ರಾಯಬಾಗ 08 : ತಾಲೂಕಿನ ಭೆಂಡವಾಡ ಗ್ರಾಮದ ವಿರಕ್ತಮಠ ಹಾಗೂ ರೇವಣಸಿದ್ದೇಶ್ವರ ದೇವಸ್ಥಾನಕ್ಕೆ ಸೇರಿದ ಜಮೀನು ವಿಚಾರದಲ್ಲಿ ಅರಣ್ಯ ಇಲಾಖೆ ಹಸ್ತಕ್ಷೇಪ ಮಾಡದಂತೆ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿ ವಿರಕ್ತಮಠದ ಗುರುಸಿದ್ದ ಸ್ವಾಮೀಜಿ ನೇತೃತ್ವದಲ್ಲಿ ಭಕ್ತರು ತಹಸೀಲ್ದಾರ್ ಮಹಾದೇವ ಸನಮುರಿ ಅವರಿಗೆ ಮಂಗಳವಾರ ಮನವಿ ಸಲ್ಲಿಸಿದರು. ಗುರುಸಿದ್ದ ಸ್ವಾಮೀಜಿ ಮಾತನಾಡಿ, ಭೆಂಡವಾಡ ಗ್ರಾಮದ ರಿ.ಸ.ನಂ.41ರಲ್ಲಿರುವ ರೇವಣಸಿದ್ದೇಶ್ವರ ದೇವಸ್ಥಾನದ ಕಬ್ಜಾ ವಹಿವಾಟು ಹಾಗೂ ದೇವಸ್ಥಾನ ಮತ್ತು ಮಠದ ಜೀರ್ಣೋದ್ಧಾರ ಕಾರ್ಯಗಳಿಗೆ ಅರಣ್ಯ ಇಲಾಖೆ ಹಸ್ತಕ್ಷೇಪ ಮಾಡುತ್ತಿರುವುದು ಸರಿಯಲ್ಲ ಎಂದರು. ದೇವಸ್ಥಾನವು ಸುಮಾರು 12ನೇ ಶತಮಾನಕ್ಕಿಂತಲೂ ಹಿಂದಿನಿಂದ ಅಸ್ತಿತ್ವದಲ್ಲಿದೆ. ದೇವಸ್ಥಾನವು ರಿ.ಸ.ನಂ.41ರಲ್ಲಿರುವ ಕುರಿತು ಸರ್ಕಾರದ ದಾಖಲೆಗಳು ಹಾಗೂ ಗ್ರಾಮದ ನಕ್ಷೆಯಲ್ಲಿಯೂ ದಾಖಲಾಗಿವೆ. ಹೀಗಾಗಿ ದೇವಸ್ಥಾನ ಹಾಗೂ ಮಠದ ಜಮೀನಿನ ವಿಚಾರದಲ್ಲಿ ಅರಣ್ಯ ಇಲಾಖೆ ಹಸ್ತಕ್ಷೇಪ ಮಾಡದಂತೆ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸಿದರು. ಈ ಸಂದರ್ಭದಲ್ಲಿ ವಕೀಲ ವಿ.ಎಸ್‌. ಪೂಜಾರಿ ಸೇರಿದಂತೆ ಭೆಂಡವಾಡ, ಮಾವಿನಹೊಂಡಾ, ಕಟಕಬಾವಿ ಹಾಗೂ ಮಂಟೂರ ಗ್ರಾಮದ ಭಕ್ತರು ಉಪಸ್ಥಿತರಿದ್ದರು.