನಸಿಕ ಆರೋಗ್ಯವನ್ನು ವೃದ್ಧಿಸುವ ಅತ್ಯುತ್ತಮ ಸಾಧನವಾಗಿದ್ದು, ಪ್ರತಿಯೊಬ್ಬರೂ ತಮ್ಮ ದೈನಂದಿನ ಜೀವನದಲ್ಲಿ ಯೋಗವನ್ನು ಅಳವಡಿಸಿಕೊಳ್ಳಬೇಕು ಎಂದು ಶಿಕ್ಷಕಿಯರು ಕರೆ ನೀಡಿದರು. 

“ಯೋಗ ಮಾಡಿ ನಿರೋಗಿಯಾಗಿರಿ. ಯೋಗ ಉಚಿತ, ಆರೋಗ್ಯ ಖಚಿತ. ಯೋಗ ಓಡಿದರೆ ರೋಗ ಓಡುತ್ತದೆ. ಸೂರ್ಯನಿಗೆ ನಮನ ಸಲ್ಲಿಸುವ ಸೂರ್ಯ ನಮಸ್ಕಾರವು ಸರ್ವರೋಗ ಶಮನಕ್ಕೆ ಸಹಕಾರಿಯಾಗಿದೆ” ಎಂದು ಅವರು ತಿಳಿಸಿದರು. 

ಕಾರ್ಯಕ್ರಮದಲ್ಲಿ ಲಕ್ಷ್ಮೀ ಸಾಗರ, ಶೃತಿ ಲೋಣಿ, ಸವಿತಾ ಈರನಗೌಡ ಬಿರಾದಾರ (ಹೆಗಡಿಹಾಳ), ವಿಜಯಲಕ್ಷ್ಮಿ ಬಿರಾದಾರ, ಕಮಲಾ ಅಂಕದ, ಶೈಲಾ ವಾಂಗೆ ಸೇರಿದಂತೆ ಅನೇಕ ಯೋಗ ಸಾಧಕರು ಹಾಗೂ ಮಹಿಳಾ ಸದಸ್ಯರು ಭಾಗವಹಿಸಿ ಯೋಗ ದಿನಾಚರಣೆಯ ಯಶಸ್ಸಿಗೆ ಸಾಕ್ಷಿಯಾದರು. 

ಅಂತರಾಷ್ಟ್ರೀಯ ಯೋಗ ದಿನಾಚರಣೆಯ ಅಂಗವಾಗಿ ನಡೆದ ಈ ಕಾರ್ಯಕ್ರಮವು ಆರೋಗ್ಯಕರ ಜೀವನಶೈಲಿಯ ಕುರಿತು ಜನರಲ್ಲಿ ಜಾಗೃತಿ ಮೂಡಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿತು. ಯೋಗದ ಮಹತ್ವವನ್ನು ಸಾರುವ ಮೂಲಕ ಸಮಾಜದಲ್ಲಿ ಆರೋಗ್ಯದ ಬಗ್ಗೆ ಸಕಾರಾತ್ಮಕ ಸಂದೇಶವನ್ನು ರವಾನಿಸಿತು.