ಕಾನೂನು ಅರಿವು ನೆರವು ಕಾರ್ಯಕ್ರಮ

ಧಾರವಾಡ   01: ಜೆ.ಎಸ್‌.ಎಸ್ ಸಕ್ರಿ ಕಾನೂನು ಮಹಾವಿದ್ಯಾಲಯ, ಧಾರವಾಡ ಜಿಲ್ಲಾ ಕಾನೂನು ಸೇವಾ ಪ್ರಾಧಿಕಾರ ಇವರ ಸಂಯುಕ್ತಾಶ್ರಯದಲ್ಲಿ ನಿನ್ನೆ (ಜೂ.30) ಕಾನೂನು ಅರಿವು ನೆರವು ಕಾರ್ಯಕ್ರಮವನ್ನು ಜೆ.ಎಸ್‌.ಎಸ್ ಸಕ್ರಿ ಕಾನೂನು ಮಹಾವಿದ್ಯಾಲಯದಲ್ಲಿ ಆಯೋಜಿಸಲಾಗಿತ್ತು.  

ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರದ ಅಧ್ಯಕ್ಷರು ಹಾಗೂ ಪ್ರಧಾನ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶರಾದ ನೆರಳೆ ವೀರಭದ್ರಯ್ಯಾ ವಿಜಯ ಅವರು ಕಾರ್ಯಕ್ರಮ ಉದ್ಘಾಟಿಸಿ, ಮಾತನಾಡಿ,  ಕಾನೂನು ವೃತ್ತಿ ಎಂಬುದು ಅತ್ಯಂತ ಪ್ರತಿಷ್ಠಿತ ವೃತ್ತಿಯಾಗಿದ್ದು, ವೃತ್ತಿ ಮಹತ್ವವನ್ನು ಭಾವಿ ವಕೀಲರು ಅರಿತುಕೊಂಡು ಅದಕ್ಕೆ ಗೌರವಿಸಬೇಕು. ಕಾನೂನು ವೃತ್ತಿ ಎಂಬುದು ಸೇವಾ ಆಧಾರಿತ ವೃತ್ತಿಯಾಗಿದ್ದು, ಸೇವೆ ಸಲ್ಲಿಸುವ ಮನೋಭಾವ ಇಟ್ಟುಕೊಳ್ಳಬೇಕು.

ವಿದ್ಯಾರ್ಥಿಗಳು ತಮ್ಮ ವೃತ್ತಿಯಲ್ಲಿ ಪಾದಾರೆ​‍್ಣ ಮಾಡುವ ಪೂರ್ವದಲ್ಲಿ ಸಂಪೂರ್ಣವಾಗಿ ತಮ್ಮಲ್ಲಿ ವಿಶೇಷ ಕೌಶಲ್ಯತೆಗಳನ್ನು ವೃದ್ದಿಸಿಕೊಂಡು ಯಶಸ್ಸಿನ ದಾರಿಯನ್ನು ತಲುಪಬೇಕು. ಕಾನೂನು ವಿಷಯದಲ್ಲಿ ವಿಶೇಷ ಪರಿಣಿತಿ ಪಡೆದು ವೃತ್ತಿ ಆರಂಭಿಸಬೇಕು. ವಕೀಲರು ಸಮಾಜದ ನಿರ್ಮಾಣಕರ್ತರು ಅವರ ಮೇಲೆ ಹಲವಾರು ಸಾಮಾಜಿಕ ಜವಾಬ್ದಾರಿಗಳಿದ್ದು ಅವುಗಳನ್ನು ನಿಭಾಯಿಸುವ ಕಲೆ ಭಾವಿ ವಕೀಲರು ಬೆಳೆಸಿಕೊಳ್ಳಬೇಕು ಎಂದು ತಿಳಿಸಿದರು. 

ಪ್ರಾಚಾರ್ಯರಾದ ಡಾ. ರೂಪಾ ಇಂಗಳಹಳ್ಳಿ ಅವರು ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡುತ್ತಾ, ಆಧುನಿಕ ಜಗತ್ತಿನಲ್ಲಿ ಕೃತಕ ಬುದ್ದಿಮತ್ತೆಯ ಮೇಲೆ ನಾವು ಅವಲಂಬಿತರಾಗುತ್ತಿದ್ದೇವೆ. ಆದರೆ ಮಾನವ ತನ್ನ ನಿಜವಾದ ಬುದ್ದಿಮಟ್ಟದ ಸಹಾಯದಿಂದ ಮುನ್ನಡೆದು. ಕೃತಕ ಬುದ್ದಿಮತ್ತೆಯನ್ನು ಒಂದು ಕೇವಲ ಸಾಧನವಾಗಿ ಬಳಸಿಕೊಳ್ಳಬೇಕೆಂದು ತಿಳಿಸಿದರು.  

ಈ ಸಂದರ್ಭದಲ್ಲಿ ವಿದ್ಯಾಲಯದ ಹಿರಿಯ ಪ್ರಾದ್ಯಾಪಕರಾದ ಡಾ. ಬಾಬುಲಾಲ ದರಗದ ಅವರು ಕರ್ನಾಟಕ ರಾಜ್ಯ ಕಾನೂನು ವಿಶ್ವವಿದ್ಯಾಲಯದಿಂದ ಪಿ.ಎಚ್‌.ಡಿ. ಪದವಿ ಪಡೆದ ನಿಮಿತ್ತ ಸಂಸ್ಥೆಯ ಪರವಾಗಿ ಸನ್ಮಾನಿಸಲಾಯಿತು. 2023-24 ಸಾಲೀನ ಶೈಕ್ಷಣಿಕ ವರ್ಷದಲ್ಲಿ ರಾಜ್ಯಕ್ಕೆ 03 ನೇ ಸ್ಥಾನ ಪಡೆದ ನಾಗರತ್ನ ಬಿ. ಎಮ್‌. ಅವರನ್ನು ಸನ್ಮಾನಿಸಲಾಯಿತು. 

ಕಾರ್ಯಕ್ರಮದಲ್ಲಿ ಮಮತಾ ಕಲಾಲ ಪ್ರಾರ್ಥಿಸಿದರು. ಸುನೀಲ ಪಾಟೀಲ ನಿರೂಪಿಸಿದರು. ಡಾ. ದೀಪಾ ಪಾಟೀಲ್ ಸ್ವಾಗತಿಸಿದರು. ಶಂಕರೇಶ ಕಟಗಿ ಅತಿಥಿಗಳ ಪರಿಚಯಿಸಿದರು. ಭಾಗ್ಯಶ್ರೀ ಭಟ್ ಅವರು ವಂದಿಸಿದರು.  

ಕಾರ್ಯಕ್ರಮದಲ್ಲಿ ಕಾಲೇಜಿನ ಉಪನ್ಯಾಸಕರಾದ ಪ್ರೊ. ಪೂರ್ಣಿಮಾ ಕುರ್ಡಿಕೇರಿ, ಶೈಲಜಾ ಹಗೇದಾಳ್, ಸುರೇಶ್ ಲಿಂಬಿಕಾಯಿ ಹಾಗೂ ಬೋಧಕೇತರ ಸಿಬ್ಬಂದಿಗಳಾದ ಸತೀಶ್ ಸಿ.ವಿ., ಸುರೇಶ್ ಲಮಾಣಿ, ಪರಸಪ್ಪ ಮಾಂಗ, ಆಯ್‌.ಎಫ್‌.ಗೋಪಾಲಿ, ಗುಡ್ಡಪ್ಪ ಆಡೂರ, ರಫೀಕ್ ಭಾರದ್ವಾಲೆ ಸೇರಿದಂತೆ ಕಾಲೇಜಿನ ಹಲವಾರು ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು ಎಂದು ಸದಸ್ಯ ಕಾರ್ಯದರ್ಶಿಗಳು ಹಾಗೂ ಹಿರಿಯ ಸಿವಿಲ್ ನ್ಯಾಯಧೀಶರಾದ ಎ.ಎಂ.ಬಡಿಗೇರ ಅವರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.