ಲೋಕದರ್ಶನ ವರದಿ 

ಹಾವೇರಿ, ಜುಲೈ 20: ಕನ್ನಡೇತರರಿಗೆ ಕನ್ನಡವನ್ನು ಪರಿಚಯಿಸುವುದು, ಕನ್ನಡಿಗರಲ್ಲಿ ಭಾಷಾಭಿಮಾನ ಬೆಳೆಸುವುದು ಹಾಗೂ ಕನ್ನಡ ಸಾಹಿತ್ಯವನ್ನು ಉತ್ತೇಜಿಸುವುದು ಕನ್ನಡ ಸಾಹಿತ್ಯ ಮತ್ತು ಸಾಂಸ್ಕೃತಿಕ ಸಂಘಟನೆಗಳ ಪ್ರಮುಖ ಧ್ಯೇಯವಾಗಬೇಕು ಎಂದು ಡಾ. ಸತೀಶ ಕುಲಕರ್ಣಿ ಹೇಳಿದರು.  ನಗರದ ಹೊಸಮಠದಲ್ಲಿ ಜಿಲ್ಲಾ ಕರುನಾಡ ಕನ್ನಡ ಸಾಹಿತ್ಯ ಹಾಗೂ ಸಾಂಸ್ಕೃತಿಕ ಬಳಗದ ನೂತನ ಪದಾಧಿಕಾರಿಗಳ ಪದಗ್ರಹಣ ಹಾಗೂ ಕವಿಗೋಷ್ಠಿ ಕಾರ್ಯಕ್ರಮ ಉದ್ಘಾಟಿಸಿ ಅವರು ಮಾತನಾಡಿದರು.  

ದಿವ್ಯ ಸಾನ್ನಿಧ್ಯ ವಹಿಸಿದ್ದ ಪೂಜ್ಯ ಬಸವಶಾಂತಲಿಂಗ ಸ್ವಾಮೀಜಿ ಮಾತನಾಡಿ, ಕನ್ನಡ ಭಾಷೆ, ಸಾಹಿತ್ಯ ಮತ್ತು ಸಂಸ್ಕೃತಿಯನ್ನು ಉಳಿಸಿ ಬೆಳೆಸುವುದು ಪ್ರತಿಯೊಬ್ಬ ಕನ್ನಡಿಗನ ಜವಾಬ್ದಾರಿಯಾಗಿದೆ. ಕನ್ನಡ ನಾಡು-ನುಡಿ ಕುರಿತು ಆತ್ಮಾಭಿಮಾನ ಹಾಗೂ ಜಾಗೃತಿ ಮೂಡಿಸುವುದು ಇಂದಿನ ಅಗತ್ಯ ಎಂದು ಹೇಳಿದರು.  ಕವಿಗೋಷ್ಠಿಯ ಅಧ್ಯಕ್ಷತೆ ವಹಿಸಿದ್ದ ಪ್ರಾಚಾರ್ಯ ಡಾ. ಸೋಮನಾಥ ಡಿ. ಮಾತನಾಡಿ, ಕವಿತೆಗಳು ನೇರವಾಗಿ ಹೃದಯವನ್ನು ಸ್ಪರ್ಶಿಸುವ ಶಕ್ತಿಯನ್ನು ಹೊಂದಿದ್ದು, ಭಾವನೆಗಳ ಕಲಾತ್ಮಕ ಅಭಿವ್ಯಕ್ತಿಗೆ ಕಾವ್ಯ ಅತ್ಯುತ್ತಮ ಮಾಧ್ಯಮವಾಗಿದೆ ಎಂದು ಅಭಿಪ್ರಾಯಪಟ್ಟರು.  

ಕರುನಾಡ ಕನ್ನಡ ಸಾಹಿತ್ಯ ಹಾಗೂ ಸಾಂಸ್ಕೃತಿಕ ಬಳಗದ ರಾಜ್ಯಾಧ್ಯಕ್ಷ ಎಸ್‌.ಡಿ. ಮೂಡೆಣ್ಣ ಮಾತನಾಡಿ, ಹಾವೇರಿಯಲ್ಲಿ ನಡೆದ ಎರಡನೇ ಕನ್ನಡ ಸಾಹಿತ್ಯ ಸಮ್ಮೇಳನ ಯಶಸ್ವಿಯಾಗಲು ಜಿಲ್ಲೆಯ ಜನತೆ, ಸಾಹಿತಿಗಳು, ಕಲಾವಿದರು ಹಾಗೂ ಮಾಧ್ಯಮಗಳ ಸಹಕಾರ ಕಾರಣವಾಗಿದೆ. ಎಲ್ಲರಿಗೂ ಕೃತಜ್ಞತೆ ಸಲ್ಲಿಸುವುದಾಗಿ ಹೇಳಿದರು.  ಕಾರ್ಯಕ್ರಮದಲ್ಲಿ ಚಂಪಾ ಹುಣಸಿಕಟ್ಟಿ, ಲತಾ ಹಳಕೊಪ್ಪ, ಹೇಮಾವತಿ ಮುದ್ದಿ, ಡಾ. ಎಚ್‌. ಇಮ್ರಾಪುರ, ಜಿ.ಎಂ. ಓಂಕಾರಣ್ಣ, ಡಾ. ಗೀತಾ ಸುತ್ತಕೋಟಿ, ಉಡಚಪ್ಪ ಮಾಳಗಿ, ಡಾ. ರಮೇಶ್ ಅಂಬಿಗೇರ, ನಾಗರಾಜ ಹುಡೇದ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.  

ಕವಿಗೋಷ್ಠಿಯಲ್ಲಿ ಶ್ರೀಕಾಂತ ದೊಡ್ಡಕುರುಬರ, ಜುಬೇದಾ ನಾಯ್ಕ, ರಂಜನಾ ಭಟ್, ಪ್ರಕಾಶಗೌಡ ಗಡಿಯಪ್ಪಗೌಡ್ರ, ನೇತ್ರಾವತಿ ಅಂಗಡಿ, ಹನುಮಂತಸಿಂಗ್ ರಜಪೂತ, ನೇಹಾ ಓಂಕಾರಣ್ಣ, ಶೋಭಾ ಹಡಗಲಿ, ಸಾವಿತ್ರಿ ಬಾಕಿ, ಫರ್ವೀನ್ಬಾನು ಎಲಿಗಾರ, ಶಕುಂತಲಾ ಕಂಬಾಳಿಮಠ ಹಾಗೂ ದಾನೇಶ್ವರಿ ಪೂಜಾರ ಅವರು ಕವನ ವಾಚನ ಮಾಡಿದರು.  ಈ ಸಂದರ್ಭದಲ್ಲಿ ಪೂಜ್ಯ ಬಸವಶಾಂತಲಿಂಗ ಸ್ವಾಮೀಜಿಯವರನ್ನು ಸನ್ಮಾನಿಸಲಾಯಿತು. ಜಯಶ್ರೀ ಅಂಕಲಕೋಟಿ ಪ್ರಾರ್ಥನೆ ನೆರವೇರಿಸಿದರು. ಭಾರತಿ ಯಾವಗಲ್ ತಂಡದವರು ನಾಡಗೀತೆ ಹಾಡಿದರು. ರೇಣುಕಾ ಮಡಿವಾಳ ಸ್ವಾಗತಿಸಿದರು. ಪದ್ಮಾವತಿ ಕಲ್ಲು ಕಾರ್ಯಕ್ರಮ ನಿರೂಪಿಸಿದರು.