ಲೋಕದರ್ಶನ ವರದಿ 

ಕಾಗವಾಡ 18 :  ಆಟಿಸಂ ಒಂದು ರೋಗವಲ್ಲ, ಬದಲಾಗಿ ಮಕ್ಕಳಲ್ಲಿ ಮೆದುಳಿನ ಬೆಳವಣಿಗೆಗೆ ಸಂಬಂಧಿಸಿದ ನರ ಅಭಿವೃದ್ಧಿಯ ಅಸ್ವಸ್ಥತೆಯಾಗಿದೆ. ಸರಿಯಾದ ಮಾರ್ಗದರ್ಶನ, ಚಿಕಿತ್ಸೆ ಮತ್ತು ತರಬೇತಿಯೊಂದಿಗೆ, ಮಕ್ಕಳ ಸರ್ವತೋಮುಖ ಬೆಳವಣಿಗೆ ಸಾಧ್ಯವಾಗುತ್ತದೆ. ಆದ್ದರಿಂದ ಪಾಲಕರು ತಿಳುವಳಿಕೆ, ಸ್ವೀಕಾರ ಮತ್ತು ಸಹಕಾರದ ಪಾತ್ರ ವಹಿಸಬೇಕೆಂದು ನಿರ್ಮಲ ಆಸ್ಪತ್ರೆ, ವ್ಯಸನಮುಕ್ತಿ, ಪುನರವಸತಿ ಮತ್ತು ಆಟಿಸಂ ಕೇಂದ್ರದ ಮನೋವೈದ್ಯ ಡಾ. ಚಂದ್ರಶೇಖರ್ ಹಳಿಂಗಳೆ ಪಾಲಕರಿಗೆ ಮನವಿ ಮಾಡಿದ್ದಾರೆ. 

ಅವರು, ಇತ್ತಿಚಿಗೆ ಮಿರಜ ಪಟ್ಟಣದ ನಿರ್ಮಲ ಆಟಿಸಂ ಮತ್ತು ಕಲಿಕಾ ಅಂಗವೈಕಲ್ಯ ಶಿಕ್ಷಣ ಕೇಂದ್ರದಲ್ಲಿ ಮಹಾರಾಷ್ಟ್ರ ಹಾಗೂ ಕರ್ನಾಟಕದ ಪಾಲಕರಿಗಾಗಿ ಆಟಿಸ್ಟಿಕ್ ಪ್ರೈಡ್ ದಿನದ ಅಂಗವಾಗಿ ಹಮ್ಮಿಕೊಂಡಿದ್ದ ಉಚಿತ ತಪಾಸಣೆ ಮತ್ತು ಮಾರ್ಗದರ್ಶನ ಶಿಬಿರದಲ್ಲಿ ಮಾತನಾಡುತ್ತಿದ್ದರು. 

ಆಟಿಸಂ ಕೇಂದ್ರದ ಪ್ರಾಂಶುಪಾಲೆ ಡಾ. ಮಾಧುರಿ ವಾಂಗಪತಿ ಮಾತನಾಡಿ, ಆಟಿಸಂ ಎಂದರೇನು.. ಅದರ ಲಕ್ಷಣಗಳು ಮತ್ತು ಕಾರಣಗಳ ಕುರಿತು ಹಾಗೂ ರೋಗ ನಿರ್ಣಯ ಮತ್ತು ಸಕಾಲಿಕ ಚಿಕಿತ್ಸೆಯಿಂದ, ಮಕ್ಕಳು ಸಾಮಾನ್ಯ ಜೀವನವನ್ನು ನಡೆಸಲು ಸಾಧ್ಯವಿದೆ ಎಂದು ಪಾಲಕರಿಗೆ ತಿಳಿಸಿದರು. 

ಸಿಇಒ ವಿನಾಯಕ್ ಕವಡೆ ನಿರ್ಮಲ್ ಆಸ್ಪತ್ರೆಯ ಆಟಿಸಂ ಕೇಂದ್ರದ ಕುರಿತು ಮಾತನಾಡುತ್ತ, ಪಾಲಕರಲ್ಲಿ ಜಾಗೃತಿ ಮೂಡಿಸುವುದು. ಮಕ್ಕಳು ಸರಿಯಾದ ಸಮಯದಲ್ಲಿ ಚಿಕಿತ್ಸೆ ಮತ್ತು ಮಾರ್ಗದರ್ಶನ ಪಡೆಯುವುದನ್ನು ಖಚಿತಪಡಿಸಿಕೊಳ್ಳುವುದು ಬಹಳ ಮುಖ್ಯವಾಗಿದೆ ಎಂದರು.  

ಶಿಬಿರದಲ್ಲಿ ಪಾಲಕರು ತಮ್ಮ ಮಕ್ಕಳಿಗೆ ಬುದ್ಧಿಮತ್ತೆ ಪರೀಕ್ಷೆ, ಮಾತು ಮತ್ತು ಭಾಷಾ ಮೌಲ್ಯಮಾಪನ, ಬೆಳವಣಿಗೆಯ ತಪಾಸಣೆ ಮತ್ತು ನಡವಳಿಕೆಯ ಮೌಲ್ಯಮಾಪನ ಸೇರಿದಂತೆ ವಿಶೇಷ ಪರೀಕ್ಷೆಗಳ ಪ್ರಯೋಜನವನ್ನು ಪಡೆದರು. ಈ ವೇಳೆ ಮಿರಜ, ಸಾಂಗಲಿ ಮತ್ತು ಕರ್ನಾಟಕದ ವಿವಿಧ ಭಾಗಗಳಿಂದ ಪಾಲಕರು, ನಿರ್ಮಲ್ ಆಸ್ಪತ್ರೆ ಮತ್ತು ಆಟಿಸಂ ಕೇಂದ್ರದ ಸಿಬ್ಬಂದಿ ವರ್ಗದವರು ಉಪಸ್ಥಿತರಿದ್ದರು.