ಶಿಗ್ಗಾವಿ, ಸೆ. 07: ದೇವಸ್ಥಾನಗಳನ್ನು ಜಾಗೃತಿಯಿಂದ ಸಂರಕ್ಷಿಸಿ, ಅವುಗಳ ಅಭಿವೃದ್ಧಿಗೆ ಕೈಜೋಡಿಸುವುದು ಪ್ರತಿಯೊಬ್ಬ ನಾಗರಿಕನ ಕರ್ತವ್ಯವಾಗಿದೆ. ದೈನಂದಿನ ಜೀವನದ ಜಂಜಾಟದ ನಡುವೆಯೂ ಧಾರ್ಮಿಕ ಕಾರ್ಯಗಳು ಹಾಗೂ ದೇವರ ಆರಾಧನೆಗೆ ಸಮಯ ಮೀಸಲಿಡಬೇಕು ಎಂದು ಗಂಜಿಗಟ್ಟಿ ವಿರಕ್ತಮಠದ ಪರಮಪೂಜ್ಯ ಡಾ. ವೈಜಿನಾಥ ಶಿವಲಿಂಗ ಶಿವಾಚಾರ್ಯ ಮಹಾಸ್ವಾಮಿಗಳು ಹೇಳಿದರು.  

ಪಟ್ಟಣದ ಶ್ರೀ ವೀರ ಆಂಜನೇಯ ಹಾಗೂ ಬನ್ನಿ ಮಹಾಕಾಳಿ ದೇವಸ್ಥಾನಗಳ ಶುದ್ಧೀಕರಣ ಮತ್ತು ಹೋಮ-ಹವನ ಪೂಜಾ ಕಾರ್ಯಕ್ರಮದ ಅಂಗವಾಗಿ ಮಾತನಾಡಿದ ಅವರು, ಶ್ರಾವಣ ಮಾಸದಲ್ಲಿ ದೇವಸ್ಥಾನಗಳ ಶುದ್ಧೀಕರಣ ಹಾಗೂ ವಿಶೇಷ ಪೂಜಾ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡಿರುವುದು ಉತ್ತಮ ಕಾರ್ಯವಾಗಿದೆ ಎಂದರು.  ಇಂತಹ ಧಾರ್ಮಿಕ ಕಾರ್ಯಗಳಿಗೆ ಭಾರತ ಸೇವಾ ಸಂಸ್ಥೆಯ ಅಧ್ಯಕ್ಷ ಶ್ರೀಕಾಂತ ದುಂಡಿಗೌಡ ಹಾಗೂ ಸೇವಾರ್ಥಿಗಳು ಸಹಕರಿಸುತ್ತಿರುವುದು ಸಂತಸದ ಸಂಗತಿ ಎಂದು ಅವರು ಹೇಳಿದರು.  

ಈ ಸಂದರ್ಭದಲ್ಲಿ ಶಿಗ್ಗಾವಿ ವಿರಕ್ತಮಠದ ಸಂಗನಬಸವ ಮಹಾಸ್ವಾಮಿಗಳು, ಪುರಸಭೆಯ ಮಾಜಿ ಅಧ್ಯಕ್ಷ ಶಿವಪ್ರಸಾದ ಸುರಗಿಮಠ, ಕೆಸಿಸಿ ಬ್ಯಾಂಕ್ನ ನಿರ್ದೇಶಕ ಸಂಗಮೇಶ ಕಂಬಾಳಿಮಠ, ರಮೇಶ ಸಾತಣ್ಣವರ, ರಮೇಶ ವನಹಳ್ಳಿ, ಪ್ರತೀಕ ಕೊಳೇಕರ, ಜಯಶ್ರೀ ಯಲಿಗಾರ, ದೇವೇಂದ್ರ ಬಣಿಗಾರ, ಸಿದ್ದಪ್ಪ ಕಾಳೆ, ಸಂಗಪ್ಪ ಹರವಿ, ಪುಟ್ಟಪ್ಪ ಹರಿಗೊಂಡ, ಸತೀಶ ಬಣಿಗಾರ ಸೇರಿದಂತೆ ಸಾರ್ವಜನಿಕರು ಉಪಸ್ಥಿತರಿದ್ದರು.